- 2018-06-20 14:16:04
- ព័ត៌មាន
ចិនសោកស្ដាយដែលអាមេរិកចាកចេញពីក្រុមប្រឹក្សាសិទ្ធិមនុស្ស UN
- 2018-06-20 14:16:04
- ចំនួនមតិ 0 | ចំនួនចែករំលែក 0
ចិនសោកស្ដាយដែលអាមេរិកចាកចេញពីក្រុមប្រឹក្សាសិទ្ធិមនុស្ស UN
ចន្លោះមិនឃើញ
ក្រសួងការបរទេសចិន ក្នុងថ្ងៃពុធនេះ បានបង្ហាញការសោកស្ដាយទៅលើសេចក្ដីសម្រេចរបស់សហរដ្ឋអាមេរិកក្នុងការដកខ្លួនចេញពីក្រុមប្រឹក្សាសិទ្ធិមនុស្សអង្គការសហប្រជាជាតិ។
កាលពីម្សិលមិញ សហរដ្ឋអាមេរិកបានសម្រេចដកខ្លួនចេញពីស្ថាប័នសិទ្ធិមនុស្សមួយនេះ ក្រោមហេតុផលថា ស្ថាប័នមាននិន្នាការប្រឆាំងប្រទេសអ៊ីស្រាអែល និងកង្វះកំណែទម្រង់។
ក្នុងថ្ងៃនេះ អ្នកនាំពាក្យក្រសួងការបរទេសចិន លោក Geng Shuang បានឲ្យដឹងថា ចិនសោកស្ដាយចំពោះការសម្រេចរបស់សហរដ្ឋអាមេរិក។ លោកបានបន្តថាក្រុមប្រឹក្សាសិទ្ធិមនុស្សត្រូវបានបង្កើតឡើងដើម្បីធ្វើជាវេទិកាមួយសម្រាប់ភាគីផ្សេងៗចូលរួមធ្វើការសន្ទនា សហប្រតិបត្តិការ ផ្លាស់ប្ដូរយោបល់ និងលើកកម្ពស់ការអភិវឌ្ឍសិទ្ធិមនុស្ស។ លោកបានអំពាវនាវឲ្យភាគីទាំងអស់យកចិត្តទុកដាក់លើស្ថាប័ននេះ។
លោក Geng Shuang បានបន្ត៖ "ចិនបន្តលើកកម្ពស់ និងប្ដេជ្ញាក្នុងការប្រកាន់ខ្ជាប់គោលការណ៍ពហុភាគីនិយម (Multilateralism) ព្រមទាំងគាំទ្រយន្តការនៃក្រុមប្រឹក្សាសិទ្ធិមនុស្ស"។
អ្នកនាំពាក្យរូបនេះ បានគូសបញ្ជាក់ថា ចិននឹងបន្តលើកកម្ពស់ និងការពារសិទ្ធិមនុស្សទូទាំងសាកលលោក ហើយបន្តធ្វើការជាមួយភាគីដទៃទៀតតាមរយៈកិច្ចសន្ទនា និងសហប្រតិបត្តិការដែលមានលក្ខណៈ"ស្ថាបនា"។
សូមបញ្ជាក់ផងដែរ តាំងពីអាមេរិកស្ថិតក្រោមការដឹកនាំរបស់លោកប្រធានាធិបតី ដូណាល់ ត្រាំ កាលពីឆ្នាំ ២០១៧ មក រដ្ឋបាលរបស់លោកបានធ្វើការដកខ្លួនចេញពី កិច្ចព្រមព្រៀងអាកាសធាតុ កិច្ចព្រមព្រៀង Trans-Pacific Partnerhsipកិច្ចព្រមព្រៀងអ៊ីរ៉ង់ អង្គការ UNESCO និងចុងក្រោយនេះគឺក្រុមប្រឹក្សាសិទ្ធិមនុស្សអង្គការសហប្រជាជាតិ៕
