ស្វែងយល់ ៧ចំនុចនេះ ចង់ស្នើសុំកម្ចីទិញផ្ទះពីធនាគារលែងសូវពិបាកចិត្ត

2018-05-25 09:55:47
ព័ត៌មាន

2018-05-25 09:55:47
ចំនួនមតិ 0 | ចំនួនចែករំលែក 0

ចន្លោះមិនឃើញ

ឥណទានផ្ទះ គឺជាផលិតផលធនាគារដ៏លេចធ្លោ និងជោគជ័យមួយ សម្រាប់ធនាគារជាច្រើន ដោយសារតម្រូវការទីផ្សារកើនឡើងឥតឈប់ឈរ ក្នុងចំណោមអ្នកដែលត្រូវការផ្ទះផ្ទាល់ខ្លួន។

យ៉ាងណាមិញ មានពលរដ្ឋមួយចំនួននៅមានចម្ងល់ខ្លះៗ ពីឥណទានគេហដ្ឋាន ដូចជាដំណើរការស្នើសុំឥណទាន អត្ថប្រយោជន៍ និងលក្ខខណ្ឌតម្រូវជាដើម។ ដើម្បីយល់ដឹងកាន់តែច្បាស់ ថ្ងៃនេះ Sabay នឹងបង្ហាញបទសម្ភាសន៍ជាមួយលោកស្រី ហេង ធីតា នាយកសេវាកម្មហិរញ្ញវត្ថុបុគ្គល នៃធនាគារ ស៊ីអាយអិមប៊ី ភីអិលស៊ី (ធនាគារ CIMB) ដែលមានខ្លឹមសារដូចខាងក្រោម៖

១.អ្នករាយការណ៍៖ សូមជម្រាបសួរលោកស្រី ហេង ធីតា ដែលបានផ្តល់កិត្តិយស សម្រាប់ការផ្តល់បទសម្ភាសន៍នាពេលនេះ! ជាបឋម សូមលោកស្រីជួយពន្យល់ និងរៀបរាប់ដោយសង្ខេប អំពីឥណទានគេហដ្ឋាន!

លោកស្រី ធីតា៖ ចាស៎! បើនិយាយឲ្យសាមញ្ញទៅ ឥណទានគេហដ្ឋាន គឺជាផលិតផលធនាគារមួយប្រភេទ ដែលជួយឲ្យអតិថិជន ទទួលបានជំនួយហិរញ្ញវត្ថុជាមុន សម្រាប់យកទៅទិញលំនៅស្ថានណាមួយ ដោយមិនចាំបាច់រង់ចាំការសន្សំរាប់ឆ្នាំនោះឡើយ។ ឧទាហរណ៍ថា គូស្វាមីភរិយាថ្មីថ្មោងមួយគូចង់បានផ្ទះសមរម្យមួយ សម្រាប់កសាងអនាគតគ្រួសារ ប៉ុន្តែពួកគេគ្មានប្រាក់គ្រប់គ្រាន់ ដើម្បីទិញផ្ទះនោះភ្លាមៗ ដូច្នេះឥណទានគេហដ្ឋាន គឺជាដំណោះស្រាយហិរញ្ញវត្ថុដ៏វ័យឆ្លាតមួយ នៅក្នុងជីវិតគ្រួសាររបស់ពួកគេ នាដំណាក់កាលនេះ។ ក្រៅពីនេះ ឥណទានគេហដ្ឋានក៏ផ្តល់ឲ្យអតិថិជន ដើម្បីទិញផ្ទះបន្តពីគេ សម្រាប់ការវិនិយោគផងដែរ។

២.អ្នករាយការណ៍៖ តើធនាគារ CIMB មានចំណុចអ្វីពិសេស ក្នុងនាមជាធនាគារថ្នាក់តំបន់ឈានមុខគេមួយ ក្នុងការផ្តល់ឥណទានគេគេហដ្ឋាន ដល់អតិថិជន?

លោកស្រី ធីតា៖ ជាផ្នែកមួយរបស់ស៊ីអាយអិមប៊ី គ្រុប ដែលមានវត្តមាននៅជុំវិញតំបន់អាស៊ាន ធនាគារ CIMB បាននាំយកបទពិសោធន៍ជោគជ័យ ផ្នែកហិរញ្ញវត្ថុបុគ្គល ជាមួយនឹងផលិតផលឥណទាន ដែលកាន់តែមានភាពច្នៃប្រឌិតខ្ពស់ មកកាន់ប្រទេសកម្ពុជា។ យើងដឹងច្បាស់ថា អតិថិជនជារឿយៗបារម្ភពីកម្ចីរយៈពេលយូរ ហើយវាអាចចោទជាបញ្ហា ទៅដល់គ្រួសាររបស់ពួកគេ បើសិនជាមានរឿងអ្វីកើតឡើង ចំពោះពួកគេ ដែលជាបង្គោលគ្រួសារ។ ដូច្នេះហើយ ក្នុងឆ្នាំ២០១៧ ធនាគារ CIMB បានក្លាយជាធនាគារដំបូងគេតែមួយគត់ ដែលបានបង្កើតនូវឥណទានគេហដ្ឋានមួយប្រភេទ ភ្ជាប់មកជាមួយសេវាធានារ៉ាប់រងអាយុជីវិត ដោយឥតគិតថ្លៃ រហូតដល់ ៥ម៉ឺនដុល្លារ ដើម្បីការពារអនាគតគ្រួសារជាទីស្រឡាញ់របស់អតិថិជន។ មិនតែប៉ុណ្ណោះ HomePro របស់ធនាគារ CIMB មានផ្តល់ជូននូវអត្រាការប្រាក់ត្រឹមតែ ៧,៩៩% ក្នុងមួយឆ្នាំ ទំហំឥណទានរហូតដល់៨០% នៃតម្លៃគេហដ្ឋាន និងរយៈពេលឥណទានរហូតដល់ ២០ឆ្នាំទៀតផង។

៣.អ្នករាយការណ៍៖ តើចំនួនប្រាក់ខែប៉ុន្មានទើបសមរម្យ សម្រាប់ស្នើសុំឥណទានគេហដ្ឋាន?

លោកស្រី ធីតា៖ តាមពិតទៅ ពុំមានការកំណត់ជាក់លាក់ សម្រាប់ប្រាក់ចំណូល ឬប្រាក់ខែរបស់អ្នកស្នើសុំឥណទាននោះទេ។ ធនាគារ CIMB សូមណែនាំឲ្យអតិថិជនស្នើសុំឥណទាន ក្នុងទំហំសមស្របមួយ ផ្អែកលើប្រាក់ចំណូលជាក់ស្តែងរបស់ពួកគេ។ ឧទាហរណ៍៖ បើអតិថិជនត្រូវមានប្រាក់ចំណូល ឬប្រាក់ខែ ប្រហែល ៧រយដុល្លារ នោះពួកគេអាចស្នើសុំឥណទានគេហដ្ឋាន រហូតដល់៤ម៉ឺនដុល្លារ ដែលអាស្រ័យតាមការវាយតម្លៃ និងរយៈពេលនៃឥណទាននោះ។ ហើយបើពួកគេចង់បានទំហំឥណទានច្រើនជាងនេះ ពួកគេអាចរួមចំណូលគ្នាជាមួយដៃគូ និងសមាជិកគ្រួសារបាន។ ធនាគារ CIMB តែងតែស្វែងយល់ និងស្វែងរកដំណោះស្រាយហិរញ្ញវត្ថុសមរម្យណាមួយ ស្របតាមតម្រូវការរបស់អតិថិជនជានិច្ច។

៤.អ្នករាយការណ៍៖ តើអតិថិជនគួរយល់ដឹងលើចំណុចអ្វីខ្លះ មុននឹងសម្រេចចិត្តស្នើសុំឥណទាន?

លោកស្រី ធីតា៖ មុននឹងសម្រេចចិត្តស្នើសុំឥណទានគេហដ្ឋានពីធនាគារ អតិថិជនគួរដឹងច្បាស់ និងសិក្សាលម្អិត អំពីបន្ទុក និងដំណោះស្រាយហិរញ្ញវត្ថុ ក្រោយពេលទទួលយកឥណទានរយៈពេលយូរនោះ។ ជាមួយគ្នានេះ ពួកគេត្រូវមានប្រាក់ចំណូលគ្រប់គ្រាន់ និងទៀងទាត់ ព្រោះពួកគេត្រូវសងត្រឡប់ប្រចាំខែ ទៅធនាគារវិញ ក្នុងរយៈ១០ ទៅ២០ឆ្នាំ។ ហើយអតិថិជនក៏គួរពិចារណាឲ្យបានច្បាស់លាស់ អំពីទីតាំងនៃគេហដ្ឋាន ដែលពួកគេចង់ស្នើសុំឥណទានដើម្បីទិញនោះ។ បើអតិថិជនជ្រើសរើសផ្ទះត្រឹមត្រូវ ដែលមានទីតាំងល្អ នោះពួកគេនឹងទទួលបានផលចំណេញ នាពេលអនាគតផងដែរ។ យ៉ាងណាមិញ អតិថិជនមិនគួរពាក់ព័ន្ធនឹងការរកស៊ីលើអចលនទ្រព្យ ដែលគិតថាចំណេញមួយឆាវៗឡើយ ព្រោះវាអាចមានហានិភ័យខ្ពស់ ដល់ពួកគេ។

៥.អ្នករាយការណ៍៖ តើអតិថិជនត្រូវរៀបចំនូវឯកសារតម្រូវអ្វីខ្លះ សម្រាប់ការស្នើសុំឥណទាន?

លោកស្រី ធីតា៖ ដើម្បីស្នើសុំឥណទានគេហដ្ឋាន ធនាគារតម្រូវឲ្យអតិថិជនផ្តល់នូវឯកសារសំខាន់ៗមួយចំនួន ដូចជាអត្តសញ្ញាណប័ណ្ណ ឬលិខិតបញ្ជាក់អត្តសញ្ញាណ ដែលចេញដោយអាជ្ញាធរមានសមត្ថកិច្ច | កិច្ចព្រមព្រៀងស្តីពីការលក់ និងទិញអចលនទ្រព្យនោះ ព្រមទាំងលិខិតបញ្ជាក់ពីចំណូល រួមមានលិខិតបញ្ជាក់ពីការងារ បង្កាន់ដៃប្រាក់ខែ របាយការណ៍ធនាគារ និងឯកសារពាក់ព័ន្ធផ្សេងទៀតជាដើម។ ដើម្បីអាចឲ្យធនាគារដំណើរការពាក្យស្នើសុំឥណទានគេហដ្ឋានឆាប់រហ័ស យើងលើកទឹកចិត្តឲ្យអតិថិជន រៀបចំឯកសារតម្រូវទាំងអស់នោះ ទុកជាមុន។

៦.អ្នករាយការណ៍៖ មុននឹងសម្រេចអនុម័តឥណទាន ទៅឲ្យអតិថិជន តើធនាគារសិក្សាលើកត្តាសំខាន់ៗអ្វីខ្លះ?

លោកស្រី ធីតា៖ ជាគោលការណ៍ ធនាគារនឹងសិក្សាលើចំណុចចម្បងៗ រួមមាន៖ ទី១ គឺធនាគារនឹងសិក្សា ដោយវាយតម្លៃលើលទ្ធភាពសងត្រឡប់របស់អតិថិជន ទៅតាមទំហំឥណទាន ដែលពួកគេស្នើសុំនោះ ដើម្បីធានាថា ចំណូលរបស់ពួកគេមាននិរន្តភាព ដែលអាចទូទាត់នឹងការសងឥណទានប្រចាំខែបាន។ ឧទាហរណ៍ បើអតិថិជនត្រូវសងត្រឡប់ទៅធនាគារ ៤០០ដុល្លារក្នុងមួយខែ នោះគាត់ត្រូវមានចំណូល ឬប្រាក់ខែយ៉ាងតិច ៨០០ដុល្លារក្នុងមួយខែ។

ទី២ គឺធនាគារត្រូវពិចារណាលើគោលបំណងនៃសំណើឥណទានគេហដ្ឋាននោះ។ គោលបំណងឥណទានគេហដ្ឋាន ដែលអតិថិជនអាចស្នើសុំបាន គឺរួមមានការទិញគេហដ្ឋានដែលសង់រួចស្រាប់ ទិញដីសម្រាប់សាងសង់គេហដ្ឋានដោយខ្លួនឯង និងទិញខុនដូជាដើម។

ទី៣ គឺធនាគារនឹងវាយតម្លៃលើទ្រព្យធានារបស់អតិថិជន។ ជាទូទៅ ប្លង់រឹងនៃផ្ទះដែលស្នើសុំឥណទានទិញនោះ នឹងក្លាយជាទ្រព្យធានា។ ប៉ុន្តែបើអតិថិជនស្នើសុំឥណទាន ហើយទិញផ្ទះណាដែលមានប្លង់ទន់ នោះពួកគេត្រូវមានប្លង់រឹងផ្ទះណាផ្សេងមកដាក់ជំនួសបាន។ យ៉ាងណាមិញ បើអតិថិជនស្នើសុំឥណទានពីបុរីដៃគូរបស់ធនាគារ CIMB ដូចជាបុរីប៉េង ហួត និងបុរីជីប ម៉ុង នោះធនាគារអាចទទួលយកប្លង់ប្លង់ទន់សិនបាន។

៧.អ្នករាយការណ៍៖ ជាចុងក្រោយ តើលោកស្រីមានជាមតិយោបល់ ឬមតិផ្តាំផ្ញើអ្វីខ្លះ ដល់សាធារណជន អំពីឥណទានគេហដ្ឋាន?

លោកស្រី ធីតា៖ ជាការពិតណាស់ ការទិញផ្ទះគឺជាការប្តេជ្ញាចិត្តផ្នែកហិរញ្ញវត្ថុដ៏ធំធេងមួយ នៅក្នុងជីវិតរបស់យើង។ ដូច្នេះយើងត្រូវគិតគូឲ្យបានច្បាស់លាស់ ទៅលើទីតាំង តម្លៃ លក្ខណៈសម្បត្តិ និងផលចំណេញនាពេលអនាគតជាដើម មុននឹងសម្រេចចិត្តទិញផ្ទះណាមួយ។ ហើយឥណទានគេហដ្ឋាន គឺជាជំនួយហិរញ្ញវត្ថុដ៏សំខាន់មួយ ដើម្បីបង្គ្រប់ប្រាក់ទិញផ្ទះ ដែលយើងស្រឡាញ់បានឆាប់រហ័ស ជាជាងចំណាយពេលយូរឆ្នាំ ដើម្បីសន្សំប្រាក់គ្រប់ទិញផ្ទះនោះ។ ដូច្នេះយើងត្រូវស្វែងរកធនាគារដៃគូដ៏គួរឲ្យទុកចិត្តមួយ ដើម្បីធ្វើការសម្រេចចិត្តហិរញ្ញវត្ថុដ៏ត្រឹមត្រូវមួយ សម្រាប់ខ្លួនឯង និងគ្រួសារជាទីស្រឡាញ់។ ជាមួយគ្នានេះ ធនាគារ CIMB មានក្តីសោមនស្សរីករាយ ក្នុងការផ្តល់នូវការប្រឹក្សាយោបល់ និងស្វែងរកដំណោះស្រាយល្អបំផុតមួយ សម្រាប់លោកអ្នក។

សម្រាប់ព័ត៌មានបន្ថែម សូមទំនាក់ទំនងមកកាន់៖

លោក ស្រេង ភារុណ ផ្នែកទីផ្សារ និងទំនាក់ទំនង ធនាគារ ស៊ីអាយអិមប៊ី ភីអិលស៊ី
ទូរសព្ទ៖ (+៨៥៥)៩២ ៩៥៧ ៤៥៥
អ៊ីមែល៖ phearun.sreng@cimb.com.kh

ដោយ៖ ថា ម៉ាលីដា

មតិយោបល់

ជីវិតនិងសង្គម

ភ្ជាប់ទំនាក់ទំនងជាមួយ ជីវិតនិងសង្គម

ពាក្យទាក់ទង