- 2018-05-25 02:49:05
- សេដ្ឋកិច្ច
ចង់សង់ផ្ទះខ្លួនឯង បើចេះ៦ក្បាច់នេះ ដឹងតែអស់លុយតិចបំផុត
- 2018-05-25 02:49:05
- ចំនួនមតិ 0 | ចំនួនចែករំលែក 0
ចង់សង់ផ្ទះខ្លួនឯង បើចេះ៦ក្បាច់នេះ ដឹងតែអស់លុយតិចបំផុត
ចន្លោះមិនឃើញ
សម្រាប់អ្នកដែលមានជីវភាពកម្រិតមធ្យម ឬក្រោមមធ្យម ការសង់ផ្ទះគឺជាការចំណាយដ៏ធំបំផុត ហើយតែងរកវិធីសាស្ត្រយ៉ាងណាកុំឲ្យចំណាយលើសពីគម្រោង។ ដូច្នេះសូមមកស្រង់គន្លឺះល្អៗដូចខាងក្រោមនេះ ដើម្បីកាត់បន្ថយការចំណាយ ក្នុងពេលសង់ផ្ទះ៖
១. កុំឲ្យជាងទិញសម្ភារៈឲ្យ
លោក ស៊ីថា ជាជាងធ្វើផ្ទះម្នាក់ចែករំលែកថា ដើម្បីអាចកាត់បន្ថយការចំណាយសម្រាប់អ្នកជីវភាពកម្រិតមធ្យម គួរទិញសម្ភារៈ គ្រឿងសំណង់ដោយខ្លួនឯង។ នៅត្រង់ចំណុចនេះមានន័យថា អ្នកធ្វើផ្ទះមួយចំនួនតែងគិតថា ម៉ៅលើជាងទាំងស្រុងងាយស្រួលនិងចំណេញជាង ប៉ុន្តែនេះជាការគិតខុសហើយ។
ការទិញសម្ភារៈខ្លួនឯង មិនត្រឹមតែអាចសន្សំសំចៃថវិកាប៉ុណ្ណោះទេ ថែមទាំងអាចរើសគ្រឿងសំណង់បានតាមចិត្ត និងរឹងមាំជាងការម៉ៅការ។ ដើម្បីចំណេញបានច្រើន ជាងខ្លះបានប្រើគ្រឿងសំណង់អន់ៗ ដែលធ្វើឲ្យផ្ទះល្អមើលតែសម្បកក្រៅប៉ុណ្ណោះ។
២. ស្រាវជ្រាវតម្លៃ និងជាងដែលមានជំនាញច្បាស់លាស់
អតីតជាងសង់ផ្ទះខាងលើនេះ បន្តទៀតថា អ្នកខ្លះពេលសង់ផ្ទះធ្វើបែបប្រញាប់ប្រញាល់ មិនចំណាយពេលសាកសួររកជាងឱ្យបានត្រឹមត្រូវនោះទេ ជាហេតុនាំអោយក្រោយធ្វើផ្ទះរួចច្រើនមានចិត្តមិនជ្រះស្រឡះ។ រើសជាងខុសនាំឱ្យម្ចាស់ផ្ទះហត់ចិត្ត ហើយថែមទាំងអស់លុយច្រើនទៀត ព្រោះជាងធ្វើផ្ទះចេះមិនច្បាស់ ច្រើនធ្វើផ្ទះលក្ខណៈស្មានតាមការយល់ឃើញ។ ដូចនេះមុនសង់ផ្ទះគួរ ស្រាវជ្រាវរកជាងឱ្យបានត្រូវត្រូវ ទាំងតម្លៃ និងគុណភាព ជៀសវាងការខាតបង់។
៣. កុំខ្ជះខ្ជាយទៅលើសម្ភារៈ និងគ្រឿងសំណង់
មូលហេតុចម្បងមួយទៀតសម្រាប់អ្នកដែលធ្វើផ្ទះរួចច្រើនអស់លុយពីខ្លួន ឬពេលធ្វើផ្ទះដើរខ្ចីលុយគេបន្ថែមនោះ គឺដោយសារចំណាយលើសម្ភារៈ និងគ្រឿងសំណង់ច្រើនពេក។ សម្ភារៈដែលមានដូចជា ឥដ្ឋការ៉ូ ដំបូលផ្ទះ ទ្វារ បង្អួច ជាដើម មិនគួរយករបស់ដែលថ្លៃខ្ពស់ពេកនោះទេ អាចជ្រើសរើសត្រឹមតម្លៃល្មមៗគុណភាពអាចទទួលយកបានគឺគ្រប់គ្រាន់ហើយ។ សម្ភារៈខ្លះថ្លៃមែនពិត តែគុណភាពប្រហាក់ប្រហែលនឹងតម្លៃមធ្យមដែរ។
៤. ត្រួតពិនិត្យឱ្យជាប់លាប់ពេលសាងសង់
ពេលធ្វើផ្ទះគួរឱ្យសមាជិកក្នុងគ្រួសារណាម្នាក់ នៅចាំមើលខុសត្រូវចំពោះជាងដែលសាងសង់។ នេះមិនមែនមានន័យថាជាងមិនចេះធ្វើនោះទេ ប៉ុន្តែជាងខ្លះអាចមានគំនិតមិនល្អ យកសម្ភារៈ និងគ្រឿងសំណង់មួយចំនួនលាក់ទុក ហើយប្រាប់ម្ចាស់ផ្ទះថាខ្វះ ជាហេតុនាំឱ្យអស់លុយត្រូវទិញថែម។ ម្យ៉ាងទៀតការត្រួតពិនិត្យអោយបានត្រឹមត្រូវនេះ ជួយអោយដឹងថា មានអីខ្វះអី ហើយកុំអោយជាងប្រើប្រាស់គ្រឿងសំណង់ខ្ជះខ្ជាយ។
៥. កែច្នៃឱ្យអស់ពីលទ្ធភាព
ចំណុចនេះជួយឱ្យការចំណាយច្រើនពេលសង់ផ្ទះអាចកាត់បន្ថយ។ កែច្នៃអោយអស់លទ្ធភាពនេះ សំដៅទៅលើគ្រឿងសំណង់មួយចំនួនដែលនៅសល់កុំទុកចោល ដូចជាដែកដែលប្រើរួចអាចទុកចាក់គ្រឹះធ្វើអ្វីផ្សេងទៀត ថ្នាំពណ៌លាបផ្ទះដែលនៅសល់តិចៗជាប់ធុងកុំទុកចោល អាចយកមកលាយគ្នាលាបបង្កាន់ដៃជណ្ដើរបាន។ រឿងកំប៉ិកកំប៉ុកមែនប៉ុន្តែអាចជួយអោយចំណេញលុយមួយផ្នែកដែរ។
៦. កុំលេងម៉ូដខ្លាំងពេក
ការលេងម៉ូដផ្ទះខ្លាំងពេក មិនថាម៉ូដខាងក្នុង និងម៉ូតខាងក្រៅនោះទេគឺជាមូលហេតុធំធ្វើឱ្យអស់លុយច្រើនជាងគម្រោង។ ដូចនេះប្រសិនបើមិនចង់ចំណាយច្រើនគួរគូរប្លង់ផ្ទះឱ្យហើយ បន្ទាប់មកធ្វើតែទៅតាមប្លង់នោះបានហើយ កុំម្ដងបន្ថែមម៉ូដត្រង់នេះ ម្ដងថែមម៉ូដត្រង់នោះអី៕
