- 2018-08-13 06:31:38
- សុខភាព
ដើម្បីដោះស្រាយបញ្ហាប្រឈម ក្រុមហ៊ុនឱសថ១ ត្រៀមបើកវគ្គអប់រំពីជំងឺទឹកនោមផ្អែម រយៈពេល ៣ ឆ្នាំ
- 2018-08-13 06:31:38
- ចំនួនមតិ 0 | ចំនួនចែករំលែក 0
ដើម្បីដោះស្រាយបញ្ហាប្រឈម ក្រុមហ៊ុនឱសថ១ ត្រៀមបើកវគ្គអប់រំពីជំងឺទឹកនោមផ្អែម រយៈពេល ៣ ឆ្នាំ
ចន្លោះមិនឃើញ
ក្រុមហ៊ុនសាណូហ្វីកម្ពុជា ដែលជាក្រុមហ៊ុនផលិតឱសថផ្ដោតការយកចិត្តទុកដាក់លើតម្រូវការអ្នកជំងឺ បានធ្វើការសម្ពោធ "កម្មវិធីអប់រំជំងឺទឹកនោមផ្អែមនៅកម្ពុជា" ដែលមានរយៈពេល ៣ ឆ្នាំ ហៅកាត់ថា CEP-D។ កម្មវិធីនេះធ្វើឡើងក្នុងគោលបំណងចូលរួមចំណែកដោះស្រាយបញ្ហាប្រឈមពីការកើនឡើងនៃជំងឺទឹកនោមផ្អែម នៅសណ្ឋាគារភ្នំពេញ ថ្ងៃទី១១ សីហា ដោយមានវត្តមានក្រុមអ្នកជំនាញថែទាំសុខភាពប្រមាណ ១៥០ នាក់ បានចូលរួម។
អ្នកស្រី ដាវ ធូង៉ា (Dao Thu Nga) នាយកគ្រប់គ្រងក្រុមហ៊ុនសាណូហ្វីកម្ពុជា លើកឡើងថា៖ "គោលបំណងនៃកម្មវិធីអប់រំផ្នែកជំងឺទឹកនោមផ្អែមនៅកម្ពុជានេះ គឺដើម្បីលើកកម្ពស់ការយល់ដឹងជាសាធារណៈ និងផលប៉ះពាល់ដល់សុខភាពយ៉ាងធ្ងន់ធ្ងរដែលបណ្ដាលមកពីជំងឺនេះ។ ម្យ៉ាងវិញទៀត យើងក៏នឹងផ្ដល់ការបណ្ដុះបណ្ដាលដល់សហគមន៍វេជ្ជសាស្ត្រក្នុងប្រទេសជាមួយចំណេះដឹង ព្រមទាំងព័ត៌មានវិទ្យាសាស្ត្រ វេជ្ជសាស្ត្រ ចុងក្រោយបំផុតសម្រាប់ប្រទេសកម្ពុជា"។
កម្មវិធីអប់រំជំងឺទឹកនោមផ្អែម ហៅកាត់ថា CEP-D នេះនឹងរួមបញ្ចូលការអភិវឌ្ឍន៍កម្មវិធីសិក្សា វគ្គបណ្ដុះបណ្ដាលទៅដល់សហគមន៍ពីការថែទាំសុខភាពប្រកបដោយវិជ្ជាជីវៈនៅទូទាំងប្រទេសកម្ពុជា រួមទាំងពង្រឹងការសិក្សារបស់ក្រុមនិស្សិតទៀតផង។ កម្មវិធីនេះនឹងគាំទ្រទៅដល់អ្នកជំងឺទឹកនោមផ្អែម តាមរយៈការគាំទ្រពីក្រុមដែលត្រូវបានបង្កើតឡើង ហើយនិងក្រុមដែលនឹងត្រូវបង្កើតថ្មីផ្សេងទៀត ដោយមានការបង្កើតជាសកម្មភាពអប់រំ និងកម្មវិធីពិនិត្យឈាមជាដើម។ កិច្ចខិតខំប្រឹងប្រែងទាំងនេះ នឹងត្រូវបានធ្វើឡើងតាមរយៈយុទ្ធនាការផ្សព្វផ្សាយព័ត៌មាន និងការចុះផ្សព្វផ្សាយនៅតាមមូលដ្ឋាននៅទូទាំងកម្ពុជា។
យុទ្ធនាការជាបន្តបន្ទាប់រួមមាន ការផ្សព្វផ្សាយតាមបណ្ដាខេត្តនានា ការផ្សព្វផ្សាយតាមរយៈប្រព័ន្ធផ្សព្វផ្សាយ និងតាមរយៈការចែករំលែកព័ត៌មានពីដៃគូសហការដូចជាសមាគមជំងឺទឹកនោមផ្អែម និងក្រពេញនៅកម្ពុជា (CSDE) ក្រសួងសុខាភិបាល សាកលវិទ្យាល័យវិទ្យាសាស្ត្រសុខាភិបាល (UHS) និងភាគីពាក់ព័ន្ធដទៃផ្សេងទៀត។
គម្រោង CEP-D រយៈពេល ៣ ឆ្នាំដែលធ្វើនៅទូទាំងប្រទេសនេះ បានទទួលថវិកាជិត កន្លះលានដុល្លារ ដែលជាសហហិរញ្ញប្បទានរវាងក្រុមហ៊ុនសាណូហ្វី និង KFW DEG ដោយមានការសហការប្រតិបត្តិជាមួយសមាគមគ្រូពេទ្យទឹកនោមផ្អែម និងក្រពេញនៅកម្ពុជា។ ថវិកាទាំងនោះត្រូវបានបញ្ចូលទៅក្នុងវគ្គបណ្ដុះបណ្ដាលសម្រាប់ក្រុមវេជ្ជបណ្ឌិត ប្រមាណ ១១៨០នាក់ ក៏ដូចជានិស្សិតចំនួន ៥០០នាក់ មកពីសាកលវិទ្យាល័យវេជ្ជសាស្ត្រសុខាភិបាល ហើយក៏ដើម្បីលើកកម្ពស់ការយល់ដឹង មិនត្រឹមតែក្នុងចំណោមអ្នកជំងឺទឹកនោមផ្អែមនោះទេ តែថែមទាំងក្នុងចំណោមប្រជាជនកម្ពុជាជារួម ដើម្បីធានាថាប្រជាជនកម្ពុជាយល់ដឹងថាតើតើវាមានសារៈសំខាន់យ៉ាងណាក្នុងការគ្រប់គ្រងជំងឺនេះ។
លោកសាស្ត្រាចារ្យមហាបរិញ្ញាវេជ្ជបណ្ឌិត កុយ វ៉ាន់នី ប្រធានសមាគមគ្រូពេទ្យទឹកនោមផ្អែម និងក្រពេញនៅកម្ពុជា បញ្ជាក់ថា ចំនួនប្រេវ៉ាឡង់នៃជំងឺទឹកនោមផ្អែមនៅកម្ពុជាក្នុងឆ្នាំ ២០១០ មាន ២,៣% ក្នុងតំបន់ជនបទ។ ចំណែកនៅតាមទីក្រុងមាន ៣ ដងខ្ពស់ជាងនៅតាមជនបទ ខណៈដែលប្រជាជនចំនួន ៥,៦% ត្រូវបានរកឃើញថាមានជំងឺនេះដោយផ្អែកតាមការស្ទង់មតិ ដោយក្រសួងសុខាភិបាល។ អត្រានេះគឺ នៅទាបជាងបណ្ដាប្រទេសក្នុងចំណោមប្រជាជនអាស៊ីអាគ្នេយ៍ពិតមែន តែខ្ពស់ជាងបណ្ដាប្រទេសក្នុងតំបន់ប៉ាស៊ីហ្វិកខាងលិច និងប្រទេសផ្សេងៗទៀតនៅលើពិភពលោក។ នេះបើតាមរបាយការណ៍សហព័ន្ធជំងឺទឹកនោមផ្អែមអន្តរជាតិប៉ាស៊ីហ្វិកខាងលិច៕
