មន្រ្តីជាន់ខ្ពស់ស្រាយបំភ្លឺ រឿងកម្ពុជាប្រើថង់ប្លាស្ទិកលើសគេលើលោក ក្រោយ Chanel NewsAsia ផ្សាយ

2018-07-05 05:30:00
ព័ត៌មាន

2018-07-05 05:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

មន្ត្រីជាន់ខ្ពស់១រូប នៃក្រសួងបរិស្ថាន បានចេញមុខបកស្រាយការពិត ក្រោយសារព័ត៌មានល្បីឈ្មោះ របស់ប្រទេសសិង្ហបុរី ឈ្មោះ Chanel NewsAsia បានចុះផ្សាយអត្ថបទថា កម្ពុជាជាប់ចំណាត់ថ្នាក់ជាប្រទេសដែលប្រើប្រាស់ថង់ប្លាស្ទិក ច្រើនជាងគេបំផុតលើពិភពលោក កាលពីពេលថ្មីនេះ។

អាជ្ញាធរកាយសំរាមតាមប្រឡាយនៅភ្នំពេញ

ឯកឧត្ដម ហេង ណារ៉េត អគ្គនាយក នៃអគ្គនាយកដ្ឋានគាំពារបរិស្ថាន ក្រសួងបរិស្ថាន បានប្រាប់ Sabay តាមទូរសព្ទថា ចំពោះការចុះផ្សាយបែបនេះ ឯកឧត្ដមមិនអាចទទួលយកបាន និងសុំធ្វើការប្រតិកម្ម ក្រោមហេតុផលថា ចំនួនប្រជាជន ប្រទេសកម្ពុជា មានប្រមាណជាង ១៥ ឬ១៦លាននាក់ មានន័យថា មិនច្រើន ដូចប្រទេសផ្សេងៗ ចំនួនចូលខ្ទង់ពាន់លាននាក់ ដូចប្រទេស ចិន ឬឥណ្ឌាទេ។

ដូច្នេះការប្រើប្រាស់ថង់ប្លាស្ទិក មិនអាចមានច្រើនដូចចំនួននេះទេ។ ម្យ៉ាងកម្ពុជា ធ្លាប់បានធ្វើយុទ្ធនាការអប់រំ ប្រជាពលរដ្ឋ ឲ្យយល់ដឹង និងឈានទៅកាត់បន្ថយការប្រើប្លាស្ទិក។

ប្រភពរូប AKP

ទោះមានការប្រតិកម្មយ៉ាងនេះ ឯកឧត្ដម ហេង ណារ៉េត មិនបានបញ្ជាក់ ឬសុំការកែតម្រូវអ្វី១ ពីសារព័ត៌មានមាន Chanel NewsAsia ព្រោះគ្រាន់ជាសិទ្ធិក្នុងផ្សាយរបស់គេតែប៉ុណ្ណោះ។

បើយោងតាមសហភាពអឺរ៉ុប ថង់ប្លាស្ទិក ១០ លានតោនត្រូវបានប្រើប្រាស់ជារៀងរាល់ថ្ងៃនៅភ្នំពេញ ហើយ ប្រជាជនកម្ពុជាម្នាក់ ប្រើថង់ប្លាស្ទិកគិតជាមធ្យម ២,០០០ ថង់ក្នុង១ឆ្នាំ។

អាជ្ញាធរកាយសំរាមតាមប្រឡាយនៅភ្នំពេញ

ចំណុចនេះ ឯកឧត្ដម ហេង ណារ៉េត បានបកស្រាយថា ចំនួនខាងលើគឺច្រើនលើសលប់។

ឯកឧត្ដមបន្ត ថា តាមតួលេខនៃការស្ទង់មតិ របស់ក្រសួងបរិស្ថាន បានរកឃើញថា នៅទូទាំងប្រទេសកម្ពុជា មានចំនួនអ្នកប្រើថង់ប្លាស្ទិក ប្រមាណ ២០តោន ក្នុង១ថ្ងៃ។ ហើយក្នុង១ថ្ងៃ ប្រជាជនកម្ពុជា ដែលរស់នៅទីប្រជុំជន ក្នុងម្នាក់ ជាមធ្យម ប្រើថង់ប្លាស្ទិក ៥ថង់ ឬស្មើនឹង ២០០០ថង់ ក្នុង១ឆ្នាំ។

សូមបញ្ជាក់ថា កាលពីខែតុលា ឆ្នាំ២០១៧ កន្លងទៅ ប្រទេសកម្ពុជា បានដាក់ចេញនូវ អនុក្រឹត្យ១ ស្ដីពីការកាត់បន្ថយការប្រើប្រាស់ថង់ប្លាស្ទិក។

តាមការគ្រោងទុក កម្ពុជានឹង ចូលរួមកាត់បន្ថយការប្រើប្រាស់ថង់ប្លាស្ទិក ឲ្យបានចំនួន ៥០% នៅឆ្នំា២០២០ និងចំនួន៨០% នៅឆ្នាំ២០២៥។

នេះបើតាមប្រសាសន៍ ឯកឧត្ដម ហេង ណារ៉េត អគ្គនាយក នៃអគ្គនាយកដ្ឋានគាំពារបរិស្ថាន ក្រសួងបរិស្ថាន។

អត្ថបទ៖ ពៅ រក្សា