ប្រយ័ត្នផងអ្នកទៅប្រទេសអារ៉ាប់ ក្រសួងប្រកាសជំងឺឆ្លង១ប្រភេទ គ្រោះថ្នាក់ជីវិត

2018-08-10 05:30:00
ព័ត៌មាន

2018-08-10 05:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

មន្ត្រីជាន់ខ្ពស់ នៃក្រសួងសុខាភិបាល បានជូនដំណឹងឲ្យពលរដ្ឋខ្មែរប្រុងប្រយ័ត្ន ករណីជំងឺឆ្លងប្រភេទថ្មី ដែលអាចបង្កគ្រោះថ្នាក់ដល់ជីវិត សម្រាប់អ្នកធ្លាប់ធ្វើដំណើរ ឬឆ្លងកាត់ទៅកាន់ប្រទេសអារ៉ាប់ និងតំបន់១ចំនួនទៀតនៅឧបទ្វីបមជ្ឈិមបូព៌ា។

ឯកឧត្ដម វេជ្ជបណ្ឌិត លី សូវ៉ាន់ ប្រធាននាយកដ្ឋានប្រយុទ្ធនឹងជំងឺឆ្លង និងជាអ្នកនាំពាក្យក្រសួងសុខាភិបាល បានប្រាប់ Sabay ថា ជំងឺឆ្លងប្រភេទថ្មីនេះ មានឈ្មោះថា រលាកផ្លូវដង្ហើមមជ្ឈិមបូព៌ា (Middle East Respiratory Syndrome MERS)។

ឯកឧត្ដម វេជ្ជបណ្ឌិត លី សូវ៉ាន់ (រូបភាពនាយកដ្ឋានប្រយុទ្ធនឹងជំងឺឆ្លង)

ជំងឺឆ្លងនេះ កំពុងរាតត្បាតនៅក្នុងប្រទេសនៅឧបទ្វីបមជ្ឈិមបូព៌ា និងក្នុងពិភពលោក។ ឯកឧត្ដម បន្តថា ជំងឺនេះ អាចចម្លងពីអ្នកឈឺតាមរយៈការកាន់ ឬប៉ះពាល់គ្នា។

ចំពោះកម្រិតនៃការចម្លងតិច ឬច្រើន យើងមិនអាចកំណត់បានទេ មានន័យថា គឺអាស្រ័យលើ ស្ថានភាពជំងឺ មានអាការៈពីស្រាល ទៅធ្ងន់ធ្ងរ រហូតដល់ស្លាប់តែម្ដង បើមិនបានដឹង និងព្យាបាលទាន់ពេល។

ទោះជាយ៉ាងណា ឯកឧត្ដម វេជ្ជបណ្ឌិត លី សូវ៉ាន់ បញ្ជាក់ថា បច្ចុប្បន្ន ករណីអ្នកឆ្លង ឬស្លាប់ដោយសារជំងឺនេះ មិនទាន់មានវត្តមាន នៅក្នុងប្រទេសកម្ពុជាទេ។

ឯកឧត្ដម ថា យ៉ាងនេះក្ដី ប្រជាពលរដ្ឋត្រូវប្រុងប្រយ័ត្នខ្ពស់ ចំពោះករណីអ្នកដែលមានប្រវត្តិឆ្លងកាត់ទៅតំបន់មានបញ្ហា ព្រោះក្នុងពិភពលោក មានអ្នកស្លាប់ប្រមាណ ៧៩១។

រូបភាពតំណាង

សូមបញ្ជាក់ថា ជំងឺឆ្លងថ្មី ដែលមានឈ្មោះថា រលាកផ្លូវដង្ហើមមជ្ឈិមបូព៌ា កំពុងរាតត្បាត នៅក្នុងប្រទេសអារ៉ាប់អេមីរ៉ាត់ ហ្ស័កដានី គូវែត អូម៉ង់ កាតា អារ៉ាប៊ីសាអូឌីត យ៉េម៉ែន។

តួលេខពីនាយកដ្ឋានប្រយុទ្ធនឹងជំងឺឆ្លងបានឲ្យដឹងថា បើគិតពីត្រឹមខែកក្កដា ឆ្នាំ២០១៨ នៅទូទាំងពិភពលោក មានករណីឆ្លងជំងឺនេះចំនួន ២២២៩ ក្នុងនោះ ៧៩១ បានស្លាប់ ស្មើនឹងអត្រាស្លាប់ ៣០% ភាគច្រើនកើតនៅឧបទ្វីបមជ្ឈិមបូព៌ា។

អត្ថបទ៖ ពៅ រក្សា