- 2018-03-13 06:00:00
- ជំនឿ
មានហេតុផលពីរយ៉ាង ពលរដ្ឋខ្មែរមួយចំនួននៅបន្តធ្វើពិធីលៀងអារក្ស
- 2018-03-13 06:00:00
- ចំនួនមតិ 0 | ចំនួនចែករំលែក 0
មានហេតុផលពីរយ៉ាង ពលរដ្ឋខ្មែរមួយចំនួននៅបន្តធ្វើពិធីលៀងអារក្ស
ចន្លោះមិនឃើញ
ប្រជាពលរដ្ឋមួយចំនួននៅតែមានជំនឿទៅលើពិធីបញ្ជាន់រូប ឬលៀងអារក្ស ដោយជឿថាដើម្បីបានសេចក្តីសុខ និងអាចជួយឲ្យជំងឺរោគាទាំងឡាយចាកឆ្ងាយពីអ្នកភូមិ។ នេះបើតាមការលើកឡើងរបស់អ្នករៀបចំពិធីលៀងអារក្ស។
លោក អៀង គុណ វ័យ៦០ឆ្នាំ រស់នៅឃុំបឹងត្រាញ់ខាងជើង ស្រុកទ្រាំង ខេត្តតាកែវ លើកឡើងថាអ្នកភូមិរបស់លោកតែងរៀបចំពិធីលៀងអារក្សមុនពិធីបុណ្យចូលឆ្នាំខ្មែរជារៀងរាល់ឆ្នាំ។ អ្នករៀបចំពិធីនេះដដែលបន្តថា ពិធីលៀងអារក្ស ឬបញ្ជាន់រូបនេះធ្វើឡើងដើម្បីសុំពរជ័យពីអារក្សដែលជឿថាជាអ្នកថែរក្សាអ្នកភូមិឲ្យមានក្តីសុខ។
លោកបន្តថាពិធីនេះក៏មានធ្វើដែរសម្រាប់អ្នកជំងឺ ដោយជឿថាអារក្សអាចជួយឲ្យអ្នកជំងឺបាន ធូរស្បើយ។ ទោះយ៉ាងណាលោកថាអ្វីទាំងនេះគ្រាន់តែជាជំនឿតែប៉ុណ្ណោះ។
ស្រ្តីជាអ្នកភូមិម្នាក់ដែលចូលរួមក្នុងពិធីលៀងអារក្សកាលពីម្សិលមិញនិយាយក្នុងលក្ខខណ្ឌមិនបញ្ចេញឈ្មោះ ថាអ្នកស្រីចូលរួមពិធីនេះទៅតាមទម្លាប់ប៉ុណ្ណោះ និងថាតាមពិតមិនមានអ្វីប្រែប្រួលនោះទេទាំងមុននឹងក្រោយធ្វើពិធី។
អ្នកស្រីបន្តថាៈ «នេះគ្រាន់ជាសេរីភាពនៃជំនឿប៉ុណ្ណោះ...គេថាអាគមផ្សំអាយុ»។
បើតាមលោក អៀង គុណ រណ្តាប់សម្រាប់ពិធីលៀងអារក្សនេះ មានដូចជាបាយសម្ល មាន់ស្ងោរមួយគូនិងមាន់ឆ្កាងមួយ។ ចំណែកឧបករណ៍ភ្លេងវិញលោកថាមានដូចជាស្គរ និងទ្រ ជាដើមប្រើសម្រាប់លេងកំដរសម្រាប់ឲ្យអ្នកបញ្ជូលរូបបញ្ចេញកាយវិការរាំពត់ពេន ដោយជឿថានឹងអន្ទងបារមីឲ្យចូលសណ្ឋិត។
នៅពេលដែលស្រ្តីជាអ្នកបញ្ជាន់រូបធ្វើកាយវិការដូចជាមានបារមីចូលសណ្ឋិន ពេលនោះប្រជាពលរដ្ឋនឹងធ្វើការតាំងសំណួរទៅកាន់អ្នកចូលរូប និងសំណូមពរឲ្យជួយថែរក្សាអ្នកភូមិឲ្យជួបតែសេចក្តីសុខ។
បើតាមវចនានុក្រមសម្តេចព្រះសង្ឃរាជ ជួន ណាត លៀងអារក្ស ជាការរៀបពិធីមានបាយចំណី ព្រមទាំងភ្លេងផងសម្រាប់បូជាជូនអារក្ស៕