- 2018-08-08 05:30:00
- សេដ្ឋកិច្ច
២ស្នៀត ជោគជ័យ លែងស៊ីឈ្នួលគេ ពីបុរសរូបសង្ហារ ចាប់អាជីពការងារស្រ្តី បានចំណូលកប់
- 2018-08-08 05:30:00
- ចំនួនមតិ 0 | ចំនួនចែករំលែក 0
២ស្នៀត ជោគជ័យ លែងស៊ីឈ្នួលគេ ពីបុរសរូបសង្ហារ ចាប់អាជីពការងារស្រ្តី បានចំណូលកប់
ចន្លោះមិនឃើញ
ផ្ដើមពីចិត្តស្រលាញ់ និងរត់ទៅរៀនជំនាញស៊ីឈ្នួលឲ្យគេ ម្ចាស់ហាងរូបសង្ហារម្នាក់ បានចាប់អាជីពដ៏ពេញនិយម១ ដែលភាគច្រើនមានតែស្ត្រីទេចូលចិត្តធ្វើ រហូតទទួលជោគជ័យ គួរឲ្យសរសើរ។
នោះគឺ លោក សំ សុបញ្ញា ម្ចាស់ហាង Salon ល្បីឈ្មោះ១ មានទីតាំងចំនួន ២ធំៗ នៅកណ្ដាលរាជធានីភ្នំពេញ និងមានភ្ញៀវ ចេញចូលគ្រប់ឋានៈមិនចេះដាច់ ពិសេសតារាល្បីៗ។
លោកបានប្រាប់ Sabay ថា មុនមានថ្ងៃនេះ លោកបានឆ្លងកាត់រឿងរ៉ាវ និងបទពិសោធន៍ជាច្រើន ក្នុងរបរ ដែលធ្វើឲ្យគេស្អាត ស្រលាញ់ពេញចិត្ត រហូតមានភ្ញៀវគាំទ្រច្រើន។
លោករំលឹកទៅអតីតកាលថា តាំងពីតូច រហូតធំដឹងក្ដីមក លោក ដឹង ថាខ្លួនឯងស្រលាញ់ការងារ ដែលចង់ឲ្យគេស្អាត ដូចនេះ រាល់ពេលទំនេរៗ លោកចូលចិត្តតុបតែងឲ្យមិត្តភ័ក្ដិ តាមរយៈការឆ្នៃម៉ូតសក់នានាប្លែកៗ។
បន្ទាប់មកលោកបានសម្រេចចិត្ត មករៀនជំនាញនេះ នៅហាង Salon មួយ ដោយគ្រាន់តែស៊ីឈ្នួលគេ គ្មានអ្វីទាំងអស់ គឺបានប្រាក់ខែ១២០ដុល្លារ ក្នុង១ខែ។
ចិត្តស្រលាញ់ ការតស៊ូ និងជំនាញ បានជំរុញ ឲ្យលោកបែកគំនិតចង់រកស៊ីខ្លួនឯង ដោយជោគជ័យ។
ចុងក្រោយ លោក បានឈប់ធ្វើការឲ្យគេ និងមកបើកហាង ១ខ្លួនឯង ក្រោយសន្សំបានទុនដំបូងជិត ១ម៉ឺនដុល្លារ មុនឈានទៅពង្រីកសាខាបន្ទាប់ បែបទំនើប។
ក្នុងចែករំលែកគន្លឹះអាជីវកម្ម មាន២ចំណុចសំខាន់ ដែលត្រូវប្រុងប្រយ័ត្ន ដែលបុរសវ័យ ២៨ឆ្នាំរូបនេះ បានជម្នះដោយជោគជ័យ ឈប់នៅធ្វើការឲ្យគេ ហើយក្លាយជាថៅកែនៅវ័យក្មេង។
១. ពាក្យសំដី និងអត្តចរិត
ថៅកែហាង Share Salon រូបសង្ហារ បានផ្ដល់ភាពជាគំរូជាមុនដល់បុគ្គលិក តាមរយៈការប្រើពាក្យសំដីប្រចាំថ្ងៃ។ លោក សំ សុបញ្ញា បញ្ជាក់ ថា នេះជាអ្វីដែលត្រូវប្រយ័ត្នមុនគេ បើមិនចង់ឲ្យបាត់ភ្ញៀវចង់ដោយមិនដឹងខ្លួន។ លោកថា ពាក្យសំដី និងអត្តចរិត ដូចជាមុខកាំបិត អីចឹងមិនថាយើងជាម្ចាស់ហាងក៏ដោយ ដាច់ខាត ត្រូវប្រើប្រាស់ឲ្យបានល្អ មានការគោរព ទៅកាន់បុគ្គលិកគ្រប់ជាន់ថ្នាក់។
លោកថា នេះជាចំណុចសំខាន់១ ហាក់ដូចជា វិធីបង្រៀនបុគ្គលិកដោយត្រជាក់ ដើម្បីឈានទៅនិយាយស្ដីល្អ និងបង្ហាញកាយវិការទន់ភ្លន់ ចៀសវាងការថ្នាំងថ្នាក់ចិត្ត ភ្ញៀវ ឈប់មកលើកក្រោយ។
២. ទឹកដៃ បែបកាលីប ប្លែកៗ និងទាន់សម័យ
ម្ចាស់ហាងរូបនេះ ប្រាប់ថា នេះជារឿងដែលរឹតតែត្រូវយកចិត្តទុកដាក់បន្ថែម ពីការប្រើពាក្យសំដី។ របរផ្នែកសម្រស់នេះ គឺទាមទារឲ្យមានភាពទាក់ទាញ ស្អាត Style កាលីប ប្លែកៗទាន់សម័យ។ ដូច្នេះ យើងត្រូវព្យាយាមរកអ្វីដែលថ្មី និងបង្រៀនកូនជាងឲ្យចេះ យ៉ាងហោចណាស់ក៏បាន ៧០ ទៅ៨០% នៃការងារដែលមេជាង ឬម្ចាស់ហាងធ្វើ។
សូមចាំថា បើយើងម្ចាស់ធ្វើស្អាតឲ្យភ្ញៀវ តែម្នាក់ឯង ក៏មិនអាចធ្វើអស់ដែរ ករណីមានមនុស្សច្រើនសម្រុកមក ដូចរដូវកាលសំបូរកម្មវិធី។ តាមបទពិសោធន៍ និងជោគជ័យចំណុចនេះ លោក សំ សុបញ្ញា ប្រាប់ថា ដោយសារភ្ញៀវពេញចិត្តស្នាដៃហាងរបស់លោក ទើបខែដែលមានកម្មវិធីការ ច្រើនម្ដងៗ លោក អាចទទួលបានភ្ញៀវច្រើន មកផាត់មុខ ធ្វើសក់ ចន្លោះពី ៥០ ទៅ ៦០នាក់ឯណោះ ក្នុង១ថ្ងៃ។
ភ្ញៀវម្នាក់ជាមធ្យមចំណាយ ១៥ ទៅ២៥ដុល្លារ ប្រសិនបើមានថែមគ្រឿងនានា ក្រៅពីផាត់មុខ ធ្វើសក់។ បើខែមិនសូវសំបូរភ្ញៀវ ហាងនេះ ក៏អាចមានអ្នកមក ចន្លោះពី១០ ទៅ២០នាក់។
សូមទស្សនារូបភាពនៃការផាត់មុខ និងធ្វើសក់ ស្អាតកប់ ស្នាដៃ របស់លោក សំ សុបញ្ញា។