- 2018-07-26 03:02:28
- សេដ្ឋកិច្ច
បង្អួតសម្រស់តំបន់ទឹកធម្មជាតិ ៣កន្លែងប្រចាំខេត្តស្ទឹងត្រែង ស្អាតមិនចាញ់ខេត្តនានា
- 2018-07-26 03:02:28
- ចំនួនមតិ 0 | ចំនួនចែករំលែក 0
បង្អួតសម្រស់តំបន់ទឹកធម្មជាតិ ៣កន្លែងប្រចាំខេត្តស្ទឹងត្រែង ស្អាតមិនចាញ់ខេត្តនានា
ចន្លោះមិនឃើញ
ស្ទឹងត្រែងត្រូវបានគេចាត់ទុកថាជាខេត្តដែលមានសក្ដានុពលទេសចរណ៍ខ្លាំងជាងគេនៅតំបន់ភាគខាងជើងចម្ងាយពីភ្នំពេញប្រមាណជិត ៥០០គីឡូម៉ែត្រ។ បើនិយាយពីតំបន់ទេសចរណ៍ធម្មជាតិវិញ គឺស្អាត ហើយខ្យល់អាកាសត្រជាក់ល្ហឹម បើបានទៅហើយ ប្រាកដជាលង់សម្រស់ធម្មជាតិនៅទីនោះមិនខាន។
ក្រុមការងារ Sabay បានចុះទៅផ្ដិតយករូបភាពតំបន់ទឹកធម្មជាតិ ៣កន្លែង ស្រស់ស្អាតប្រចាំខេត្តស្ទឹងត្រែងកាលពីកន្លងទៅដូចខាងក្រោម៖
១. ទឹកធ្លាក់លើផ្ទាំងសិលាយក្សនៅជាប់ព្រំដែនឡាវ
ទឹកធ្លាក់លើផ្ទាំងសិលាយក្សនេះមានឈ្មោះដល់ទៅ៣ដែលត្រូវបានអ្នកស្រុកនិយាយតៗពីគ្នាគឺអ្នកខ្លះហៅ ទឹកជ្រោះសុភមិត្រ អ្នកខ្លះហៅ ល្បាក់ខោន ឬក៏ហៅព្រះនិម្មិត។
ប៉ុន្តែឈ្មោះដែលគេនិយមហៅជាងគេគឺល្បាក់ខោន។ វាស្ថិតនៅភាគខាងប្រទេសកម្ពុជាដែលជាប់នឹងព្រំដែនឡាវ គឺជាតំបន់មួយដែលទន្លេមេគង្គហូរឆ្លងកាត់ចុះចេញពីខ្ពង់រាបធ្លាក់ចូលមកទន្លេមេគង្គ។ ទឹកធ្លាក់ល្បាក់ខោន ឬទឹកធ្លាក់សុភមិត្រស្ថិត នៅក្នុងឃុំ ព្រះរំកិល ស្រុកថាឡាបូរិវ៉ាត់ដែលមានចម្ងាយប្រមាណជិត៨០គីឡូម៉ែត្រពីខេត្តស្ទឹងត្រែង។
២. ព្រៃលិចទឹកតាមដៃទន្លេមេគង្គ
ព្រៃលិចទឹកនៅតាមដៃទន្លេមេគង្គជាកន្លែងកម្សាន្តដ៏កម្រមួយនៅប្រទេសកម្ពុជាដែលមនុស្សគ្រប់គ្នាប្រាថ្នាចង់ឃើញ។ ព្រៃលិចទឹកនេះត្រូវបានគេហៅថា រុំាសា (តំបន់អភិរក្សលិចទឹក)មានចម្ងាយរាប់គីឡូម៉ែត្រតាមដងទន្លេមេគង្គ នៅឃុំអូរស្វាយ ស្រុកថាឡាបូរិវ៉ាត ខេត្តស្ទឹងត្រែង។
តំបន់រុំាសា (តំបន់អភិរក្ស លិចទឹក) ដែលមានសត្វផ្សោតតាមដងទន្លេមេគង្គ សត្វបក្សាបក្សី សត្វព្រៃ ជាច្រើនទៀត។ វាប្រៀបបាននឹងត្បូងពេជ្រដ៏មានតម្លៃ ដែលបានផុសឡើងពីទឹកតាមបណ្ដោយទន្លេមេគង្គ។ វាបានផ្តល់នូវសម្បត្តិព្រៃឈើដ៏ ប្រសើរ ដែលជាជម្រកដ៏ប្រសើរសម្រាប់សត្វព្រៃ។
៣. រមណីយដ្ឋានធម្មជាតិអូរច្រឡង់«ក្រមុំព្រហ្មចារី»
ទឹកហូរអូរច្រឡង់ ឬហៅថា អូរវែង ដែលស្ថិតនៅចម្ងាយ៤៤គីឡូម៉ែត្រ ពីក្រុងស្ទឹងត្រែង ប្រៀបដូចជា «ក្រមុំព្រហ្មចារី» នៅក្នុងព្រៃស្ងប់ស្ងាត់ បែបធម្មជាតិសុទ្ធសាធ ។
អូរនេះ ស្ថិតនៅភូមិអូរច្រឡង់ ឃុំម្រះ ស្រុកសៀមបូក ខេត្តស្ទឹងត្រែង ប៉ុន្តែទឹកហូរអូរដ៏ស្រស់ស្អាតនេះ មិនទាន់មានផ្លូវចូលស្រួលនៅឡើយទេ ដោយត្រូវធ្វើដំណើរចេញពីភូមិឆ្លងកាត់ព្រៃ ចម្ងាយ២៧០០ម៉ែត្រទើបដល់។