- 2018-05-11 03:58:21
- ការអប់រំ
៨០០ សាលាបឋមសិក្សាទៀត នឹងអនុវត្តវិន័យបែបវិជ្ជមាន ដើម្បីស្រង់កុមាររាប់ម៉ឺននាក់ ពីអំពើហិង្សា
- 2018-05-11 03:58:21
- ចំនួនមតិ 0 | ចំនួនចែករំលែក 0
៨០០ សាលាបឋមសិក្សាទៀត នឹងអនុវត្តវិន័យបែបវិជ្ជមាន ដើម្បីស្រង់កុមាររាប់ម៉ឺននាក់ ពីអំពើហិង្សា
ចន្លោះមិនឃើញ
ការដាក់វិន័យបែបវិជ្ជមាន ជាប្រធានបទដ៏សំខាន់ និងជោគជ័យមួយនៅកម្ពុជា បន្ទាប់ពីមានការធ្វើអង្កេត ស្ដីពីអំពើហិង្សាលើកុមារ។ ក្រសួងអប់រំយុវជន និងកីឡា សហការជាមួយអង្គការ យូនីសេហ្វ (UNICEF) នឹងពង្រីកវគ្គបណ្ដុះបណ្ដាល វិក្រឹតការ ដល់សាលាបឋមសិក្សាប្រមាណជា ៨០០ សាលា ដើម្បីលើកកម្ពស់វិស័យអប់រំ។
ការដាក់វិន័យបែបវិជ្ជមាន គឺមានន័យ និងផ្ដល់ឱ្យថ្នាក់ដឹកនាំសាលារៀន ដូចជានាយក នាយករង និងគ្រូ នូវមធ្យោបាយ និងវិធីសាស្ត្រផ្សេងៗ សម្រាប់គ្រប់គ្រងថ្នាក់រៀន និងរក្សាបាននូវទំនាក់ទំនងវិជ្ជមាន អហិង្សា ដោយចំហជាមួយកុមារ ជំនួសឲ្យការវៃដំ កុមារដោយរំពាត់ឈើ។
របាយការណ៍១ របស់អង្គការ យូនីសេហ្វ បានបង្ហាញថា ក្នុងចំណោមកុមារអាយុក្រោម១៨ នៅកម្ពុជា យ៉ាងហោចណាស់ មានកុមារពាក់កណ្ដាល ធ្លាប់ទទួលរងអំពើហិង្សាផ្លូវកាយ ក្នុងទម្រង់ណាមួយ នៅក្នុងគ្រួសារ ពិសេសសាលារៀន។ ការដាក់ទណ្ឌកម្ម នៅសាលារៀន ជារឿយៗ ប៉ះពាល់ដល់ផ្លូវកាយ ឬផ្លូវចិត្តកុមារ និងអនាគតកុមារ។
ក្រៅពីនេះ របាយការណ៍ដដែល បន្តថា ការកើតឡើងញឹកញាប់ នៃអំពើហិង្សាផ្លូវចិត្ត និងការទុកចោលមិនអើពើ ធ្វើឲ្យកុមារម្នាក់ ក្នុងចំណោម៤នាក់ បានជួបប្រទះ ដែលនេះជាការព្រួយបារម្ភមួយ។
កន្លងទៅ ក្នុងការសាកល្បងអនុវត្ត វគ្គបណ្ដុះបណ្ដាល ការដាក់វិន័យបែបវិជ្ជមាន ដំបូងឡើយ គឺមានតែ នៅសាលាបឋមសិក្សា ចំនួន១២ និងក្នុងខេត្តគោលដៅចំនួន៣ (ខេត្តកំពត ព្រៃវែង និងបាត់ដំបង) ប៉ុណ្ណោះ ក្នុងឆ្នាំ២០១៥។ ជាលទ្ធផលគឺបានផ្ដល់ផលវិជ្ជមាន ដល់សិស្សប្រមាណ ៥១ ០០០នាក់។
ដោយសារតែប្រសិទ្ធភាព ក្រសួងអប់រំយុវជន និងកីឡា និងអង្គការ យូនីសេហ្វ នឹងបន្តពង្រីកវគ្គបណ្ដុះបណ្ដាលវិក្រឹតការបន្ថែម ទៅដល់សាលាបឋមសិក្សា ប្រមាណជា ៨០០ សាលា ក្នុងខេត្តដទៃទៀតមុនដំណាច់ឆ្នាំ ២០១៨នេះ។