- 2018-08-06 09:06:16
- សេដ្ឋកិច្ច
បន្ទាប់ពីមានទីផ្សារធំនៅចិន តើកម្ពុជានាំចេកប៉ុន្មានម៉ឺនតោនទៅទីផ្សារអន្តរជាតិក្នុងមួយឆ្នាំ?
- 2018-08-06 09:06:16
- ចំនួនមតិ 0 | ចំនួនចែករំលែក 0
បន្ទាប់ពីមានទីផ្សារធំនៅចិន តើកម្ពុជានាំចេកប៉ុន្មានម៉ឺនតោនទៅទីផ្សារអន្តរជាតិក្នុងមួយឆ្នាំ?
ចន្លោះមិនឃើញ
កាលពីសប្ដាហ៍មុននេះ កម្ពុជា និងចិនបានចុះហត្ថលេខាលើពិធីសារស្ដីពីលក្ខខណ្ឌតម្រូវ ភូតគាមអនាម័យសម្រាប់ការនាំចេកអំបូងលឿងពីកម្ពុជាទៅកាន់ទីផ្សារចិនដោយផ្ទាល់ ដែលកិច្ចព្រមព្រាងនេះ ត្រូវបានធ្វើឡើងរវាង ឯកឧត្ដម វ៉េង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ និងឯកអគ្គរដ្ឋទូតចិនប្រចាំនៅកម្ពុជា។ ប៉ុន្តែលោកអ្នកប្រហែលមិនទាន់ដឹងទេថា តើជារាល់ឆ្នាំកម្ពុជា បាននាំចេកប៉ុន្មានម៉ឺនតោនទៅក្រៅប្រទេស?
លោក ហ៊ាន វណ្ណហន អគ្គនាយកនៃអគ្គនាយកដ្ឋានកសិកម្ម បានថ្លែងប្រាប់អ្នកសារព័ត៌មានថា កម្ពុជាបាននាំចេញផ្លែចេកប្រមាណ ៣ម៉ឺនតោនក្នុងមួយឆ្នាំទៅកាន់ទីផ្សារអន្តរជាតិ ខណៈបច្ចុប្បន្នមានផ្ទៃដីដាំចេកសម្រាប់នាំចេញជាង ៥ ០០០ ហិចតា ហើយផ្ទៃដីដាំដុះនេះនឹងត្រូវបន្តពង្រីកបន្ថែមទៀត បន្ទាប់ពីមានការផ្ដល់ភ្លើងខៀវពីប្រទេសចិន។
កម្ពុជាមានផ្ទៃដីដាំចេកអំបូងលឿងនៅខេត្តរតនគិរី ក្រចេះ និងខេត្តកំពត។ “តាមពិតចេកនាំចេញមិនមែនដូចចេកយើងឃើញមានតាមខេត្តកន្លងមកទេដូចជា ចេកណាំវ៉ា ឬ ចេកពងមាន់នោះទេ ប៉ុន្តែជាប្រភេទពូជមួយអំបូងលឿង ដែលអាចធន់ទ្រាំទៅនឹងការដឹកជញ្ជូន ហើយមានលក្ខណៈអាចទុកបានយូរ ដែលខុសពីចេកក្នុងស្រុកយើងពីមុនមកគឺការដឹកជញ្ជូនយើងមិនបានយូរទេ។ អញ្ចឹងលើពិភពលោកគេនិយមចេកអំបូងលឿងនេះឯង”។
លោកបានឱ្យដឹងទៀតថា បន្ទាប់ពីចុះពិធីសារជាមួយចិន នៅមានការងារមួយចំនួនទៀត ដែលត្រូវចាត់ចែងបន្ទាន់ទី១ គឺម្ចាស់កសិដ្ឋានត្រូវរូតរះមកចុះបញ្ជីនៅអគ្គនាយកដ្ឋានកសិកម្ម ដើម្បីធ្វើយ៉ាងណាឱ្យស្របទៅនឹងលក្ខខណ្ឌតម្រូវរបស់ភាគីចេញចិន។ លក្ខខណ្ឌរបស់ចិនគឺផ្ដោតសំខាន់ទៅលើរបាំងភូតគាមអនាម័យ ដែលផ្ដោតសំខាន់លើសំណល់សារធាតុបង្កគ្រោះថ្នាក់ដល់សុខភាពលើសកម្រិតកំណត់ និងមិនឱ្យចម្លងនូវប្រភេទសត្វល្អិតចង្រៃពីកម្ពុជារាលដាលឆ្លងទៅប្រទេសចិន។
“ខ្ញុំលើកមកនេះមិនមែនមានន័យថា ប្រទេសយើងមានអ្វីដែលអាក្រក់លើសគេនោះទេ ប៉ុន្តែនេះ គឺជាវិធានការទប់ស្កាត់ទៅវិញទៅមក។ អញ្ចឹងបំណងសំខាន់ នៃពិធីសារនេះ គឺការពារសុខភាពអ្នកហូបចុក និងការឆ្លងរីករាលដាល នៃសត្វល្អិតចង្រៃតែប៉ុណ្ណោះ”។ លោក ហ៊ាន វណ្ណហន បន្ថែម។
បន្ថែមលើនេះ លោក ហ៊ាន វណ្ណហន ឱ្យដឹងថា បច្ចុប្បន្ននៅខេត្តរតនគិរី ក្រុមហ៊ុន ហុង អាញ់ អណ្ដូងមាស បានបោះទុនវិនិយោគលើផ្ទៃដី ចំនួន ១០ ០០០ ហិចតា សម្រាប់ផលិតកម្មផ្លែឈើនាំចេញ ហើយក្នុងនោះចម្ការចេកមានចំនួន ១ ០០០ ហិកតា កំពុងត្រូវប្រមូលផល និងបាននាំចេញជាលើកដំបូងទៅកាន់ទីផ្សារអន្តរជាតិកាលពីឆ្នាំមុន៕
