ការឈឺចាប់ខ្លាំងបំផុត៦យ៉ាងរបស់ប្រពន្ធ ពេលដឹងថាប្ដីកំពុងក្បត់ផិត តែខំមកធ្វើល្អយកមុខ

2018-06-29 07:19:53
ស្នេហា

2018-06-29 07:19:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ផ្កាមួយទងអាចរីកលូតលាស់បានល្អអាស្រ័យដោយទឹកសន្សើម និងពន្លឺព្រះអាទិត្យ តែវានឹងក្រៀមស្វិតបើគ្មានទឹកប្រោះព្រំ និងពេលដែលព្រះអាទិត្យលិចទៅវិញ។ មិនខុសអីពីជីវិតស្ត្រីជាភរិយា អាចមានស្នាមញញឹម និងភាពកក់ក្ដៅ ព្រោះការប្រោសប្រណីថ្នាក់ថ្នមពីស្វាមី តែពេលដែលចិត្តប្ដីបែកឆ្វេងនាងប្រៀបដូចជាផ្កាកំពុងរោះរាយ ទោះត្រូវទឹកវិញយ៉ាងណាក៏មិនអាចដូចដើមឡើយ។ តទៅនេះជាភាពឈឺចាប់ខ្លាំងបំផុតទាំង៦យ៉ាងរបស់នាង ក្រោយដឹងថាប្ដីក្បត់ចិត្តមានថ្មី៖

រូបតំណាង

១. ខកចិត្តខ្លាំងបំផុតលើមនុស្សដែលនាងជ្រើសរើស

បុរសចុងក្រោយដែលនាងជ្រើសរើស កាន់ដៃចូលរោងការ គឺមនុស្សតែម្នាក់គត់ដែលនាងព្រមផ្ញើវាសនា ហើយជឿជាក់បុរសម្នាក់នេះ នឹងមិនធ្វើឲ្យនាងឈឺចាប់។ តែបើថ្ងៃណាមួយនាងដឹងថា មនុស្សដែលនាងជឿជាក់បំផុតកំពុងក្បត់នាង គឺធ្វើឲ្យនាងខកចិត្តខ្លាំងបំផុត បាត់បង់ជំនឿចិត្ត ស្ដាយចិត្តស្មោះដែលនាងលះបង់ចំមនុស្សខុស។ ចិត្តដែលនាងជឿជាក់ ប្រែបាត់បង់អស់ទាំងស្រុង មិនគួរណាមនុស្សដែលនាងតែងយល់ថា ជាមនុស្សដ៏ល្អបំផុតសម្រាប់នាង កំពុងមកបំផ្លាញបេះដូងនាង។

២. ក្ដីសុខសុភមង្គលដែលនាងធ្លាប់គិតថាទទួលបានដោយស្មោះពីប្ដី ត្រូវរលាយដូចអំបិលត្រូវទឹក

កន្លងមកនាងរួមរស់ជាមួយបុរសជាទីស្រលាញ់របស់នាងដោយភាពកក់ក្ដៅ គ្មានចិត្តមន្ទិលសង្ស័យ ហើយជាក្ដីសុខដ៏ពិតប្រាកដដែលនាងទទួលបាន។ តែតាំងពីថ្ងៃដែលនាង បានដឹងថាបុរសជាទីស្រលាញ់កំពុងលួចលាក់ក្បត់មានថ្មី ក្ដីសុខ សុភមង្គល ដែលនាងគិតថាចេញពីបេះដូងដ៏ពិតប្រាកដត្រូវរលាយសាបសូន្យអស់ហើយ។ មិនថា ប្ដីខំកែខ្លួន និយាយពាក្យលួងលោម១០០០ប្រយោគទៀត ក៏មិនអាចព្យាបាលរបួសបេះដូងនាងបានឡើយ ព្រោះនាងយល់ថាក្នុងចិត្តបុរសដែលនាងស្រលាញ់ មិនមែនមានតែនាងទេ គឺចិត្តនោះបានបែងចែកឲ្យអ្នកផ្សេងបាត់ទៅហើយ។ នាងយល់ថា ក្ដីស្រលាញ់ដែលស្វាមីកំពុងបង្ហាញមកលើនាង គឺជាការសម្ដែងដើម្បីលាំងបាំងនូវចិត្តដែលកំពុងក្បត់តែប៉ុណ្ណោះ។

៣. នាងចង់ចាកចេញតែត្រូវទ្រាំទាំងឈឺចាប់ព្រោះចិត្តនៅអាណិតកូន

អារម្មណ៍ឈឺចាប់មួយទៀត គឺនាងស្ទើរតែមិនអាចទ្រាំប្រឈមមុខចំពោះមនុស្សម្នាក់នោះទៀត ព្រោះភាពឈឺចាប់ដែលនាងទទួលបាននៅពេលនេះ គឺជាមនុស្សដែលនាងស្រលាញ់ផ្ដល់ឲ្យ។ ចិត្តចង់ចាកចេញឲ្យបាត់ពីមុខ ដើម្បីបំភ្លេចការឈឺចាប់ខ្លះ តែចិត្តមួយទៀតមិនចង់ឃើញកូនឈឺចាប់ ព្រោះឃើញឪពុកម្ដាយចែកផ្លូវគ្នា។ បែបនេះហើយ ទើបមានតែពាក្យទ្រាំ ក្នុងនាមជាម្ដាយមិនចង់ឃើញគ្រួសារបែកបាក់ ត្រូវទ្រាំរស់នៅទាំងគ្មានក្ដីសុខបន្តទៅមុខទៀត។

រូបតំណាង

៤. ការលះបង់គ្រប់បែបយ៉ាង និងអ្វីៗដែលនាងធ្វើនៅតែមិនអាចចងចិត្តប្ដីបាន

នាងតែងធ្វើគ្រប់បែបយ៉ាងដើម្បីគ្រួសារមួយនេះមានសុភមង្គល នាងតែងធ្វើជាម្ដាយល្អ ជាប្រពន្ធល្អ ផ្គាប់ផ្គុនចិត្តប្ដីមិនឲ្យឃ្នើសចិត្ត។ តែចុងក្រោយអ្វីដែលនាងទទួលបានការតបស្នង គឺការក្បត់ផិត នាងយល់ថា ការខិតខំរបស់នាងគ្មានតម្លៃ មិនអាចធ្វើឲ្យបុរសម្នាក់ប្រគល់ចិត្តស្មោះមកឲ្យនាងបានឡើយ។ នាងចង់ដឹងថា តើនាងមិនល្អត្រង់ណា នាងធ្វើអ្វីខុស? ទើបធ្វើឲ្យប្ដីហ៊ានមានអ្នកថ្មី បើនាងដឹងនាងនឹងកែប្រែហើយព្រមធ្វើគ្រប់យ៉ាង ឲ្យតែបុរសដែលនាងស្រលាញ់មិនក្បត់នាង។

៥. នាងគ្មានកម្លាំងចិត្ត អស់ជំនឿ និងតស៊ូទៅមុខទៀតហើយ

ចាប់តាំងពីនាងក្លាយជាប្រពន្ធគេ ម្ដាយគេ នាងតែងព្យាយាមខិតខំ ដើម្បីគ្រួសាររីកចម្រើន និងកាន់ដៃគ្នារហូតដល់ចាស់កោងខ្នង។ ទោះជានាងតាំងចិត្តថា ត្រូវខំដើម្បីកូនទោះដឹងថាប្ដីក្បត់ តែធាតុពិតនាងពិបាកធ្វើណាស់ នាងហាក់បាត់បង់កម្លាំងចិត្តមួយដ៏ធំធេង អស់ជំនឿចិត្ត ហើយមិនដឹងតស៊ូដើម្បីអ្នកណាទៀត ព្រោះសូម្បីតែនាងមនុស្សដែលនាងជឿទុកចិត្តបំផុត នៅតែអាចក្បត់នាងបាន។ ចុងក្រោយក្នុងខ្លួននាងហាក់ល្វឹងល្វើយគ្មានកោះគ្មានត្រើយ មិនដឹងគួរបន្តទៅមុខទៀតតាមផ្លូវណា ហើយមិនដឹងថា តើមានអ្នកណាដែលអាចកាន់ដៃនាងដល់ចុងបញ្ចប់នោះទេ។

៦. នាងយល់ថាចាប់ពីថ្ងៃមនុស្សដែលនាងស្រលាញ់ហ៊ានក្បត់ មានន័យថានាងលែងមានតម្លៃចំពោះគេទៀតហើយ

នាងចាប់ផ្ដើមគិតថា វត្តមានរបស់នាងអាចកំពុងទើសមុខទើសមាត់ មនុស្សម្នាក់ ព្រោះក្នុងបេះដូងគេ មិនដឹងថានាងនៅចំណាត់ថ្នាក់ទីប៉ុន្មាន? ពីមុននាងតែងញញឹមទទួលយកក្ដីស្នេហ៍មួយដោយជឿជាក់ ព្រោះនាងគិតថានាងមានតម្លៃបំផុតសម្រាប់បុរស ដែលនាងស្រលាញ់គ្មានស្រីដទៃណាស្មើនឹងនាងឡើយ។ តែការគិតរបស់នាងខុសស្រលះ ព្រោះគេនៅតែមើលឃើញនារីដទៃមានតម្លៃហើយក្បត់នាងបាន។

ពីមុន និងថ្ងៃនេះហេតុអ្វីខុសគ្នាម្ល៉េះ បើនាងមិនមែនជាមនុស្សចុងក្រោយសម្រាប់អ្នកតើអ្នកនាំនាងឲ្យស្គាល់ការឈឺចាប់ដើម្បីអ្វី? ហេតុអ្វីដាច់ចិត្តធ្វើបាបមនុស្សម្នាក់ ដែលគ្មានកំហុសទាល់តែសោះ? តើពេលដែលនាងឈឺចាប់ ទឹកភ្នែកនាងហូរព្រោះតែអ្នក តើអ្នកសប្បាយចិត្តណាស់មែនទេ? កុំបំផ្លាញបេះដូងនាងព្រោះនារីដទៃ មិនថានារីម្នាក់នោះស្ថិតក្នុងដំណែងអ្វីក្នុងបេះដូងបុរសដែលនាង ស្រលាញ់ក៏នាងមិនអាចទទួលយកបានឡើយ៕

អត្ថបទ៖ ថោ ច័ន្ទឬទ្ធិ