- 2018-05-23 05:05:03
- សេដ្ឋកិច្ច
សាំងកាន់តែឡើងថ្លៃ នឹងជះឥទ្ធិពលដូចម្ដេចទៅលើថ្លៃទំនិញ លើទីផ្សារ?
- 2018-05-23 05:05:03
- ចំនួនមតិ 0 | ចំនួនចែករំលែក 0
សាំងកាន់តែឡើងថ្លៃ នឹងជះឥទ្ធិពលដូចម្ដេចទៅលើថ្លៃទំនិញ លើទីផ្សារ?
ចន្លោះមិនឃើញ
និន្នាការតម្លៃប្រេងឥន្ធនៈនៅលើពិភពលោកកំពុងឡើងថ្លៃ ជាបន្តបន្ទាប់។ ចំណែកឯប្រទេសដែលនាំចូលប្រេងឥន្ធនៈពីទីផ្សារអន្តរជាតិ ក៏ត្រូវលក់បន្តក្នុងតម្លៃមួយ ទៅតាមការកើនឡើងនោះដែរ។ ជាក់ស្ដែងនៅកម្ពុជា បច្ចុប្បន្នតម្លៃប្រេងឥន្ធនៈកំពុងបន្តកើនឡើងជាលំដាប់។ តម្លៃប្រេងឥន្ធនៈកើនឡើង នោះនាំឲ្យតម្លៃទំនិញនៅលើទីផ្សារឡើងថ្លៃកាន់តែខ្ពស់ដូចគ្នា។
សាស្ត្រាចារ្យមុខវិជ្ជាសេដ្ឋកិច្ច ហាក់ សុខហៀង បង្រៀននៅសាកលវិទ្យាល័យឯកជនមួយកន្លែងបានពន្យល់លម្អិតពីបញ្ហា្នេះថា កាលណាសាំងឡើងថ្លៃនោះនាំឲ្យតម្លៃទំនិញមានការកើនឡើងដូចគ្នា តែមិនមែនហៅថា ជាអតិផរណានៅឡើយទេ។ មូលហេតុនេះ គឺរាល់ទំនិញទាំងអស់ពេលផលិតហើយត្រូវការដឹកជញ្ជូនពីកន្លែងមួយទៅកន្លែងមួយ ដោយប្រើយានយន្ត។ ដូច្នេះត្រូវការចំណាយថ្លៃសាំងទៅលើការដឹកជញ្ជូន បើសាំងថ្លៃ អ្នកផលិត ឬអ្នកលក់បន្តមិនអាចរក្សាតម្លៃទំនិញនៅដដែលបានទេ។
លោកបន្ថែមទៀតថា ចំណែកឯការផលិតទំនិញគឺត្រូវប្រើឧបករណ៍ គ្រឿងចក្រ ម៉ាស៊ីន ក្នុងសង្វាក់ផលិតកម្មរបស់ក្រុមហ៊ុន សហគ្រាស រោងចក្រ។ សង្វាក់ផលិតកម្មត្រូវការ ប្រើសាំង ឬហ្គាស ដើម្បីផលិតជាទំនិញផ្គត់ផ្គង់នៅលើទីផ្សារ។ អ្នកផលិតត្រូវបន្ថែមថ្លៃដើមលើការផលិតរបស់ខ្លួន ពោលគឺត្រូវចំណាយបន្ថែមលើថ្លៃសាំង។ ដូច្នេះការនាំចេញបន្តនឹងត្រូវបន្ថែមតម្លៃដូចគ្នា ទើបអាចរកប្រាក់ចំណេញបាន។
សាស្ត្រាចារ្យរូបនេះបន្តថា យ៉ាងណាក្ដីប្រសិនបើប្រេងឥន្ធនៈឡើងថ្លៃក្នុងកម្រិតមួយតិចតួច នោះតម្លៃទំនិញក៏កើនឡើងតិចតួច គឺជារឿងធម្មតាក្នុងទីផ្សារសេរី ព្រោះតម្លៃទំនិញមិនអាចនៅថេររហូតបានទេ។ ប៉ុន្តែបើប្រេងឥន្ធនៈឡើងថ្លៃដល់កម្រិតខ្ពស់ នោះប្រាកដជាមានការប្រែប្រួលតម្លៃទំនិញខ្លាំង ដែលហៅថា ជាអតិផរណា។
ក្នុងករណីមួយទៀត នៅពេលដែលសាំងអន្តរជាតិចុះថោកវិញ តែសាំងនៅប្រទេសខ្លះនៅតែថ្លៃ គឺអាចមកពីករណីឈ្មួញខិលខូចឆ្លៀតឱកាសក្នុងការយកចំណេញ ដោយពួកគេអាចយកលេសថា សាំងក្នុងស្តុកចាស់លក់មិនទាន់អស់។ មួយករណីទៀតឈ្មួញមួយចំនួនតូចនៅកម្ពុជា អាចនៅតែលក់សាំងថ្លៃ ដោយគិតទៅលើអត្រាប្ដូរប្រាក់។ មានន័យថា ពួកគេលក់ចេញគិតជាប្រាក់រៀល ប៉ុន្តែទូទាត់ឲ្យគេវិញ (ប្រទេសនាំចូល) ជាប្រាក់ដុល្លារ។ បើយកប្រាក់រៀលទៅដូរយកដុល្លារ ប្រាកដជាខាត។ ដូចនេះហើយមានតែលក់ក្នុងតម្លៃខ្ពស់ ទើបអាចស៊ីសងគ្នាបាន។
ចំពោះបញ្ហាតម្លៃប្រេងឥន្ធនៈឡើងថ្លៃនេះ ជាបញ្ហារបស់រដ្ឋាភិបាលនៅតាមបណ្ដាប្រទេសនានា ត្រូវតែចូលរួមអន្តរាគមន៍។ ដូចនៅកម្ពុជា ដើម្បីទប់ស្កាត់បញ្ហានេះ រដ្ឋាភិបាលបានចូលរួមក្នុងការកំណត់ថ្លៃ ឲ្យបណ្ដាស្ថានីយនានាទូទាំងប្រទេស ក្នុងការលក់ចេញ ដោយចូលរួមពីក្រសួងពាណិជ្ជកម្ម ក្រសួងសេដ្ឋកិច្ច និងក្រសួងរ៉ែ។ នេះជាដំណោះស្រាយមួយ ដើម្បីកុំឲ្យអ្នកផ្គត់ផ្គង់យកលេសថាសាំងអន្តរជាតិថ្លៃ ហើយកំណត់តម្លៃតាមតែចិត្តខ្លួនឯង។ នៅកម្ពុជា រដ្ឋាភិបាលកំណត់តម្លៃសាំងធ្វើឡើង១០ថ្ងៃម្ដង ឬ៣ដងក្នុង១ខែ។
ហើយសំណួរមួយទៀតសួរថា តើធ្វើយ៉ាងម៉េចទើបសាំងចុះថោកបាន គឺរដ្ឋាភិបាលមិនអាចដោះស្រាយបានទេ ដោយសារសាំងនៅលើទីផ្សារអន្តរជាតិឡើងថ្លៃដែរ។ ប៉ុន្តែរដ្ឋាភិបាលអាចមានដំណោះស្រាយមួយទៀត គឺ Subsidy (ឧបត្ថម្ភធន)។ មានន័យថា រដ្ឋាភិបាលអាចបង្កើតមូលនិធិប្រេងរបស់រដ្ឋដើម្បីទប់តម្លៃលក់រាយប្រេងឥន្ធនៈ កុំឲ្យកើនខ្លាំងតាមទីផ្សារអន្តរជាតិ។
ជាឧទាហរណ៍ជាក់ស្ដែង នៅប្រទេសថៃ រដ្ឋាភិបាល បានឧបត្ថម្ភធនជាសាច់ប្រាក់តម្លៃ ៣០ពាន់លានបាត (ប្រមាណ ៩៣៧លានដុល្លារអាមេរិក) នេះ នឹងអាចជួយកាត់បន្ថយថ្លៃលក់រាយប្រេងសាំង បាន ៥០% នៃតម្លៃដែលត្រូវកើនឡើង។ ប្រសិនបើថ្លៃលក់រាយត្រូវកើនឡើង ១បាតក្នុង១លីត្រ នោះវានឹងជួយកាត់បន្ថយ មកត្រឹមការឡើងថ្លៃ ០,៥បាតវិញ។
ជារួមនិន្នាការសាំងឡើងថ្លៃ គ្មានប្រទេសណាមួយគេចផុតនោះទេ។ លុះត្រាតែអាចផលិតប្រេងដោយខ្លួនឯងបាន។ ដូច្នេះហើយ មានតែរដ្ឋាភិបាល ជាអ្នកចូលរួមក្នុងការអន្តរាគមន៍ទៅតាមយុទ្ធសាស្ត្ររៀងខ្លួន ធ្វើយ៉ាងណាកុំឲ្យមានបញ្ហាអតិផរណាខ្លាំង នាំឲ្យប៉ះពាល់ដល់ជីវភាពរបស់ប្រជាជន៕