- 2018-07-12 04:59:48
- សេដ្ឋកិច្ច
សេវាកម្មថ្មីបំផុត អាចទិញគ្រឿងទេសកំប៉ិកកំប៉ុកតាមទូរសព្ទ សម្រាប់អ្នកខ្ជិលដើរផ្សារ
- 2018-07-12 04:59:48
- ចំនួនមតិ 0 | ចំនួនចែករំលែក 0
សេវាកម្មថ្មីបំផុត អាចទិញគ្រឿងទេសកំប៉ិកកំប៉ុកតាមទូរសព្ទ សម្រាប់អ្នកខ្ជិលដើរផ្សារ
ចន្លោះមិនឃើញ
កាលពីថ្ងៃទី១០ ខែកក្កដា ឆ្នាំ២០១៨នេះ ក្រុមហ៊ុន Grab បានប្រកាសចាប់ដៃគូជាមួយក្រុមហ៊ុន Happy Fresh ដើម្បីផ្ដល់សេវាកម្មបញ្ជាទិញគ្រឿងទេស ម្ហូបអាហារ បន្លែផ្លែឈើ និងទំនិញរាប់ពាន់ប្រភេទនៅលើទូរសព្ទដៃដោយមិនចាំបាច់ទៅដល់ផ្សារផ្ទាល់ទៀតឡើយ។
ការប្រកាសសម្ពោធជាផ្លូវការសេវាកម្មថ្មី Grab Fresh ដែលជាផ្នែកមួយនៃ Grab Platform នេះបានធ្វើឡើងនៅទីស្នាក់ការកណ្ដាលក្រុមហ៊ុន Grab នៅប្រទេសសិង្ហបុរី។ Happy Fresh ជាក្រុមហ៊ុនលំដាប់លេខ១នៅអាស៊ីអាគ្នេយ៍ ផ្នែកផ្គត់ផ្គង់គ្រឿងទេស បានចាប់ដៃគូជាមួយ Grab ដើម្បីធ្វើការដឹកជញ្ជូនគ្រប់ទំនិញទាំងអស់ទៅឲ្យអតិថិជនដល់ផ្ទះ។ សេវាកម្មថ្មីនេះ នឹងចាប់ផ្ដើមដំណើរក្នុងខែកក្កដានេះ នៅក្នុងប្រទេសសិង្ហបុរី និងឥណ្ឌូណេស៊ី។ ចំពោះថៃ និងម៉ាឡេស៊ី នឹងដំណើរការនៅចុងឆ្នាំ២០១៨នេះ។ ដោយឡែកប្រទេសកម្ពុជា និងភូមា ក៏ដូចជាប្រទេសដទៃទៀតក្នុងតំបន់អាស៊ីអាគ្នេយ៍ កំពុងធ្វើការសិក្សាទៅលើតម្រូវការ អត្តចរិតនៃប្រជាពលរដ្ឋ ឬទំនោររបស់អ្នកប្រើប្រាស់ជាមុនសិន។
Grab Fresh អតិថិជិនរបស់Grab អាចរីករាយក្នុងការទិញគ្រឿងទេសនៅផ្ទះបានយ៉ាងងាយស្រួល។ គ្រប់ផលិតផលទាំងអស់ត្រូវបានធានាគុណភាព ផលិតផលស្រស់ៗគ្រប់ប្រភេទ ដោយគ្រាន់តែរង់ចាំប្រមាណ១ម៉ោង អ្នកបើកបរ និងដៃគូដឹកជញ្ជូនរបស់Grab Express អាចដឹកគ្រឿងទេសទាំងអស់នោះទៅដល់មុខផ្ទះតែម្ដង បន្ទាប់ពីបានកុម្ម៉ង់ទិញនៅលើទូរសព្ទក្នុង App របស់ Grab។ ក្នុងនោះ អតិថិជនការជ្រើសរើសយ៉ាងទូលំទូលាយរហូតដល់ជាង ១សែន ផលិតផលគ្រឿងទេសពី ៥០ហាង នៃផ្សារទំនើបធំៗ និងហាងលក់គ្រឿងទេស។
Grab Fresh នឹងបង្ហាញពីរបៀប និងបណ្ដុះបណ្ដាលជាមុនសិន ដើម្បីឲ្យអតិថិជនធ្វើការបញ្ជាទិញទំនិញបានត្រឹមត្រូវ និងជាផលិតផលដែលស្រស់ មានគុណភាព។ ជាពិសេសនោះអតិថិជនអាចបដិសេធមិនទទួលយកទំនិញដែលមិនពេញចិត្ត នៅពេលដែលទំនិញត្រូវបានដឹកជញ្ជូនដល់ផ្ទះ។
លោក Guillem Segarra នាយកប្រតិបត្តិរបស់ហាង HappyFresh បាននិយាយថា៖«ការដឹកជញ្ជូនគ្រឿងទេស គឺជាឱកាសដ៏ធំមួយនៅក្នុងតំបន់អាស៊ីអាគ្នេយ៍នេះ។ តាមការសិក្សាស្រាវជ្រាវរបស់យើង ៧០ភាគរយនៃអ្នកប្រើប្រាស់កម្មវិធីដឹកជញ្ជូនគ្រឿងទេសធ្វើការកម្ម៉ង់ម្តងក្នុងមួយសប្តាហ៍ ហើយពួកគេចូលចិត្តទិញពីហាងដែលពួកគេស្គាល់។ អ្វីដែលពួកគេចង់បានជាអ្វីដែលពួកគេពេញចិត្តដែលអាចរកបាន និងត្រូវបានរៀបចំរួចរាល់នៅពេលដែលពួកគេចង់បាន។ Grab Fresh ផ្តល់ជម្រើសនៃផលិតផលយ៉ាងទូលំទូលាយបើធៀបទៅនឹងសេវាកម្មដឹកជញ្ជូនដទៃទៀត។»
លោក Guillem Segarra បន្ថែមថា៖ «ក្រុមហ៊ុនGrab គឺជាដៃគូដ៏ល្អដែលពួកយើងគួរតែមាន។ ចំនួននៃការដឹកជញ្ជូនកាន់តែច្រើនដែលអនុញ្ញាតឱ្យពួកយើងបន្ថែមការដឹកជញ្ជូនបន្ថែម និងកាត់បន្ថយពេលវេលាក្នុងការដឹកជញ្ជូន។ ពួកយើងអាចគ្របដណ្តប់នៅក្នុងប្រទេស និងក្រៅប្រទេសប្រកបដោយប្រសិទ្ធភាព។»
សូមបញ្ជាក់ថា Grab Fresh គ្រាន់តែជាសេវាកម្មមួយក្នុងចំណោមសេវាកម្មជាច្រើនដែលមាននៅក្នុង App របស់ Grab ដែលហៅថា SupperApp ជាបណ្ដុំសេវាកម្មដ៏សម្បូរបែបក្រៅពីសេវារថយន្តយន្តតាក់ស៊ីអនឡាញ។ ចំពោះ Grab Platform ដែលទើបតែធ្វើការសម្ពោធជាផ្លូវការនៅប្រទេសសិង្ហបុរីកាលពីថ្ងៃទី១០នេះ នឹងផ្ដល់ឱកាសដល់បណ្ដាក្រុមហ៊ុននានា មិនថាហាងលក់សំលៀកបំពាក់ ម្ហូបអាហារ គ្រឿងអេឡេចត្រនិក សម្ភារៈឧបករណ៍គ្រប់ប្រភេទ អាចសហការជាមួយ Grab ដើម្បីធ្វើការបញ្ជាទិញតាមរយៈទូរសព្ទដៃ ហើយមានភ្ញាក់ងារដឹកជញ្ជូនដល់ដៃអតិថិជន។
លោក Anthony Tan នាយកប្រតិបត្តិ និងជាស្ថាបនិកក្រុមហ៊ុន Grab បាននិយាយថា «តំបន់អាស៊ីអាគ្នេយ៍ត្រូវបានចាត់ទុកថាជាតំបន់សេដ្ឋកិច្ចធំទី៤ ត្រឹមឆ្នាំ២០៥០។ ប្រជាជនជាច្រើនកំពុងវិវឌ្ឍនខ្លួនទៅថ្នាក់មធ្យម ហេដ្ឋារចនាសម្ព័ន្ធបច្ចេកវិទ្យាកំពុងកើនឡើង ហើយក្រុមហ៊ុនត្រូវតែសម្របខ្លួនយ៉ាងឆាប់រហ័ស ដើម្បីផ្លាស់ប្តូរឱកាសទីផ្សារដែលកំពុងរីកចម្រើន។ ការរួមបញ្ចូលសមត្ថភាពរបស់ Grab ជាមួយនឹងជំនាញឯកទេសរបស់ដៃគូរបស់យើងនឹងជួយឱ្យ Grab និង ដៃគូរបស់យើងរីកចម្រើនយ៉ាងឆាប់រហ័សដើម្បីបម្រើអតិថិជនអាស៊ីអាគ្នេយ៍ជារៀងរាល់ថ្ងៃ៕»