យុវជនឆ្នើមម្នាក់ លះបង់ប្រាក់សន្សំ ៥ឆ្នាំ បើកបណ្ណាល័យ ព្រោះហេតុផលមួយ (មានវីដេអូ)

2018-02-05 04:38:32
ការអប់រំ

2018-02-05 04:38:32
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវជន សុខ ឡាក់ បានលះបង់ប្រាក់ដែលខិតខំសន្សំអស់រយៈពេល ៥ឆ្នាំ ពីការងារជាអ្នកកាសែតទទួលបន្ទុកផ្នែកសេដ្ឋកិច្ច មកបើកបណ្ណាល័យបញ្ញវន្ត ដើម្បីបំពេញក្ដីស្រមៃរបស់ខ្លួនតាំងពីនៅតូច។ការបើកបណ្ណាល័យបញ្ញវន្តឡើង យុវជន វ័យ៣០ឆ្នាំ ដឹងរួចហើយថា ពុំអាចរកប្រាក់ចំណូលត្រឡប់មកវិញនោះទេ។ តើ សុខ ឡាក់ គឺជានរណា?

ចុចអាន៖ ធ្លាប់ជាក្មេងរៀបបន្ទប់ និងប្រមូលលុយរៀនភាសាអង់គ្លេស ក្លាយជា CEO នៅក្រុមហ៊ុនអចលនទ្រព្យ

លោក សុខ ឡាក់ សហស្ថាបនិកបណ្ណាល័យបញ្ញវន្ត

ប្រវត្តិសង្ខេប៖

សុខ ឡាក់ កើតនៅឆ្នាំ ១៩៨៧ មានស្រុកកំណើតនៅរាជធានីភ្នំពេញ មានបងប្អូនចំនួន ៤នាក់ ប្រុស២ ស្រី២ ហើយសុខ ឡាក់ជាកូនពៅនៅក្នុងគ្រួសារ។ យុវជនដែលស្រឡាញ់ការអានតាំងពីនៅតូចមកនេះ មានឪពុកឈ្មោះ សុខ ហុង ជាអ្នកលក់ចាប់ហួយ និងម្ដាយឈ្មោះ យូ គាង ជាស្រ្តីមេផ្ទះ។

ប្រវត្តិការសិក្សា

-ចាប់ពីឆ្នាំ ១៩៩៤-២០០០ រៀននៅសាលាបឋមសិក្សាទួលស្លែង

-ចាប់ពីឆ្នាំ ២០០០-២០០៣ រៀននៅអនុវិទ្យាល័យទួលស្វាយព្រៃ

-ចាប់ពីឆ្នាំ ២០០៣-២០០៦ រៀននៅវិទ្យាល័យយុគន្ធរ

-ចាប់ពីឆ្នាំ ២០០៦-២០១០ រៀននៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ផ្នែកសេដ្ឋកិច្ចអភិវឌ្ឍន៍

-ចាប់ពីឆ្នាំ ២០០៧-២០១២ រៀននៅមហាវិទ្យាល័យកម្ពុជា មុខវិជ្ជាវិទ្យាសាស្ត្រអង់គ្លេស។

ចុចអាន៖ នៅពីក្រោយភាពជោគជ័យ អ្នកគ្រប់គ្រង់វ័យក្មេងរូបនេះ មានប្រវត្តិធ្លាប់ជាអ្នកស៊ីឈ្នួលលាងចាន

ប្រវត្តិការងារ

ក្រោយពីបញ្ចប់ការសិក្សា យុវជន សុខ ឡាក់ បានប្រលូកការងារដំបូងជាអ្នកយកព័ត៌មាននៅទូរទស្សន៍អាស៊ីអាគ្នេយ៍ នៅអំឡុងឆ្នាំ ២១០។ មកដល់ឆ្នាំ ២០១២-២០១៣ យុវជនរូបនេះ បានមកធ្វើការនៅទស្សនាវដ្ដីថ្ងៃនេះ ទទួលបន្ទុកផ្នែកសេដ្ឋកិច្ច។ លុះដល់ឆ្នាំ ២០១៥ យុវជនរូបនេះ បានបង្កើតមាតិកាព័ត៌មានសេដ្ឋកិច្ចមួយឲ្យកាសែតកោះសន្តិភាព។ នៅអំឡុងពេលធ្វើការយុវជនរូបនេះ ក៏មិនភ្លេចចងក្រងក្រុម ដើម្បីធ្វើកិច្ចការស្រាវជ្រាវផ្សេង និងមានគំនិតចង់បង្កើតបណ្ណាល័យ។

ចុចទស្សនាវីដេអូ

ចំណង់ចំណូលចិត្តតាំងពីនៅកុមារភាព

រស់នៅក្នុងគ្រួសារដែលចូលចិត្តលើកទឹកចិត្តឲ្យមានការរៀនសូត្រ កុមារា សុខ ឡាក់ តែងតែទៅបណ្ណាល័យជាមួយឪពុក ដើម្បីមើលសៀវភៅ និងទិញសៀវភៅ ដើម្បីយកមកអាន ព្រមទាំងការបណ្ដុះគំនិតឲ្យស្រឡាញ់ធម្មជាតិ។ ការបណ្ដុះគំនិតពីអាណាព្យាបាលតាំងពីតូចនេះហើយ ដែលធ្វើឲ្យកុមារា សុខ ឡាក់ មានទម្លាប់អានសៀវភៅ និងមាននិស្ស័យខ្លាំងនឹងការងារបណ្ណាល័យមកដល់សព្វថ្ងៃនេះ។

ចុចអាន៖ ទោះមានបញ្ហាភ្នែក លោកតាវ័យ ៨៦ឆ្នាំ ជម្នះប្រណាំាងកង់រកថវិកាជួយកុមារក្រីក្រ

ប្រវត្តិនៃការបង្កើតបណ្ណាល័យបញ្ញវន្ត

នៅក្នុងអំឡុងពេលធ្វើការបណ្ដើរ សុខ ឡាក់ បានឆ្លៀតសន្សំលុយបណ្ដើរ ព្រោះមានគោលគំនិតចង់បង្កើតបណ្ណាល័យ ដើម្បីចង់បណ្ដុះពុទ្ធិយុវជន ដូចដែលខ្លួនស្រឡាញ់ការអាន និងចង់បំពេញក្ដីស្រមៃរបស់ខ្លួនតាំងពីនៅតូច។ ក្រោយពីសន្សំលុយបានរយៈពេល ៥ឆ្នាំ ពីការងារជាអ្នកកាសែតផ្នែកសេដ្ឋកិច្ច (២០១០-២០១៥)មក យុវជន សុខឡាក់ បានសហការជាមួយមិត្តភ័ក្ដិ៣នាក់ផ្សេងទៀត សម្រេចចិត្តបើកបណ្ណាល័យបញ្ញវន្តជាសាធារណៈនៅអំឡុង ខែមិថុនា ឆ្នាំ ២០១៦ ដែលមានទីតាំងនៅទល់មុខ សាលាចិន ទួនហ្វា សង្កាត់ទួលស្វាយព្រៃ១ ខណ្ឌចម្ការមន រាជធានីភ្នំពេញ។

ចុចអាន៖ មានអ្វីកើតឡើង បើរៀបការប្ដីថ្មីរួចឲ្យប្ដីដើមមករស់នៅជាមួយ?

តើរហូតមកទល់នឹងពេលនេះ បណ្ណាល័យបញ្ញវន្ត មានសៀវភៅប៉ុន្មានក្បាលដែរ?

ដោយសារក្រុមគ្រួសារសន្សំសៀវភៅតាំងពីយូរណាស់មកហើយ ដូច្នេះផ្ដើមបើកបណ្ណាល័យដំបូង ឪពុក សុខ ឡាក់ បានផ្ដល់សៀវភៅប្រហែល ២ ០០០ ក្បាល ហើយក្រុមការងារទិញខ្លះ បូករួមនឹងសប្បុរសជនមួយចំនួន ដែលបានផ្ដល់សៀវភៅជាបន្តបន្ទាប់មកផងនោះ រហូតមកទល់ពេលនេះ មានជាង ៣ ០០០ ក្បាល។ តួលេខនេះ មានសៀវភៅជាភាសាខ្មែរ អង់គ្លេស និងចិន។ ចំពោះប្រភេទសៀវភៅវិញ មានដូចជា សៀវភៅច្បាប់, សេដ្ឋកិច្ច, បរិស្ថាន, ប្រវត្តិសាស្ត្រខ្មែរ និង អក្សរសាស្ត្រអង់គ្លេសផងដែរ។

ចុចអាន៖ លោកយាយវ័យ ៦៨ឆ្នាំពឹងលើបន្លែផ្លែឈើមួយកញ្ច្រែងរកស៊ីចិញ្ចឹមម្ដាយវ័យ ៩៨ឆ្នាំ

តើលោក សុខ ឡាក់ បានធ្លាប់សិក្សាខ្លះដែរទេថា ហេតុអ្វីបានជាប្រជាជនខ្មែរ មិនសូវចូលចិត្តអានសៀវភៅ ដូចបណ្ដាប្រទេសអភិវឌ្ឈន៍មួយចំនួន?

បើផ្អែកតាមអ្វីដែលខ្ញុំបានអានសៀវភៅខ្លះៗ និងស្រាវជ្រាវ ឃើញថា តាមពិតទៅជនជាតិខ្មែរចូលចិត្តអានខ្លាំងណាស់ ជាក់ស្ដែងសម័យអង្គរ។ ប៉ុន្ដែ ក្រោយសម័យលង្វែក ការបាត់បង់ឯកសារ និងសង្គ្រាមច្រើនលើកច្រើនសារ ជាពិសេសសម័យខ្មែរក្រហម ដែលបានកម្ទេចឯកសារស្ទើរទាំងស្រុង ម៉្លោះហើយធ្វើឲ្យខ្មែរខ្វះឯកសារ ។ យ៉ាងណាក៏ដោយ យើងឃើញថា ឥឡូវយើងចាប់ផ្ដើមទម្លាប់ការអានច្រើនជាងមុនបន្ដិច។

តើលោកសុខ ឡាក់ យល់យ៉ាងណាចំពោះយុវជនបច្ចុប្បន្នទាក់ទងនឹងការអាន?

ឆ្លើយតបនឹងសំណួរនេះ សុខ ឡាក់ បានលើកឡើងថា កំណើននៃការចូលអានមានការកើនឡើង។ ប៉ុន្តែ កំណើននេះនៅយឺតៗនៅឡើយ។ បច្ចុប្បន្ននេះ មានអ្នកមកអានសៀវភៅនៅបណ្ណាល័យបញ្ញវន្ត មានចំនួន ២០០-៣០០ នាក់ក្នុង១ខែ អាចនិយាយបានថា ១ឆ្នាំ មិនក្រោម ២-៣ ម៉ឺននាក់។ ប៉ុន្តែប្រសិនបើយើងនិយាយជារួម ទំនោររបស់ប្រជាជនចាប់ផ្ដើមស្រឡាញ់សៀវភៅ ចូលចិត្តអានជាងមុន បើផ្អែកតាមរយៈការរៀបចំព្រឹត្តិការណ៍ ពិព័រណ៍សៀវភៅនៅកម្ពុជា, ទិវាជាតិអំណាន, ទិវាសៀវភៅកុមារអន្តរជាតិ មហោស្រពបណ្ណាល័យកម្ពុជា, មហោស្រពអក្សរសិល្ប៍ និងកម្មវិធីផ្សេងៗទៀត។

និយាយដោយឡែក តើលោកយល់ថា ការអានមានសារៈសំខាន់ដូចម្ដេចដែរ?

«ការអានគឺជាមូលដ្ឋានគ្រឹះនៃចំណេះដឹង និងការអភិវឌ្ឍន៍ផ្សេងៗ អានច្រើនធ្វើឲ្យយើងមានចំណេះដឹងជ្រៅជ្រះ ហើយអាចដកស្រង់បទពិសោធន៍អតីតកាល រៀបចំផែនការសម្រាប់បច្ចុប្បន្ន និងអនាគត។ ទន្ទឹមនឹងនេះ មានទស្សនវិស័យមើលឃើញអនាគត ហើយអាចបង្កើតកិច្ចសហការមិនប៉ុនប៉ងជិះជាន់អ្នកដទៃ ផ្ទុយទៅវិញ ពួកគេមានចំណេះដឹងជ្រៅជ្រះធ្វើឲ្យមនុស្សជុំវិញមានការអភិវឌ្ឍ។»

ចុចអាន៖ ជ្រូកខ្វៃ កាក់កបខ្លាំងនៅរដូវកាល ឆេង ម៉េង

រហូតមកទល់នឹងពេលនេះ តើបណ្ណាល័យបញ្ញវន្ត បានចូលរួមចំណែកអ្វីខ្លះ?

អស់រយៈពេលជាង ១ឆ្នាំមកនេះ បណ្ណាល័យបញ្ញវន្ត បានអញ្ជើញវាគ្មិន ក៏ដូចជាការបង្កើតកម្មវិធីជួបជុំយុវវ័យមិនតិចជាង ១០០ ព្រឹត្តិការណ៍កន្លងមកនេះ។ ទន្ទឹមនឹងនេះ បណ្ណាល័យបញ្ញវន្ត ក៏បានបង្កើត ក្លិបអ្នកអានបានចំនួន ២ និងគម្រោងពង្រីកបន្ថែមទៀតនៅពេលអនាគត។

ចុចអាន៖ ថៅកែលាលែងតំណែង ក្រោយបុគ្គលិកធ្វើអត្តឃាតខឹងធ្វើការលើសម៉ោង

បណ្ណាល័យបញ្ញវន្ត បើកចំហឲ្យមហាជនមកអានដោយពុំមានគិតប្រាក់ តើក្រុមការងារបណ្ណាល័យបញ្ញវន្ត អាចនឹងបន្តរហូតដល់ពេលណា?

តាមពិតយើងកំពុងគិតបញ្ហានេះដែរ ក្រុមការងារកន្លងមកបានយកប្រាក់ផ្ទាល់ខ្លួន ដើម្បីចំណាយលើថ្លៃផ្ទះជួល ចំណាយលើទឹក ភ្លើង ដូចជាខ្ញុំចឹង! សព្វថ្ងៃនេះយកប្រាក់សន្សំរបស់ខ្លួនមកទប់ចំណាយ ហើយឥឡូវធ្វើការងារ ហ្វ្រីលេនសឺ (Freelancer) បកប្រែ សរសេរអត្ថបទលក់ ដើម្បីយកប្រាក់មកផ្គត់ផ្គង់ខ្លួនឯងផង និងស្ថាប័នផង។ ដូច្នេះហើយយើងក៏មិនអាចមិនគិតអំពីការរកប្រាក់ចំណូលដែរ ដោយសព្វថ្ងៃនេះ បណ្ណាល័យបញ្ញវន្ត មិនបានយកប្រាក់ពីមហាជននោះទេ គ្រាន់តែលក់ភេសជ្ជៈតិចតួច ដើម្បីយកប្រាក់មកផ្គត់ផ្គង់បានត្រឹមថ្លៃចំណាយមូលដ្ឋាន ដូចជាទឹក-ភ្លើង។ ប៉ុន្តែ ទៅថ្ងៃអនាគត យើងកំពុងសិក្សាជាមួយអ្នកជំនាញ ឬកៀរគរ អ្នកផ្សេងៗឲ្យមកជួយគាំទ្រ ឬបង្កើតយុទ្ធសាស្ត្របែបណា ដើម្បីឲ្យបណ្ណាល័យនេះកាន់តែធំ នឹងមាននិរន្តរភាព។

ជាចុងក្រោយ តើលោក សុខ ឡាក់ មានផែនការដូចម្ដេចទៀត ទាក់ទងនឹងការពង្រឹងបណ្ណាល័យបញ្ញវន្តនេះ?

នៅមិនឆ្ងាយពីគោលបំណង និង គោលដៅរបស់បណ្ណាល័យបញ្ញវន្ត គឺចង់ប្រែក្លាយប្រទេសកម្ពុជា ឲ្យទៅជាសេដ្ឋកិច្ចពុទ្ធិ ឬ សេដ្ឋកិច្ចចំណេះដឹង។ ប៉ុន្តែ អ្វីដែលសំខាន់មួយទៀត ខ្ញុំចង់ផ្ញើសារឲ្យយុវជនទាំងអស់ចូលរួមការអានឲ្យបានច្រើនជាងនេះ ដើម្បីបង្កើនសមត្ថភាពរបស់ខ្លួនចាប់យកទីផ្សារអាស៊ាន និង ស្របតាមបច្ចេកវិទ្យាជឿន ដើម្បីឲ្យដើរទាន់បច្ចេកវិទ្យាជឿនលឿន ល្គឹកណា យុវជនមានសមត្ថភាព គ្រប់គ្រងបច្ចេកវិទ្យាទាំងនោះ។ មួយទៀត ប្រទេសកម្ពុជាជាប្រទេសដែលមានកំណើនសេដ្ឋកិច្ច ៧% ដូច្នេះ ដើម្បីរក្សាកំណើននេះបានយូរអង្វែង ល្គឹកណាយុវជនមានសមត្ថភាព និយាយដោយខ្លី ដើម្បីមានសមត្ថភាព យុវជនគួរគប្បីវិនិយោគលើការអាន ដើម្បីពង្រឹងសមត្ថភាពខ្លួនឯង៕

អត្ថបទ៖ ប៊ិន ប៊ុណ្ណា