- 2018-05-21 07:01:19
- ការអប់រំ
ជំនាញទាំង៦នៅកម្ពុជា ភាគច្រើនឃើញតែប្រុសៗរៀន ចប់មួយៗប្រាក់ខែខ្ទង់ពាន់ដុល្លារ
- 2018-05-21 07:01:19
- ចំនួនមតិ 0 | ចំនួនចែករំលែក 0
ជំនាញទាំង៦នៅកម្ពុជា ភាគច្រើនឃើញតែប្រុសៗរៀន ចប់មួយៗប្រាក់ខែខ្ទង់ពាន់ដុល្លារ
ចន្លោះមិនឃើញ
មានជំនាញជាច្រើននៅតាមបណ្ដាសាកលវិទ្យាល័យនានា នៅកម្ពុជាទាំងរដ្ឋ និងឯកជន។ មិនថាជំនាញណាសុទ្ធតែមានចំណុចល្អ និងមានតម្រូវការនៅលើទីផ្សារការងារដូចគ្នា។ អ្វីដែលសំខាន់នោះថាតើរៀនជំនាញអ្វីដែលត្រូវនឹងទេពកោសល្យ សមត្ថភាពរបស់របស់ខ្លួន។ ជាការកត់សម្គាល់មុខជំនាញមួយចំនួនមិនសូវមាននិស្សិតស្រីសិក្សានោះទេ ភាគច្រើនឃើញវត្តមាននិស្សិតប្រុសច្រើនបំផុត។
១. វិស្វករសំណង់ស៊ីវិល
តាមការលើកឡើងរបស់លោកសាស្ត្រាចារ្យ ហេង ដារ៉ារិទ្ធិ ជំនាញនេះភាគច្រើនមិនសូវមានសិស្សស្រីរៀននោះទេ ដោយហេតុថា ពេលរៀនចប់មិនមែនអង្គុយតែក្នុងការិយាល័យនោះទេ ត្រូវបញ្ចេញកម្លាំង និងទាមទារឲ្យមានការតស៊ូខ្ពស់បំផុត។
លោកបន្តថា ជំនាញនេះនិស្សិតត្រូវសិក្សា និង រៀបចំសំណង់ស្ថាប័នឯកជន និង សាធារណៈ ដូចជាហេដ្ឋារនាសម្ព័ន្ធ (ផ្លូវថ្នល់, ផ្លូវដែក, ធារាសាស្ត្រ និងប្រព័ន្ធសំអាតទឹក) ស្ពាន និង សំណង់។ ក្រោយបញ្ចប់ការសិក្សា អាចមានឱកាសក្នុងការចូលរួមគម្រោងវិនិយោគធំៗ របស់ក្រុមហ៊ុនឯកជននានា ក្នុងការត្រួតពិនិត្យលក្ខណៈបច្ចេកទេសសាងសង់។ ចំណែកឯកម្រៃ គឺទទួលបានជាកញ្ចប់តែម្ដង ក្នុង១គម្រោងៗ។
២. ស្ថាបត្យករ
សាស្ត្រាចារ្យនៅសាកលវិទ្យាល័យឯកជនមួយនៅរាជធានីភ្នំពេញ រូបនេះប្រាប់ទៀតថា និស្សិតប្រុសៗភាគច្រើនចូលចិត្តរៀនជំនាញនេះ។ ជំនាញនេះមិនងាយស្រួលក្នុងការសិក្សាឡើយ។ ដើម្បីអាចក្លាយជាស្ថាបត្យករម្នាក់បាន លុះត្រាតែយល់ដឹងអំពី ការរចនា និង យល់ដឹងពីសំណង់អគារ ឱ្យបានច្បាស់លាស់។ មិនតែប៉ុណ្ណោះ គឺត្រូវយល់ដឹងជាពហុជំនាញ មានជាអាទិ៍៖ សិល្បៈ វប្បធម៌ ប្រវត្តិសាស្ត្រ សេដ្ឋកិច្ច នយោបាយ និងបរិស្ថានជាដើម។ និយាយជារួម ស្ថាបត្យករ មិនមែនជាអ្នកគូរប្លង់ទេ តែជាអ្នកសិក្សាគម្រោងប្លង់ ស្ថាបត្យកម្ម។
ស្ថាបត្យករ ត្រូវតែមានវិជ្ជាជីវៈត្រឹមត្រូវ ព្រោះរាល់ការសម្រេចចិត្តរបស់ស្ថាបត្យករ គឺទាក់ទងដល់សុវត្ថិភាពសាធារណៈ។
៣. វិស្វករអគ្គិសនី
ដោយឡែកបើតាម ការលើកឡើងរបស់អតីតនិស្សិតម្នាក់រៀនជំនាញនេះ បច្ចុប្បន្នកំពុងបម្រើការងារនៅក្នុងស្ថាប័នរដ្ឋមួយ ប្រាប់ថា ការសិក្សាជំនាញនេះនិស្សិត ត្រូវសិក្សាមុខវិជ្ជាសំខាន់ៗមួយចំនួនដូចជា៖ អេឡិចត្រូនិច ឌីជីថល សៀវគ្វីអគ្គិសនី, អេឡិចត្រូនិច សូលីដស្តាត គមនាគមន៍ និង គ្រឿងយន្តប្រើថាមពល និង អគ្គិសនី។
វិស្វកម្មអគ្គិសនី បណ្ដុះបណ្ដាលឱ្យនិស្សិតមានអាជីព ជាអ្នកបច្ចេកវិទ្យាវិស្វកម្មអគ្គិសនី។ អ្នកបញ្ចប់ការ សិក្សានឹងមានជំនាញ និងចំណេះដឹងសំខាន់សម្រាប់ធ្វើការ ក្នុងវិស័យអគ្គិសនី អេឡិចត្រូនិច និងកុំព្យូទ័រ ។ ចំណែកតម្រូវការធនធានមនុស្ស គឺមានច្រើន រីឯអ្នកសិក្សាមិនសូវមាន។ ដូច្នេះហើយទើបអ្នកដែលធ្វើការក្នុងវិស័យនេះ ទទួលបានប្រាក់បៀវត្សខ្ពស់។
៤. វិស្វកម្មមេកានិច
មុខវិជ្ជានេះ និស្សិតត្រូវមានចំណេះដឹងឲ្យល្អផ្នែករូបវិទ្យា និងគណិតវិទ្យា។ បន្ទាប់ពីបានបញ្ចប់ការសិក្សា និស្សិតអាច ធ្វើការស្រាវជ្រាវ បង្កើត អភិវឌ្ឍន៍ ផលិត និងធ្វើតេស្តឧបករណ៍ជាច្រើនដូចជា ម៉ាស៊ីន គ្រឿងយន្ត ព្រមទាំងឧបករណ៍មេកានិចដ៏ទៃទៀត។ វិស្វករមេកានិចមានសមត្ថភាពបង្កើតម៉ាស៊ីនទាំងតូច ទាំងធំជាច្រើន ដូចជារថយន្ត មនុស្សយន្ត ម៉ាស៊ីនផលិតអគ្គិសនី ទូរទឹកកក ម៉ាស៊ីនត្រជាក់ និងម៉ាស៊ីនដ៏ទៃជាច្រើនទៀត។
ជាពិសេសមានឱកាសការងារដូចជាធ្វើការនៅ រោងចក្រផលិតគ្រឿងយន្តឬម៉ាស៊ីន ធ្វើការនៅក្នុងក្រុមហ៊ុនប្រឹក្សាយោបល់ផ្នែកមេកានិច ធ្វើការជាអ្នកលក់បច្ចេកទេស ធ្វើការជាអ្នកត្រួតពិនិត្យនៅក្នុងរោងចក្រដែលទាក់ទងនឹងម៉ាស៊ីន អាចក្លាយជាអ្នកគ្រប់គ្រង ឬជាសាស្ត្រាចារ្យ។
៥. ជំនាញព័ត៌មានវិទ្យា (IT)
ជំនាញនេះ ក៏កម្រមាននិស្សិតស្រីសិក្សាដែរ។ ភាគច្រើនបំផុត និស្សិតប្រុសៗ ដែលមានចំណង់ចំណូលចិត្តផ្នែកបច្ចេកវិទ្យាតែងជ្រើសរើសជំនាញនេះ។ ការសិក្សាគឺផ្ដោតទៅលើ ការចងរូបមន្តដើម្បីយកទៅប្រើប្រាស់ក្នុងវិស័យបច្ចេកវិទ្យា។ ជាពិសេស គឺដោះស្រាយបញ្ហាបច្ចេកទេសនានា ដែលពាក់ព័ន្ធនឹងដំណើរការអាជីវកម្មរបស់ក្រុមហ៊ុនឯកជន ក៏ដូចជាវិស័យសាធារណ។ និស្សិតព័ត៌មានវិទ្យាមានឱកាសការងារច្រើននៅតាមបណ្ដាក្រុមហ៊ុនធំៗ និងទទួលបានប្រាក់បៀវត្សខ្ពស់ ទៅតាមជំនាញ និងសមត្ថភាពរបស់ពួកគេ។
៦. ជំនាញបច្ចេកទេសកសិកម្ម
ដោយឡែកជំនាញបច្ចេកទេសកសិកម្ម មិនត្រឹមតែអាចធ្វើការបានប្រាក់ចំណូលខ្ពស់នោះទេ តែប្រសិនបើមានលទ្ធភាពបង្រៀនបន្ត ឫបើកកសិដ្ឋានដោយខ្លួនឯង គឺកាន់តែល្អថែមទៀត ចំពោះនិស្សិតដែលសិក្សាជំនាញនេះ។ ចំណែកឯតម្រូវធនធានមនុស្សទៅលើជំនាញនេះ ក៏មានច្រើនដែរ នៅក្នុងប្រទេសកម្ពុជា៕