- 2018-06-15 10:14:21
- សេដ្ឋកិច្ច
របរជាងចម្លាក់មានទីផ្សារ តែខ្វះអ្នកមានចិត្តចង់ធ្វើ
- 2018-06-15 10:14:21
- ចំនួនមតិ 0 | ចំនួនចែករំលែក 0
របរជាងចម្លាក់មានទីផ្សារ តែខ្វះអ្នកមានចិត្តចង់ធ្វើ
ចន្លោះមិនឃើញ
បច្ចុប្បន្នស្នាដៃចម្លាក់របស់ខ្មែរកំពុងតែមានទីផ្សារ ពោលគឺមានការពេញចិត្តច្រើនពីសំណាក់អតិថិជនជាតិនិងអន្ដរជាតិ។ របរជាជាងចម្លាក់ថ្វីបើត្រូវចំណាយពេលជាមួយដែកដាប់និងព្រលៀកដើម្បីច្នៃដុំឈើឬផ្ទាំងថ្ម ឲ្យចេញជារូបផ្សេងៗក្ដី ក៏ប៉ុន្ដែរបរនេះបានផ្ដល់ចំណូលសម្រាប់ទ្រទ្រង់ជីវភាពប្រចាំថ្ងៃ និងជាការជួយថែរក្សាកេរមរតកដូនតាផងដែរ។
ទោះជាយ៉ាងនេះក្ដី បើតាមម្ចាស់សិប្បកម្មចម្លាក់មួយរូបបានឲ្យដឹងថា យុវជនជំនាន់ក្រោយភាគច្រើនហាក់ខ្វះភាពតស៊ូអត់ធ្មត់ក្នុងការចាប់យកមុខជំនាញនេះទៅវិញ។
លោក តួ ដារ៉ា ម្ចាស់សិប្បកម្មចម្លាក់បន្ទាយស្រី២ មានទីតាំងនៅកណ្ដាលក្រុងសៀមរាប ខេត្តសៀមរាបបានឲ្យដឹងថា បច្ចុប្បន្នទាំងសិប្បកម្មរបស់លោកក៏ដូចជាបណ្ដាសិប្បកម្មចម្លាក់ដទៃទៀត កំពុងជួបប្រទះនឹងបញ្ហាកង្វះជាងចម្លាក់ដូចៗគ្នា។ លោកឲ្យដឹងថា ជាទូទៅសម្រាប់ជាងចម្លាក់ដែលមានជំនាញស្រាប់ សិប្បកម្មរបស់លោកផ្ដល់ប្រាក់ខែជាមធ្យមចន្លោះពី ៩០ម៉ឺនរៀល ដល់១លានរៀលរួមជាមួយការអាហារ បីពេលក្នុងមួយថ្ងៃ។ ដោយឡែកសម្រាប់អ្នកមានស្នាដៃល្អ គឺអាចទទួលប្រាក់ខែខ្ពស់ជាងនេះបន្ថែមទៀត។
ទោះជាយ៉ាងនេះក្ដីលោកថាយុវជនភាគច្រើនហាក់ដូចមិនសូវតស៊ូក្នុងការចាប់យកជំនាញនេះទៅវិញ ដោយថាយុវជនខ្លះមិនចូលចិត្តការងារនៅមួយកន្លែងបែបនេះ។ លោកបញ្ជាក់ថា៖ «ពីមុនមករៀនឆ្លាក់ ជាងម្នាក់ៗមិនមានប្រាក់ខែផងហើយមានតែយកអង្ករពីផ្ទះមកហូបដើម្បីបានរៀន តែឥឡូវយើងមានទាំងប្រាក់ខែ និងអាហារហូបចុកឲ្យហើយនៅតែខ្វះអ្នករៀនជំនាញចម្លាក់នេះទៀត។ យុវជនបច្ចុប្បន្នហាក់ដូចជាគ្មានភាពតស៊ូនឹងចាប់យកជំនាញនេះ ទោះជាវាមានតម្លៃក៏ដោយ...គេទំនងមិនចូលចិត្តការងារនៅមួយកន្លែង»។ លោក ដារ៉ា ឲ្យដឹងបន្ថែមថា បច្ចុប្បន្នសិប្បកម្មរបស់លោកមានជាងឆ្លាក់សរុបចំនួន ១៥នាក់ ប៉ុន្ដែលោកថាត្រូវការជាងប្រមាណ១០នាក់បន្ថែមទៀត ដើម្បីឆ្លើយតបទៅនឹងតម្រូវការរបស់អតិថិជន។
សម្រាប់លោក ស៊ីណា ជាងចម្លាក់ផ្នែកឈើ បានឲ្យដឹងថា ក្នុងមួយខែលោករកចំណូលពីការប្រកបរបរចម្លាក់បានចន្លោះ ២៥០ដុល្លារ ទៅ៣០០ដុល្លារអាមេរិក។ លោកថាលោកពេញចិត្តទៅនឹងការងារនេះ ដែលថាអ្វីដែលលោកធ្វើបាន គឺបង្ហាញពីតម្លៃនៃស្នាដៃរបស់លោកពិត កើតចេញពីចិត្តស្រឡាញ់ និងការខិតខំប្រឹងប្រែង។
ងាកមកជាងចម្លាក់ថ្មមានបទពិសោធន៍ជាង១០ឆ្នាំ លោក តួ ដារ៉ា វិញ ឲ្យដឹងថាមុខរបរនេះបានធ្វើឲ្យលោកមានជីវភាពធូរធារជាងមុន។ ម្ចាស់សិប្បកម្មចម្លាក់រូបនេះបញ្ជាក់បន្ថែមថាក្រៅពីផ្ដល់ចំណូលសម្រាប់ផ្គត់ផ្គង់ជីវភាព ការចាប់យករបរជាជាងចម្លាក់ក៏ជាកាតព្វកិច្ចក្នុងនាមជាកូនចៅជំនាន់ក្រោយដើម្បីបន្ដវេនថែរក្សាកេរមរតកដ៏អស្ចារ្យរបស់ដូនតាខ្មែរផងដែរ៕
