- 2018-07-23 03:36:41
- ការអប់រំ
មកនៅភ្នំពេញចង់ជោគជ័យ ត្រូវចេះ៥ក្បាច់នេះ ដឹងតែអ្នកស្រុកសរសើរមិនដាច់ពីមាត់
- 2018-07-23 03:36:41
- ចំនួនមតិ 0 | ចំនួនចែករំលែក 0
មកនៅភ្នំពេញចង់ជោគជ័យ ត្រូវចេះ៥ក្បាច់នេះ ដឹងតែអ្នកស្រុកសរសើរមិនដាច់ពីមាត់
ចន្លោះមិនឃើញ
ចាកចេញពីស្រុកកំណើត ដើម្បីបន្តការសិក្សានៅទីក្រុង គឺប្រៀបដូចជាការផ្លាស់ប្ដូរជីវិតដ៏ធំមួយ។ ៤ឆ្នាំថ្នាក់បរិញ្ញាបត្រ ជាពេលវេលាដែលត្រូវរៀនរស់ រៀនក្រោកឈរដោយខ្លួនឯង មិនមែនបាននៅជិតឪពុកម្ដាយដូចពីមុនទៀតទេ។ ដូច្នេះហើយត្រូវធ្វើដូចម្ដេចខ្លះ ទើបឱ្យជីវិតរស់នៅទីក្រុងដ៏ឆើតឆាយមួយនេះទទួលបានជោគជ័យដ៏ត្រចះត្រចង់ជូនខ្លួនឯង និងគ្រួសារ ហើយរឿងអ្វីខ្លះត្រូវតែប្រយ័ត្នជានិច្ច ទើបមិនធ្វើឱ្យជីវិតបរាជ័យ? ខាងក្រោមនេះជាការចែករំលែកពីសាស្ត្រាចារ្យ ឈួន រដ្ឋា បង្រៀនមុខវិជ្ជា សហគ្រិនភាព នៅសាកលវិទ្យាល័យឯកជនមួយ
១. ការសេពគប់មិត្តភក្ដិ
ចំណុចនេះកាន់តែសំខាន់ មិត្តភក្ដិរាប់អានអំឡុងពេលរៀននៅសាកលវិទ្យាល័យកាន់តែប្រុងប្រយ័ត្នជាងពេលរៀននៅវិទ្យាល័យទៅទៀត។ ការរៀនបន្តថ្នាក់ឧត្ដមសិក្សា ប្រៀបដូចជាជំហានមួយឈានទៅរកអនាគតដ៏ល្អនៅថ្ងៃខាងមុខ។ ដូច្នេះត្រូវសេពគប់បុគ្គលណាជាអ្នកមានក្រមសីលធម៌ ចំណេះដឹង ជាអ្នកមានឧត្ដមគតិខ្ពស់ ដែលអាចផ្ដល់នូវបទពិសោធន៍ ការចែករំលែកព័ត៌មានល្អៗ ហើយក៏ជាចំណែកមួយជួយឱ្យយើង កាន់តែសម្លឹងឃើញពីអនាគតបានវែងឆ្ងាយ។
២. ការប្រើប្រាស់ពេលវេលា
ការប្រើប្រាស់ពេលវេលាអំឡុងពេលមកនៅភ្នំពេញ កាន់តែសំខាន់ទៀត។ ចំណុចនេះមានន័យថា ភាពជោគជ័យ ឫបរាជ័យរយៈពេល៤ឆ្នាំនៃថ្នាក់បរិញ្ញាបត្រក៏អាស្រ័យលើការប្រើប្រាស់ពេលវេលាឱ្យមានតម្លៃ ធ្វើអ្វីដែលមានប្រយោជន៍ឱ្យបានច្រើន។ ដូច្នេះត្រូវបែងចែករវាងពេលវេលាត្រូវសប្បាយ និងការសិក្សាឱ្យដាច់ស្រឡះពីគ្នា ត្រូវធ្វើអ្វីដែលគិតថាមានផលល្អចំពោះខ្លួនឯងកុំរៀននិយាយពាក្យចាំ ព្រោះពាក្យចាំនេះហើយនាំឱ្យខាតពេលវេលាពីមួយថ្ងៃទៅមួយថ្ងៃ។ ក្នុងនោះរួមមាន ការសិក្សាភាសាបរទេស កុំព្យូទ័រ វគ្គបណ្ដុះបណ្ដាល និងការចាប់ឱកាសការងារផ្សេងៗជាដើម។
៣. កុំឱ្យភ្លើតភ្លើន
មករស់នៅទីក្រុងដ៏ឆើតឆាយភ្លើងចម្រុះពណ៌ អាចធ្វើឱ្យមានកូនចិត្តចង់ដឹង ចង់ស្គាល់ ចង់ផ្លាស់ប្ដូរជីវិតពីអ្នកខេត្តមកជាអ្នកទីក្រុងបែបហ៊ឺហា។ ប្រសិនបើមិនចេះខាំមាត់សង្កត់ចិត្តទេ អាចភ្លេចខ្លួន ភ្លេចការសិក្សា ភ្លេចនឹកគិតដល់ឪពុកម្ដាយ នៅឯស្រុកកំណើត។ ដូច្នេះត្រូវនឹកក្នុងចិត្តជានិច្ចថា យើងមកនៅភ្នំពេញនេះ គឺដើម្បីរៀន ដើម្បីអនាគត ដើម្បីគ្រួសារ ដើម្បីងើបផុតពីភាពលំបាក កុំព្រោះតែភ្លេចខ្លួនមួយពេល អាចនាំឱ្យមានវិប្បដិសារីអស់មួយជីវិត។
៤. អភិវឌ្ឍខ្លួន
ភាពចុះញ៉ម ភាពខ្លាច មិនហ៊ានប្រថុយ តែងគិតថាខ្លួនមិនអាចធ្វើបាន ក៏មិនអាចឱ្យជីវិតទទួលបានជោគជ័យពេលមករៀននៅទីក្រុងដែរ។ ដូច្នេះត្រូវរៀនអភិវឌ្ឍសមត្ថភាពពីមួយជំហាន ទៅមួយជំហាន ហ៊ានប្រឡូកជាមួយមនុស្សក្នុងសង្គម ការចាប់ឱកាសនានាមិនថា ការងារ ឫការប្រកួតប្រជែងសមត្ថភាពនោះទេ។ ប្រសិនបើមិនហ៊ានធ្វើរឿងទាំងនេះទេ ក៏មិនមានអ្វីរីកចម្រើនដែរ។
៥. សម្លឹងបានវែងឆ្ងាយ
មនុស្សម្នាក់ៗចាំបាច់ត្រូវមានមហិច្ឆតារៀងខ្លួន ទើបមានការរីកចម្រើន។ មិនខុសអីពីនិស្សិតដែលមករៀននៅភ្នំពេញ ត្រូវចេះសម្លឹងពីអនាគតបានវែងឆ្ងាយ ត្រូវកំណត់ផ្លូវដែលត្រូវដើរ និងគោលដៅដែលចង់ទៅដល់ មិនមែនឱ្យតែរៀនចប់មានការងារធ្វើហើយ គិតថាខ្លួនឯងជោគជ័យនោះទេ។ ដូច្នេះត្រូវរៀនមានមហិច្ឆតា មានក្ដីស្រមៃ តែក៏ត្រូវសួរខ្លួនឯងដែរថា តើអ្វីដែលបានកំណត់នោះ ខ្លួនឯងអាចដើរដល់ ឫក៏អត់ ហើយមានសមត្ថភាពគ្រប់គ្រាន់ឫនៅដើម្បីបំពេញក្ដីស្រមៃនោះ៕
