ហេតុផលនេះ បញ្ជាក់ថា កូរ៉េល្បីខាងកែសម្ផស្សខ្លាំង តែនិយម Brand មិនមែនឡេលាយ

2018-06-15 08:34:43
សុខភាព

2018-06-15 08:34:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ទោះបីកូរ៉េខាងត្បូង ជាប្រទេសរីកចម្រើន និងល្បីឈ្មោះលំដាប់ពិភពលោក ខាងផ្នែកកែសម្ផស្សច្រើនក៏ពិតមែន ប៉ុន្តែជនជាតិនេះ១ភាគធំ ប្រើតែរបស់ Brand មានស្តង់ដារត្រឹមត្រូវ។ នេះបើតាមនិស្សិតខ្មែរ១រូប ដែលកំពុងសិក្សានៅសាលាពេទ្យល្បីឈ្មោះ១ នៃសាធារណរដ្ឋកូរ៉េខាងត្បូង។

ក្រៅពីជីវភាពប្រជាជនធូរធារ នៅមានហេតុផលផ្សេងទៀត ដែលជំរុញឲ្យជនជាតិនេះ ប្រើតែផលិតផលស្របច្បាប់។

ប្រទេសនេះ មានលេខរៀងទី៨ ក្នុងពិភពលោក ផ្នែកផ្គត់ផ្គង់គ្រឿងសម្អាង។ បើនិយាយពីគ្រឿងសម្អាងនៅទីនេះមានច្រើនទៅតាមក្រុមហ៊ុនសម្រាប់នាំចេញ និងចែកចាយក្នុងប្រទេស លើផលិតផលរាប់ពាន់ប្រភេទ ខុសៗគ្នា។

តំបន់ Myeongdong ល្បីខាងលក់គ្រឿងសម្អាង

លោក ពុធ សៅ ជានិស្សិតខ្មែរថ្នាក់បណ្ឌិត ផ្នែកស្រាវជ្រាវវ៉ាក់សាំង នៅសកលវិទ្យាល័យ Chonnam National University National Medical ក្នុងទីក្រុងខ្វាងជូរ នៃសាធារណរដ្ឋកូរ៉េខាងត្បូង ដែលគេស្គាល់ថាជាសាលាពេទ្យល្បីឈ្មោះ និងមានដៃគូសកលវិទ្យាល័យ ប្រមាណជា ១៥២ប្រទេស ក្នុងពិភពលោក។

លោកបានប្រាប់ Sabay ថា ប្រជាជនកូរ៉េអាចនិយាយបានថា មានចំណេះដឹងខ្ពស់ យល់ដឹងពីសុខភាព និងផលប៉ះពាល់នៃផលិតផលក្លែងក្លាយ។ ម្យ៉ាងប្រជាជនភាគច្រើន មានលទ្ធភាពប្រើប្រាស់របស់ ប្រេនៗ តែក៏មិនមែនប្រើគ្រប់ៗគ្នាដែរ។

ទាក់ទងនឹងរឿងឡេលាយនៅទីនេះ លោកសុំមិនមានយោបល់ ព្រោះជាបទពិសោធតាំងពីពេលមកស្នាក់នៅ និងសិក្សានៅប្រទេសនេះរាប់ឆ្នាំហើយ លោកមិនដែលឃើញគេលក់ឡេលាយទេ។

និស្សិតខ្មែររូបនេះបន្តថា ទាក់ទិននឹងច្បាប់អាជីវកម្មក៏អាចជាកត្តាគួបផ្សំ លោកបញ្ជាក់ថា លោកមិនដឹងច្បាស់ទេថាច្បាប់អាជីវកម្មស្រុកគេតឹងរឹងប៉ុណ្ណា ប៉ុន្តែអ្វីដែលបានដឹង គឺស្ទើរគ្រប់ផលិតផលរបស់ប្រើប្រាស់មិនថាតែគ្រឿងសម្អាងទេ គឺមានការគ្រប់គ្រងច្បាស់ ជាហេតុធ្វើឲ្យអ្នកប្រើមានទំនុកចិត្តខ្ពស់។

និស្សិតខ្មែរខាងលើ បានចូលទៅដល់ហាងលក់ផលិតផលគ្រឿងសម្អាងល្បីឈ្មោះ និងជាផលិតផលធំជាងគេ១ នៅតំបន់ហ្វាសុន ទីក្រុងក្វាងជូ សាធារណរដ្ឋកូរ៉េខាងត្បូង។ ផលិតផលនេះឈ្មោះថា Innisfree មានប្រភពមកពីកោះជេជូ។ សូមទស្សនាកម្រងរូបភាពទាំងអស់គ្នា។