- 2018-05-24 04:52:49
- ចរាចរណ៍
មាន៤ចំណុចនេះទៀត ធានាថាឡានក្រុងស្រុកខ្មែរ ដឹងតែមិនចាញ់ស្រុកគេ
- 2018-05-24 04:52:49
- ចំនួនមតិ 0 | ចំនួនចែករំលែក 0
មាន៤ចំណុចនេះទៀត ធានាថាឡានក្រុងស្រុកខ្មែរ ដឹងតែមិនចាញ់ស្រុកគេ
ចន្លោះមិនឃើញ
ទន្ទឹមនឹងការគាំទ្រសេវាឡានក្រុងសាធារណៈ ពីប្រជាពលរដ្ឋគ្រប់ស្រទាប់វណ្ណៈ មានប្រជាពលរដ្ឋមួយចំនួនដែលនិយមធ្វើដំណើរទៅមកជាប្រចាំ បានលើកឡើងថា ៤ចំណុចនេះ គួរតែបន្ថែម និងកែសម្រួល ដើម្បីឲ្យសេវាមួយនេះ ល្អមិនចាញ់ស្រុកគេ។
អ្នកធ្លាប់ប្រើប្រាស់សេវាឡានក្រុងសាធារណៈ ប្រហែលជាធ្លាប់ជួបរឿងទាំងនេះ គឺករណីមិនបានត្រៀមលុយបង់សេវា១៥០០រៀល ការបើកបរមានល្បឿនលឿន ការបន្លំដាក់លុយមិនគ្រប់ និងការបន្ថែមខ្សែដឹកជញ្ជូនតាមផ្លូវតូចៗ ជាដើម។
លោកស្រី យក់ ថាណាក់ មុខរបរស្ត្រីមេផ្ទះ ដែលជិះឡានក្រុងទៅមករាល់ថ្ងៃជាមួយចៅប្រុសតូចអាយុប្រហែល៣ឆ្នាំ និយាយថា សេវារថយន្តក្រុងពិតជាល្អ ចំណាយតិចនិងមានសុវត្ថិភាព។ លោកស្រីបន្តថា មានចំណុច១ ដែលលោកស្រីចង់បានគឺ ការបន្ថែមខ្សែដឹកជញ្ជូនតាមផ្លូវតូចៗ ព្រោះកុំឲ្យពិបាករកអីជិះមកកាន់ផ្លូវធំ ជាក់ស្ដែងលោកស្រី គឺត្រូវជិះម៉ូតូ១តង់មកសិន រួចបានដឹកដៃចៅតូចឡើងឡានក្រុង។
ចំណែកលោកស្រី សាយ ជាបុគ្គលិកក្រុមហ៊ុន និយាយថាការសម្គាល់ពេលជិះឡានក្រុងរាល់ថ្ងៃ ឃើញថា អ្នកបើកបរឡានក្រុងខ្លះ គឺបើកលឿនមែន និងចាប់ហ្វ្រាំងកញ្ឆក់ៗ ពេលខ្លះចង់ពុលអ្នកជិះ ហើយអាចដួលអ្នកដំណើរ ដែលឈរតោងបង្កាន់ដៃលើឡានក្រុង។
ក្រៅពីសំណូមពរប្រជាពលរដ្ឋ អ្នកបើកបរឡានក្រុង១ខ្សែ សូមមិនបញ្ចេញឈ្មោះ ក៏មានសំណូមពរដូចគ្នា លោកថា សូមឲ្យប្រជាពលរដ្ឋ ត្រៀមលុយរាយ ១៥០០រៀល ឲ្យស្រេច មុនឡានមកដល់ កុំឲ្យពិបាកយឺតពេលអាប់លុយ និងនាំស្ទះគេឯងនៅលើឡានក្រុង។ ក្រៅពីនេះទៀត លោកបន្តថា ធ្លាប់មានអ្នកជិះខ្លះ បានបន្លំដាក់លុយមិនគ្រប់ និងអ្នកខ្លះដាក់លុយក្លែងក្លាយ លុយក្រដាសសែន ចូលធុងក៏មាន។
អ្នកបើកបរ ហួសចិត្តដែលមានបញ្ហានេះ ឆ្ងល់ហេតុអីអ្នកជិះដាក់លុយធំ? ដឹងអីក្រដាសលុយសែន ២០ដុល្លារសោះ! លោកថា នេះជាការផ្ដល់គំរូមិនល្អ ហើយការទទួលខុសត្រូវ គឺធ្លាក់លើអ្នកបើកបរ ត្រូវសងជំនួស។
សូមជម្រាបថា បច្ចុប្បន្នមានសេវារថយន្តក្រុងសាធារណៈនៅរាជធានីភ្នំពេញ ចំនួន៩ខ្សែ កំពុងដំណើរការ ក្រោមជំនួយឥតសំណង ពីរដ្ឋាភិបាលប្រទេសចិន។ នៅខែមិថុនា ខាងមុខនេះ រដ្ឋាភិបាលជប៉ុន នឹងផ្ដល់រថយន្តក្រុងឲ្យសាលារាជធានីភ្នំពេញ ចំនួន ១៤០គ្រឿង បន្ថែម ស្មើនឹងតម្លៃជាង ៨លានដុល្លារ ចាប់ពីឆ្នាំ២០១៨ ដល់ ២០២០។ ក្នុងជំហានទី១ រថយន្តក្រុងចំនួន ៨០គ្រឿង នឹងមកដល់រាជធានីភ្នំពេញ។