- 2018-07-21 07:04:38
- សេដ្ឋកិច្ច
ឡូយណាស់! ABA ប្រចាំស្រុកខ្មែរ ទើបតែហោះទៅទទួលពាននៅហុងកុងក្ដៅៗ
- 2018-07-21 07:04:38
- ចំនួនមតិ 0 | ចំនួនចែករំលែក 0
ឡូយណាស់! ABA ប្រចាំស្រុកខ្មែរ ទើបតែហោះទៅទទួលពាននៅហុងកុងក្ដៅៗ
ចន្លោះមិនឃើញ
ធនាគារ ABA ដែលជាសមាជិកសម្ពន្ធធនាគារជាតិកាណាដា ទើបតែទទួលបានពានរង្វាន់មួយទៀតក្នុងពេលថ្មីៗនេះនៅទីក្រុងហុងកុង ត្បិតឆ្នាំនេះខ្លួនបានជាប់ឈ្មោះជា "ធនាគារឆ្នើមជាងគេនៅកម្ពុជា" ទៀតហើយ ពោលគឺជាប់ជាលើកទី៥ ក្នុងរយៈពេល៥ឆ្នាំជាប់ៗគ្នា។
ពានរង្វាន់នេះត្រូវបានប្រគល់ជូន ABA ក្នុងពិធីប្រគល់ពានរង្វាន់ដល់ធនាគារជយលាភីពីតំបន់អាស៊ី ដែលប្រារព្ធធ្វើឡើងនៅក្នុងកម្មវិធីពិសាភោជនាហារ និងរាត្រីសមោសរអបអរសាទរពានរង្វាន់ឧត្ដមភាព ប្រចាំឆ្នាំរបស់ទស្សនាវដ្តី Euromoney នៅឯសណ្ឋាគារ JW Marriott ក្នុងទីក្រុងហុងកុងកាលពីថ្ងៃទី ១៨ ខែកក្កដា កន្លងទៅថ្មីៗនេះ។
លោក Askhat Azhikhanov នាយកប្រតិបត្តិនៃធនាគារ ABA បានថ្លែងថា៖ "យើងខ្ញុំសូមថ្លែងអំណរគុណយ៉ាងជ្រាលជ្រៅ ចំពោះពានរង្វាន់ដ៏ឧត្ដុង្គឧត្ដមមួយនេះ ពីទស្សនាវដ្តីហិរញ្ញវត្ថុដែលត្រូវបានគេគោរពទទួលស្គាល់ជុំវិញពិភពលោក។ ម្យ៉ាងវិញទៀត ការណ៍ដែលយើងទទួលបានកិត្តិនាមជាធនាគារឆ្នើមជាងគេដល់ទៅ៥ឆ្នាំជាប់ៗគ្នានេះ សបញ្ជាក់ឲ្យឃើញថាយើងពិតជានៅលើផ្លូវត្រូវក្នុងការផ្តល់ផលិតផលទំនើបទាន់សម័យ និងផ្តោតលើតម្រូវការអតិថិជនជាធំ ជូនទៅដល់ប្រជាពលរដ្ឋ និងអាជីវកម្មនានាក្នុងប្រទេសកម្ពុជា ក៏ដូចជាការបន្តពង្រឹងបរិយាបន្នហិរញ្ញវត្ថុនៅក្នុងប្រទេស"។
ដំណើរការជ្រើសរើសធនាគារឆ្នើមជាងគេប្រចាំប្រទេសនីមួយៗរបស់ Euromoney គឺពឹងផ្អែកលើទិន្នន័យបែបបរិមាណ និងគុណភាពដែលប្រមូលបានក្នុងរយៈពេល ១២ ខែចុងក្រោយនេះ។ ទិន្នន័យទាំងនោះរួមមាន ព័ត៌មានទាំងឡាយដែលផ្តល់ជូនដោយធនាគារដែលចូលរួមក្នុងការប្រកួតនេះទាំងអស់ ការស្ទង់មតិពីបណ្ដាញរបស់ Euromoney និងបទសម្ភាសន៍ស៊ីជម្រៅជាមួយអ្នកវិភាគឯករាជ្យនានាក្នុងវិស័យធនាគារ និងហិរញ្ញវត្ថុពីប្រទេសនោះ។
លើសពីនេះ ចំណុចសំខាន់ៗដែលត្រូវបានពិចារណាក្នុងការវាយតម្លៃនេះរួមមាន យុទ្ធសាស្ត្រក្នុងការពង្រឹងការគ្រប់គ្រងហានិភ័យ និងសុវត្ថិភាពតាមអ៊ីនធឺណិតរបស់ធនាគារ ការវិវឌ្ឍទៅមុខនៃផលិតផល និងយុទ្ធសាស្ត្រនៃសេវាធនាគារបែបឌីជីថល ការពង្រីកភូមិសាស្ត្រនៃប្រតិបត្តិការការងារ គោលជំហរ និងឥទ្ធពលរបស់ធនាគារក្នុងទីផ្សារ ក៏ដូចជាសមិទ្ធិផលផ្នែកហិរញ្ញវត្ថុក្នុងឆ្នាំចុងក្រោយដោយធៀបនឹងឆ្នាំទៅម៉ិញផងដែរ។
លោក Clive Horwood និពន្ធនាយកទស្សនាវដ្តី Euromoney មានប្រសាសន៍ថា ABA នៅតែជាធនាគារនាំមុខគេក្នុងប្រទេសកម្ពុជា ហើយបានទទួលកំណើនប្រាក់ចំណេញដល់ទៅ ៥៩% ក្នុងឆ្នាំ ២០១៧។ បើធៀបនឹងឆ្នាំ ២០១៦ ដោយកើនរហូតដល់ ៤៦.១៩ លានដុល្លារអាមេរិក។ ទ្រព្យសកម្មកើនបាន ៤៩% រហូតដល់ ១.៦៤ ពាន់លានដុល្លារ និងអត្រានៃលទ្ធភាពទទួលបានប្រាក់ចំណេញគឺ ២៨.១%។
ABA បន្តជំរុញសេវានានាឲ្យទៅជាលក្ខណៈឌីជីថល និងមានការឆ្លើយតបខ្ពស់ទៅ នឹងតម្រូវការនៅកម្ពុជា ដោយបានដាក់ឲ្យប្រើសេវាទូទាត់ប្រាក់តាមអនឡាញ PayWay ក្នុងអំឡុងពេលវាយតម្លៃនេះ។ ក្រៅពីនោះធនាគារដដែល បានអនុម័តកាតថ្មី ប្រភេទ VISA, Mastercard, និង UPI សរុបប្រមាណជិត ១០ ម៉ឺនកាត នៅក្នុងឆ្នាំ ២០១៧ ហើយថែមទាំងបានចុះកិច្ចព្រមព្រៀងជាដៃគូរយៈពេល ១៥ ឆ្នាំជាមួយក្រុមហ៊ុនធានារ៉ាប់រង Manulife ដើម្បីផ្តល់សេវាធានារ៉ាប់រងអាយុជីវិតដល់អតិថិជនខ្លួនថែមទៀត។
ប៉ុន្មានឆ្នាំកន្លងទៅនេះ ABA បានទទួលពានរង្វាន់ធំៗពីគ្រឹះស្ថានបោះពុម្ពហិរញ្ញវត្ថុអន្តរជាតិល្បីៗជាច្រើន។ ក្នុងនោះ ទស្សនាវដ្តី The Banker បានប្រសិទ្ធនាម ABA ជា “ធនាគារប្រចាំឆ្នាំ” ក្នុងប្រទេសកម្ពុជានៅឆ្នាំ ២០១៤ និង ២០១៦ ខណៈទស្សនាវដ្តី Global Finance បានទទួលស្គាល់ ABA ថាជា “ធនាគារឆ្នើមជាងគេនៅកម្ពុជា” ក្នុងរយៈពេល ៤ ឆ្នាំជាប់ៗគ្នាគឺ ២០១៥, ២០១៦, ២០១៧ និង ២០១៨។ ពានរង្វាន់ “ធនាគារឆ្នើមជាងគេនៅកម្ពុជាប្រចាំឆ្នាំ ២០១៨” ពី Euromoney នេះ គឺជាពានទី ៥ ពីទស្សនាវដ្តីមួយនេះ ដោយបន្ថែមទៅលើបញ្ជីសមិទ្ធផលដែលបន្តកើនពីឆ្នាំ ២០១៤, ២០១៥ ២០១៦, និង ២០១៧៕