- 2018-05-02 07:29:19
- ព័ត៌មាន
ចរាចរណ៍បាត់សណ្តាប់ធ្នាប់ ដោយសារការអនុវត្តច្បាប់មានកម្រិត ឬឥរិយាបថអ្នកបើកបរ?
- 2018-05-02 07:29:19
- ចំនួនមតិ 0 | ចំនួនចែករំលែក 0
ចរាចរណ៍បាត់សណ្តាប់ធ្នាប់ ដោយសារការអនុវត្តច្បាប់មានកម្រិត ឬឥរិយាបថអ្នកបើកបរ?
ចន្លោះមិនឃើញ
ប្រជាពលរដ្ឋមួយចំនួននៅមិនទាន់មានទម្លាប់ល្អគ្រប់គ្រាន់ក្នុងការគោរពច្បាប់ចរាចរណ៍ឲ្យបានពេញលេញនៅឡើយជាហេតុនាំឲ្យចរាចរណ៍បាត់បង់សណ្តាប់ធ្នាប់ ដែលចំណុចនេះទាំងមន្ត្រីសង្គមស៊ីវិល និងអ្នកអនុវត្តច្បាប់មើលឃើញថាឥរិយាបទរបស់បុគ្គលគឺជារឿងសំខាន់មួយបន្ទាប់ពីការរិតបន្តឹងច្បាប់។
ប្រជាពលរដ្ឋខ្លះក្នុងសម្លៀកបំពាក់ជាអ្នកធ្វើការ និងថែមទាំងជិះរថយន្តទំនើបផងបានបើកបរដោយបំពានភ្លើងចរាចរណ៍ និងអ្នកជិះម៉ូតូខ្លះទៀតក្នុងឯណ្ឋានជាសិស្ស ឬអ្នកធ្វើការបើកបរបញ្ច្រាសទិស ឬឆ្លងកាត់ភ្លើងក្រហមក៏មាន។
សម្រាប់អ្នកធ្វើការលើកិច្ចការចរាចរណ៍វិញលើកឡើងថាប្រជាពលរដ្ឋខ្មែរមួយចំនួននៅមានឥរិយាបទមិនទាន់ល្អគ្រប់គ្រាន់នៅឡើយក្នុងការបើកបរ។ អនុប្រធានវិទ្យាស្ថានសុវត្ថិភាពចរាចរណ៍ផ្លូវគោក លោក គង់ រតនៈ មានប្រសាសន៍ថាពលរដ្ឋដែលបំពានស្លាកសញ្ញា ឬភ្លើងចរាចរណ៍មានអ្នកធ្វើការរដ្ឋ និងបុគ្គលិកក្រុមហ៊ុនឯកជនជាដើម។ ជាងនេះទៅទៀតលោកថាសិស្សសាលាមួយចំនួនដែលបានរៀនសូត្រខ្ពង់ខ្ពស់ក៏មានបំពានច្បាប់រាចរណ៍នេះដូចគ្នា។
លោកបន្ថែមថា៖ «អ្វីដែលយើងឃើញល្មើសច្រើនគឺយុវជន ថ្វីដ្បិតតែយុវជនយើងចូលសាលាមែនតែសីលធម៌សម្រាប់សិស្សមួយចំនួនតូចហ្នឹងពិបាកទទួលយកមែនទែន...ចរិករបស់បុគ្គលពីធម្មជាតិហ្នឹង មានអ្នកខ្លះជាមន្ត្រីរាជការ អាចជាបុគ្គិលក្រុមហ៊ុនឯកជនមួយចំនួននៅមានឥរិយាបទ មិនសមរមរឿងចរាចរណ៍ហ្នឹងដូចគ្នា»។
ដើម្បីដោះស្រាយបញ្ហានេះ លោក គង់ រតនៈ លើកឡើងថាការរិតបន្តឹងច្បាប់ និងស្ថាប័នពាក់ព័ន្ធបង្កើនការផ្សព្វផ្សាយ និងអប់រំដល់ប្រជាពលរដ្ឋបន្ថែមទៀតគឺកិច្ចការត្រូវធ្វើបន្ត។ បើមិនដូចនោះទេ លោកថាឥរិយាបទបែបនេះនឹងធ្វើឲ្យជនបរទេសវាយតម្លៃមកលើប្រជាពលរដ្ឋ និងប្រទេសជាតិថាមិនសូវមានឥរិយាបទល្អ និងមិនចេះគោរពច្បាប់។
បើនិយាយពីឥរិយាបទ ក្នុងការបើកបរនេះដែរ កាលពីម្សិលមិញមានការផ្សព្វផ្សាយពេញបណ្តាញសង្គមហ្វេសប៊ុកទាក់ទងនឹងម្ចាស់រថយន្តCamry មួយគ្រឿងបានបើកឆ្លងកាត់ផ្លូវរថភ្លើងបើទោះបីជាបុគ្គលិកផ្លូវដែកបានដាក់បារ៉ាសបាំងផ្លូវហើយក៏ដោយ។ ជនបរទេសម្នាក់បានថតទិដ្ឋភាពនោះ និងបានបង្ហោះលើបណ្តាញសង្គមហ្វេសប៊ុកព្រមទាំងបានសរសេរថា«កម្ពុជា...ពេលខ្លះ អ្នកបើកបរឆ្កួតខ្លាំង...ខ្ញុំដឹងថាមិនមែនទាំងអស់គ្នាទេ...ក៏មានដែរករណីបែបនេះនៅប្រទេសផ្សេងទៀត»។ វីដេអូឃ្លីបដែលជនបរទេសរូបនេះបង្ហោះមានអ្នកចែករំលែកបន្តជាង១ម៉ឺននាក់ និងមានអ្នកចូលទស្សនាជាង២សែនដងក្នុងរយៈពេល២០ម៉ោង។
ឥរិយាបទបើកបរមិនល្អ របស់បុគ្គលមួយចំនួនអាចថាកំពុងធ្វើឲ្យអ្នកបើកបរដូចគ្នាឈឺក្បាល ដោយសារការបើកបរមិនប្រកាន់ស្តាំ និងគន្លងរបស់ខ្លួនជាដើម។ ពេលមានការកកស្ទះម្តងៗអ្នកបើកបរខ្លះបានបើកចូលគន្លងអ្នកមកពីទិសដៅផ្ទុយ ដែលនាំឲ្យអ្នកមកពីទិសដៅម្ខាងទៀតមិនអាចធ្វើចរាចរបាន។ បើតាមរបាយការណ៍ប្រចាំថ្ងៃរបស់សមត្ថកិច្ចមូលហេតុគ្រោះថ្នាក់ចរាចរណ៍សព្វថ្ងៃដោយសារបើកបរលើសល្បឿនកំណត់ បើកបរក្នុងស្ថានភាពស្រវឹង ជែង និងមិនគោរពសិទ្ធិជាដើម។
ក្នុងអនុក្រឹត្យ ពិន័យអន្តរការណ៍ចំពោះអំពើល្មើសនឹងច្បាប់ចរាចរណ៍ផ្លូវគោក ឆ្នាំ២០១៥ ចែងថា អ្នកបើកបរទោចក្រយានយន្តត្រូវផាកពិន័២៥ ០០០ រៀល ចំពោះការជិះខុសទិសដៅចរាចរណ៍ឬសញ្ញាហាមឃាត់។ ចំណែក អ្នកបើកបរទោចក្រយានយន្តបំពានភ្លើងសញ្ញាចរាចរណ៍ព័ណ៌ក្រម ឬក្រហមភ្លិបភ្លែតៗរងការផាកពិន័យដូចគ្នានេះដែរ។
របាយការណ៍របស់នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈនៃ ក្រសួងមហាផ្ទៃ ឲ្យដឹងថាក្នុងត្រីមាសទីមួយឆ្នាំ២០១៨នេះមានចំនួនគ្រោះថ្នាក់ចរាចរណ៍កើតឡើងទូទាំងប្រទេស៨១៩លើក តិចជាងឆ្នាំ២០១៧ ចំនួន១៧០លើក។ ក្នុងនោះចំនួនអ្នកស្លាប់មាន៤៨០នាក់ តិចជាងឆ្នាំ២០១៧ ចំនួន១២នាក់។
សម្រាប់ប្រធាននាយកដ្ឋាននគរបាលចរាចរណ៍ផ្លូវគោក និងសណ្តាប់ធ្នាប់សាធារណៈ នៃក្រសួងមហាផ្ទៃ ឯកឧត្តម រ៉ុន រ័ត្នវាសនា លើកឡើងថាទន្ទឹមនឹងការអនុវត្តច្បាប់របស់សមត្ថកិច្ច ក៏ត្រូវមានដែរការចូលរួមពីអ្នកប្រើប្រាស់ផ្លូវដោយខ្លួនឯង។
ឯកឧត្តមឲ្យដឹងថាប្រជាពលរដ្ឋមួយភាគធំបានចូលរួមគោរព និងអនុវត្តច្បាប់ចរាចរណ៍ផ្លូវគោក ខណៈដែលមានប្រជាពលរដ្ឋមួយចំនួនតូចនៅមិនទាន់បានអនុវត្តឲ្យបានពេញលេញ។ ឯកឧត្តមថានេះមកពីឥរិយាបទមិនល្អរបស់អ្នកទាំងនោះ ដែលត្រង់ចំណុចនេះ ការអនុវត្តច្បាប់ឃាត់យានជំនិះទុករយៈពេលបីថ្ងៃនឹងត្រូវអនុវត្ត។
ឯកឧត្តមបញ្ជាក់ថា៖ «យើងឃើញបងប្អូនប្រជាជពលរដ្ឋហ្នឹងគោរពច្រើនហើយ ទម្លាប់អាក្រក់មនុស្សមួយចំនួនមិនអាចកែបាន យើងឃើញក្នុងឱកាសបុណ្យទានម្តងៗ ឬកន្លែងកកស្ទះមួួចំនួនគាត់ជែងទៅឲ្យជាប់តែម្តង អាពេលវេលាដោះស្រាយបានក្នុងរយៈពេលខ្លី ដ៏គាត់ជែងទៅជាបួន ប្រាំជួរទៅវាជាប់បួន ប្រាំម៉ោង អាហ្នឹងជាបញ្ហា»។
ឯកឧត្តមបន្តថា៖ «យើងយកវិធានការច្បាប់មកនិយាយបានទៅរួច បើយកវិធានការណ៍អប់រំ ផ្សព្វផ្សាយ មនុស្សនៅតែមានខ្លះគាត់នៅតែផ្គើន...រយៈកាលកន្លងមកយើងឃាត់ម៉ូតូរាប់រយគ្រឿងទុក មានឡានមួយចំនួនក៏ឃាត់ទុកដែរ...យើងធ្វើអីកំណត់តាម(ច្បាប់)ហ្នឹទេ...ដើម្បីឲ្យគាត់រអាខ្លះ»។
ទោះជាយ៉ាងនេះក្តី ឯកឧត្តមលើកឡើងថាទន្ទឹមនឹងមានការអនុវត្តច្បាប់ អ្នកប្រើប្រាស់ផ្លូវក៏ត្រូវតែចូលរួមគោរពច្បាប់ទាំងអស់គ្នា ហើយមិនត្រូវទម្លាក់កំហុសតែលើភាគីណាមួយនោះទេ។
ឯកឧត្តមបន្តថា៖ «បើចាំតែប៉ូលីសនៅលើផ្លូវបានគោរពអ៊ីចឹងម៉េចបាន...ប្រទេសខ្លះសឹងគ្មានម៉ូលិសឈរផងនៅគេគោរពច្បាប់ ហើយយើងប៉ូលិសឈរប៉ុណ្ណឹងហើយនៅតែមិនគោរព បើយើងនៅតែអ៊ីចឹងទៀតមិនអាចទេ មានតែប្រើវិធានការណ៍ច្បាប់ហើយបើច្បាប់ឲ្យចាប់ឃាត់ទុកៗតែម្តង...ចូលរួមតែប៉ូលិសម៉េចបាន ទាល់តែអ្នកប្រើប្រាស់ផ្លូវចូលរួមទាំងអស់គ្នា មិនអាចដាក់កំហុសតែពលរដ្ឋ ឬសមត្ថកិច្ចអនុវត្តច្បាប់ទេ ទាល់តែចូលរួមទាំងអស់គ្នា»។
បើតាមរបាយការណ៍របស់សាលារាធានីភ្នំពេញគិតត្រឹមថ្ងៃទី៣១ ខែធ្នូ ឆ្នាំ២០១៦ ចំនួនម៉ូតូចុះបញ្ជីក្នុងរាជធានីភ្នំពេញមានជាង១លាន៦សែនគ្រឿង និងរថយន្តមានជាង៤៤ម៉ឺនគ្រឿង៕
ចុចអាន៖
