JICA ត្រៀមជួយ ២៧លានដុល្លារ ស្តារតំបន់លិចទឹកខ្លាំងជាងគេនៅភ្នំពេញ

2018-06-27 09:54:12
ចរាចរណ៍

2018-06-27 09:54:12
ចំនួនមតិ 0 | ចំនួនចែករំលែក 0

ចន្លោះមិនឃើញ

យោងតាមការបង្ហើបរបស់លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូន រាជធានីភ្នំពេញ បានបញ្ជាក់ក្នុងសន្និសីទសារព័ត៌មានថ្មីៗនេះ ទីភ្នាក់ងារ JICA របស់ជប៉ុនបានផ្ដល់ជំនួយឲ្យកម្ពុជាប្រមាណ ២៧លានដុល្លារ ដើម្បីស្ដារតំបន់ចំនួនពីរដែលលិចទឹកខ្លាំងជាងគេនៅរាជធានីភ្នំពេញ។

លោក សាំ ពិសិដ្ឋ មានប្រសាសន៍ថា យើងកំពុងត្រៀមដោះស្រាយតំបន់ប្រឈមនឹងទឹកលិចធ្ងន់ធ្ងរ តួយ៉ាងផ្លូវ៤៧ ឆ្ពោះទៅផ្លូវស៊ីសុវត្ថិ តំបន់ខាងជើងវត្តភ្នំ និងផ្សារមាន់អាំង។ JICA ត្រៀមទម្លាក់កញ្ចប់លុយ ២៧លានដុល្លារ នៅចុងឆ្នាំនេះ ហើយយើងនឹងចាប់ផ្ដើមប្រតិបត្តិការដាក់លូធំៗនៅតំបន់ដូចរៀបរាប់ រួមទាំងសាងសង់ស្ថានីយបូមទឹក និងអាងស្តុកទឹក អាចស្តុកទឹកចំនួន ៥ពាន់ម៉ែត្រគីប ដែលមានទីតាំងនៅក្បែរទីស្ដីការក្រុមប្រឹក្សាអភិវឌ្ឍន៍កម្ពុជា (CDC)។

លោក សាំ ពិសិដ្ឋ

លោកថា ក្នុងរយៈពេល០២ ចាប់ពី២៥ -២៦ មិថុនានេះ យើងសង្កេតឃើញមានការលិចលង់យ៉ាងគំហុកដោយសារភ្លៀងធ្លាក់។ មូលហេតុចម្បងដែលធ្វើឲ្យមានការលិចលង់ធ្ងន់ធ្ងរបណ្តាលមកពី បញ្ហាសំរាម បញ្ហាខ្វះអណ្តូងលូ និងការបិទមាត់អណ្តូងលូឲ្យនៅតូចជាដើម។

ដើម្បីសម្រាលដល់ការលិចលង់ជំនន់ទឹកភ្លៀងឆ្នាំនេះ ប្រធានមន្ទីរសាធារណការ ខាងលើ ក៏បានស្នើដល់ប្រជាពលរដ្ឋឲ្យបើកអណ្តូងលូ និងរាយការណ៍មកអាជ្ញាធរ ពិសេសអ្នកបិទមាត់លូផ្ទាល់ សូមឲ្យបើកពេលមានទឹកជន់។

គួរជម្រាបថា តំបន់ដែលលិចខ្លាំងផ្សេងទៀតនោះ ដូចជានៅកម្ពុជាក្រោម ផ្សារដេប៉ូ ផ្សារកណ្ដាល ប៉ុន្តែតំបន់ទាំងនេះ សង្កេតឃើញឲទឹកលិចលឿន ហើយស្រកក៏លឿនផងដែរ។ នេះបើតាមប្រសាសន៍របស់លោក សាំ ពិសិដ្ឋ។

សូមទស្សនាវីដេអូលម្អិត៖

អត្ថបទ៖ ស៊ិន សាវ៉េត