- 2018-08-08 08:40:49
- ការអប់រំ
សុង វីរីកា ជាប់លេខ១តាំងពីថ្នាក់ទី៥ ដល់ទី១១ ប្រាប់គន្លឹះពិសេស៦ចំណុច ក្លាយជាសិស្សឆ្នើម
- 2018-08-08 08:40:49
- ចំនួនមតិ 0 | ចំនួនចែករំលែក 0
សុង វីរីកា ជាប់លេខ១តាំងពីថ្នាក់ទី៥ ដល់ទី១១ ប្រាប់គន្លឹះពិសេស៦ចំណុច ក្លាយជាសិស្សឆ្នើម
ចន្លោះមិនឃើញ
ត្រឹមវ័យ១៦ឆ្នាំយុវតីវ័យក្មេង សុង វីរីកា ក្លាយជាជយលាភីលេខ១ ក្នុងការប្រឡងប្រជែងថ្នាក់ជាតិ ក្រោមប្រធានបទយល់ដឹងពីអាស៊ានកាលពីថ្មីៗនេះ ទើបតែប្រគល់រង្វាន់រួចរាល់នៅទីស្នាក់ការរបស់ក្រសួងការបរទេស ហើយត្រៀមប្រកួតប្រជែងបន្តនៅប្រទេសឥណ្ឌូណេស៊ីខាងមុខនេះ។ មុននឹងក្លាយជាជើងឯកក្នុងកម្មវិធីនេះ វីរីកា ក៏ជាសិស្សឆ្នើមម្នាក់ក្នុងថ្នាក់តែងជាប់ចំណាត់ថ្នាក់លេខ១ តាំងពីថ្នាក់ទី៥ ដល់ទី១១។ តទៅនេះគឺជាការចែករំលែកបទពិសោធន៍របស់ វីរីកា ដើម្បីក្លាយជាសិស្សឆ្នើម៖
១. ការតាំងចិត្ត
សិស្សមកពីសាលា Western រូបនេះប្រាប់ថា ដំបូងបំផុតត្រូវមានការតាំងចិត្តឲ្យដល់។ មុននឹងក្លាយជាសិស្សឆ្នើមម្នាក់ ពីមុនមក រីកា មិនសូវយកចិត្តទុកដាក់ ឬខ្វល់ខ្វាយខ្លាំងរឿងពិន្ទុឡើយ រហូតដល់ពេលមួយមិត្តរួមថ្នាក់បានបង្អាប់រឿងពិន្ទុចាញ់គេបានធ្វើឲ្យរីកាមានការរំជួលចិត្តយ៉ាងខ្លាំង។ កត្តានេះហើយបានធ្វើឲ្យយុវតីរូបនេះ មានការតាំងចិត្តថាត្រូវតែរៀនឲ្យពូកែ យកឈ្នះចិត្តខ្លួនឯងឲ្យបាន។
២. ជ្រើសរើសវិធីសាស្ត្ររៀនដែលសមស្របនឹងខ្លួនឯង
វីរីកា លើកឡើងបន្តថា តើយើងចូលចិត្តបរិយាកាសរៀនបែបណា ទើបធ្វើឲ្យមានអារម្មណ៍ល្អ ហើយសប្បាយចិត្តនឹងរៀន។ ដូច្នេះត្រូវធ្វើអ្វីដែលជាចំណង់ចំណូលចិត្តរបស់ខ្លួនឯង មិនចាំបាច់ព្យាយាមរៀនតាមអ្នកណាម្នាក់នោះទេ។ ជាក់ស្ដែងចំពោះរីកាផ្ទាល់ចូលចិត្តមើលមេរៀននៅពេលយប់ នៅកន្លែងស្ងប់ស្ងាត់មានខ្យល់អាកាសល្អ ដូចជានៅរាលហាលក្រៅផ្ទះជាដើម។ ចំពោះលំហាត់ចូលចិត្តធ្វើនៅបណ្ណាល័យ ឬក្នុងថ្នាក់រៀន។
៣. ធ្វើអ្វីដែលត្រូវតែធ្វើ
ប្រសិនបើចង់ក្លាយជាសិស្សឆ្នើមម្នាក់ប្រាកដជាដឹងច្បាស់ខ្លួនឯងហើយថា អ្វីដែលចាំបាច់ត្រូវតែធ្វើ ក្នុងនោះរួមមាន៖ ការអនុវត្តលំហាត់ មើលមេរៀន ស្រាវជ្រាវ ស្វ័យសិក្សាជាមួយមិត្តភក្ដិជាដើម។ ប្រសិនបើចង់រៀនពូកែតែចូលចិត្តអ្វីដែលផ្ទុយពីការរៀបរាប់ខាងលើនេះ ក៏មិនអាចទៅរួចដែរ។
៤. ផ្ដោតអារម្មណ៍ពេលសិក្សា
កូនអ្នករាជធានីភ្នំពេញរូបនេះប្រាប់ទៀតថា ម៉ោងរៀនអ្នកណាក៏ឃើញមានវត្តមានក្នុងថ្នាក់ តែមិនប្រាកដថាកំពុងតែផ្ដោតលើការរៀនទាំងអស់នោះទេ។ ជួនកាលកំពុងតែរៀន តែអារម្មណ៍កំពុងរសាត់អណ្ដែតគិតលើអ្វីផ្សេង ដែលជាកត្តាចម្បងតាមគ្រូលែងទាន់។ វីរីកា បន្តថាត្រូវផ្ដោតអារម្មណ៍ឲ្យបានល្អ កុំឲ្យរំលងចំណុចណាមួយដែលគ្រូកំពុងបង្រៀនឲ្យសោះ ហើយបើមិនយល់ត្រង់ណាត្រូវរូតរះសួរភ្លាមមិនបាច់លាក់ក្នុងចិត្តឡើយ។
៥. បើមិនចូលចិត្តមើលមេរៀនគួរមើលតាមវីដេអូ
ចំណុចនេះ វីរីកា និយាយថា នៅក្នុង YouTube សុទ្ធតែមានវីដេអូបង្រៀនតាមមុខវិជ្ជាផ្សេងៗដូចជា៖ គណិត រូប គីមី គឺអាច Search រកមើលបានទាំងអស់។ រីកាថា ជួនកាលមើលសៀវភៅអាចធ្វើឲ្យមានអារម្មណ៍ថាធុញ តែមើលតាមវីដេអូពេលខ្លះធ្វើឲ្យមានអារម្មណ៍ល្អ ហើយឆាប់យល់ទៀតផង។ ជាពិសេសនោះអាចមើលសារចុះសារឡើង ខុសពីគ្រូបង្រៀនក្នុងថ្នាក់តែចប់គឺចប់ហើយ។
៦. ត្រូវចេះប្រើប្រាស់ស្មាតហ្វូនឲ្យមានប្រយោជន៍
សម័យបច្ចុប្បន្ននេះ បច្ចេកវិទ្យាកាន់តែរីកចម្រើន ហើយក៏ជាផ្នែកមួយជំរុញឲ្យការសិក្សាកាន់តែប្រសើរឡើង។ នៅក្នុងទូរសព្ទគួរតែដាក់កម្មវិធីល្អៗដែលពាក់ព័ន្ធនឹងការសិក្សា អាចដោតឡូតសៀវភៅល្អៗដាក់ក្នុងទូរសព្ទដៃ។ ចំណុចនេះរីកានិយាយថា៖ «បើសៀវភៅយើងដាក់តាមខ្លួនច្រើនក្បាលអាចធ្ងន់ពិបាកយកតាម តែបើក្នុងទូរសព្ទចង់ដោនឡូតប៉ុន្មានរយក្បាលក៏មិនធ្ងន់ដែរ ចង់បើកមើលពេលណាបានពេលហ្នឹង»។
យុវតី សុង វីរីកា បច្ចុប្បន្នអាយុ១៦ឆ្នាំ បើកបវេសនកាលឆ្នាំថ្មីថ្នាក់ទី១២ហើយ មានបងប្អូន៤នាក់ ក្នុងនោះរីកាជាកូនបងគេក្នុងគ្រួសារ។ ក្នុងអំឡុងកញ្ញាខាងមុខនេះរីកា នឹងទៅចូលរួមការប្រកួតប្រជែងការយល់ដឹងពីអាស៊ាន នៅកោះបាលី ប្រទេសឥណ្ឌូណេស៊ី។ គោលដៅទៅថ្ងៃអនាគតរីកា ចង់ក្លាយជាអ្នកធ្វើការក្នុងអង្គការ NASA ឬមួយក៏ធ្វើជាវេជ្ជបណ្ឌិត ព្រោះរីកា ចូលចិត្តផ្នែកវិទ្យាសាស្ត្រ៕
