- 2018-05-24 05:58:48
- ចរាចរណ៍
ទស្សនពលរដ្ឋ៖ គេលែងជិះម៉ូតូកង់បីខ្មែរ ព្រោះទង្វើ ៤យ៉ាង
- 2018-05-24 05:58:48
- ចំនួនមតិ 0 | ចំនួនចែករំលែក 0
ទស្សនពលរដ្ឋ៖ គេលែងជិះម៉ូតូកង់បីខ្មែរ ព្រោះទង្វើ ៤យ៉ាង
ចន្លោះមិនឃើញ
ត្បិតថាអ្នករត់រ៉ឺម៉កកង់បីខ្មែរ កំពុងប្រឈមស្ថានភាពដាច់ភ្ញៀវបណ្ដើរៗ ដោយសារការវាយលុករបស់ម៉ូតូកង់បីបរទេសមកកម្ពុជា ប្រើប្រាស់បច្ចេកវិទ្យាដើម្បីទាញរកអតិថិជន ប៉ុន្តែពលរដ្ឋធ្លាប់ជិះម៉ូតូកង់បីខ្មែរមួយចំនួន លើកឡើងថា ប្រសិនអ្នករត់កង់បីខ្មែរ អាចផ្លាស់ប្ដូរនូវចំណុចសំខាន់ៗខ្លះចេញ មិនខ្វះភ្ញៀវដឹកនោះទេ។ ខាងក្រោមនេះ ជាទស្សនៈរបស់ពលរដ្ឋនៅភ្នំពេញ បានចែករំលែកដូចតទៅ៖
១. តម្លៃ
អ្នកមីង យក់ ឋានៈ រស់នៅបុរីវិមានភ្នំពេញ បានលើកឡើងថា បើហៅម៉ូតូកង់បីខ្មែរជិះម្ដងៗចំណាយមិនក្រោម១ម៉ឺនរៀលឡើយ ដល់ពេលសុំចុះថ្លៃ គាត់ថាសាំងថ្លៃ តែពេលសាំងថោក ក៏គាត់នៅតែទារថ្លៃដដែល។ ដូច្នេះ អ្នករត់ម៉ូតូកង់បីខ្មែរ គួរតែបន្ធូរបន្ថយតម្លៃបន្តិច ព្រោះបច្ចុប្បន្នសេវាដឹកជញ្ជូនធូរថ្លៃនៅភ្នំពេញមានច្រើន តួយ៉ាង ម៉ូតូឌុប ម៉ូតូឥណ្ឌា និងឡានក្រុងសាធារណៈជាដើម គេមានជម្រើសច្រើន ប្រសិនបើតម្លៃនៅតែខ្ពស់ មិនព្រមចុះឲ្យភ្ញៀវនោះ គ្មានពីណាគេហៅជិះទេ គេទៅជិះម៉ូតូឥណ្ឌាលឿនជាង ហើយមិនបាច់តច្រើន។
២. អត្តចរិក
ពលរដ្ឋមួយចំនួន លើកឡើងថា អ្នកបើកកង់បីខ្លះ មានល្បិច ដូចជាជិះវាងដើម្បីអាចយកថ្លៃកាន់តែខ្ពស់ ចំពោះភ្ញៀវមិនសូវស្គាល់ផ្លូវ។ បន្ថែមពីនេះ អ្នកបើកខ្លះ បានប្រើពាក្យមិនសមរម្យពេលភ្ញៀវតថ្លៃ ខ្លះមានជំលោះជាមួយភ្ញៀវទៀតផង។ ពេលមានការប៉ះពារជាមួយយានយន្តដទៃ សុទ្ធតែមានគ្នាហៅមកជួយ។
យ៉ាងណាមិញ រ៉ឺម៉កកង់បីខ្មែរ មានចំណុចពិសេសមួយ អាចអតិថិជនដែលមានឥវ៉ាន់ត្រូវដឹកឥវ៉ាន់ធ្ងន់ៗ ឬមានគ្នាច្រើនជាង រ៉ឺម៉កឥណ្ឌាដែលមិនអាចដឹកទំនិញច្រើនឬមនុស្សធំលើសពី ៣នាក់បានឡើយ។ អាជីវករនៅផ្សារធំថ្មី បងស្រី ភា រៀបរាប់ថា៖ "ពេលដឹកឥវ៉ាន់មកផ្សារម្ដងៗ ខ្ញុំមានពូកង់បីជួយដឹក និងលើកឥវ៉ាន់ឲ្យ ហើយគាត់មិនដែលដំឡើងថ្លៃទេ មានតែខ្ញុំឲ្យគាត់ថែម"។ អាជីវកររូបនេះ យល់ថា ប្រសិនបើ អ្នករត់កង់បីខ្មែរដទៃទៀត ចេះរក្សាម៉ូយ ហើយភ្ញៀវផ្សេងមកជិះ មិនដំឡើងថ្លៃតាមតែនឹកឃើញនោះ មិនខ្វះទេអតិថិជន។
៣. បើកឲ្យមានសណ្ដាប់ធ្នាប់
មតិពលរដ្ឋភាគច្រើន លើកឡើងថា អ្នកបើកបរម៉ូតូកង់បីខ្មែរខ្លះ ច្រងេងច្រងាង មិនសូវគោរពច្បាប់ទេ ពោលគឺបើកបំពានលើផ្លូវរបស់ម៉ូតូ ពេលខ្លះបើកបរដោយខ្វះការយោគយល់ទៀតផង ជាហេតុធ្វើឲ្យមានការកកស្ទះចរាចរណ៍។
យុវជន ប៊ុន រិទ្ធ និស្សិតនៅសាកលវិទ្យាល័យជាតិគ្រប់គ្រង បានឲ្យដឹងថា ៖ “ស្ទះផ្លូវមិនមែនមកពីគាត់(កង់បី)ទាំងអស់ទេ ប៉ុន្តែអ្វីដែលខ្ញុំសង្កេតឃើញ គឺពួកគាត់ភាគច្រើនមិនបានរៀនបច្ចេកទេសបើកបរឡើយ គឺបើកដូចម៉ូតូអញ្ចឹង។ ពេលខ្លះ គាត់ឃើញម៉ូតូរុលតាមផ្លូវចង្អៀតទៅមុខកើត គាត់ព្យាយាមរុលតាមរហូត ដល់ស្ទះពេញផ្លូវ ពេលខ្លះទៀត គឺបើកបររបស់គាត់មិនប្រកាន់ស្ដាំដៃឡើយគឺបើកបញ្ច្រាសផ្លូវដែល មានរបាំង ក៏មានដែរ ហើយភ្ញៀវជិះក្នុងហ្នឹង ក៏ខ្មាសគេជំនួសគាត់”។ លោក រិទ្ធ គិតថា ប្រសិនបើពួកគាត់ផ្លាស់ប្ដូរឥរិយាបថបើកបរឲ្យល្អជាងនេះ ប្រាកដជាមានការគាំទ្រជាងម៉ូតូឥណ្ឌា ព្រោះទាំងខ្មែរ និងជនបរទេសច្រើនដែរ ចូលចិត្តជិះម៉ូតូកង់បីខ្មែរ។
៤. ដើរឲ្យទាន់សម័យកាល
យុវជនដដែលខាងលើ បន្ថែមថា ប្រសិនបើពួកគាត់នៅតែបន្តប្រើប្រាស់កង់បី ដូចសព្វថ្ងៃទៀតនោះអាចនឹងត្រូវបោះបង់នៅថ្ងៃណាមួយជាមិនខាន ព្រោះមិនអាចប្រកួតប្រជែងជាមួយកង់បីឥណ្ឌា បានឡើយ។ រីឯអ្នកជ្រើសរើសជិះម៉ូតូឥណ្ឌា ដែលទើបមកថ្មី ព្រោះវាទំនើបទាន់សម័យជាង ម៉ូតូកង់បីខ្មែរផង ហើយតម្លៃអាចថោកជាងអ្នករត់កងបីខ្មែរបន្តិច ព្រោះម៉ូតូឥណ្ឌាដើរដោយកម្លាំងហ្គាស មិនមែនប្រើសាំងដូចម៉ូតូកង់បីខ្មែរឡើយ។ រីឯតម្លៃបានកំណត់ដោយក្រុមហ៊ុន ពោលគឺ១ គីឡូម៉ែត្រតម្លៃ ១ ២០០ រៀល ( ប៉ុន្តែមុននឹងគិតតម្លៃនេះ គេត្រូវគិតលុយ ៣ ០០០ រៀលជាមុនសិន ទើបចាប់គិតតម្លៃ១ គីឡូម៉ែត្រ ១ ២០០ រៀល )។
ហេតុនេះអ្នករត់កង់បីខ្មែរ គួរធ្វើតារាងចម្ងាយផ្លូវដល់ភ្ញៀវជ្រើសរើស និងកែច្នៃយានយន្តឲ្យមានលក្ខណៈល្អប្រសើរជាងនេះ ងាយស្រួលប្រើ មានសោភណភាពជាងនេះ ជាពិសេសកុំបើកទទឹងទទើស ព្រោះវាជាកត្តាមួយ ដែលនាំឱ្យសង្គមខ្មែរមិនពេញចិត្ត ។ ម្យ៉ាងទៀត អ្នករត់កង់បីខ្មែរ គួរតែសុំ និងឲ្យលេខទូរសព្ទទៅភ្ញៀវជាតិ-បរទេស គួររៀនភាសាបរទេសថែម និងចេះប្រើប្រាស់បណ្ដាញសង្គមផ្សេងៗ រួមមាន ហ្វេសបុក, Viber, Wechat, Lineជាដើម៕