- 2018-08-19 05:27:46
- សុខភាព
ថៃ រ៉ាប់រងការព្យាបាលជំងឺបេះដូងពីកំណើតឲ្យកុមារក្រីក្រកម្ពុជា ៧ នាក់ ឆ្នាំនេះ
- 2018-08-19 05:27:46
- ចំនួនមតិ 0 | ចំនួនចែករំលែក 0
ថៃ រ៉ាប់រងការព្យាបាលជំងឺបេះដូងពីកំណើតឲ្យកុមារក្រីក្រកម្ពុជា ៧ នាក់ ឆ្នាំនេះ
ចន្លោះមិនឃើញ
កាលពីថ្ងៃទី ១៧ សីហា ២០១៨ នេះ កុមារកម្ពុជាចំនួន ៧ នាក់ បានទទួលការវះកាត់ព្យាបាលជំងឺបេះដូងពីកំណើតដោយឥតគិតថ្លៃតាមរយៈគម្រោងសប្បុរសធម៌ព្យាបាលជំងឺបេះដូងនៅកម្ពុជា ក្រោមការឧបត្ថម្ភរបស់មូលនិធីមន្ទីរពេទ្យ បំរ៉ុងរ៉ាត់ និងមន្ទីរពេទ្យអន្តរជាតិបំរ៉ុងរ៉ាត របស់ថៃ។
រួមជាមួយស្ថានទូតថៃប្រចាំនៅព្រះរាជាណាកម្ពុជា សមាគមគ្រូពេទ្យស្ម័គ្រចិត្តយុវជនសម្តេចតេជោ(TYDA) មន្ទីរពេទ្យកាល់ម៉ែត និងក្រុមហ៊ុនអាកាសចរណ៍ថៃ AirAsia បានរៀបចំសន្និសីទសារព័ត៌មានស្តីពី គម្រោងសប្បុរសធម៌ព្យាបាលជំងឺបេះដូងនៅកម្ពុជាដែលជាគម្រោងមួយ បង្កើតឡើងក្នុងគោលបំណងប្រើប្រាស់ជំនាញឯកទេស និងធនធានផ្ទាល់របស់មន្ទីរពេទ្យ បំរ៉ុងរ៉ាត់ ដើម្បីផ្តល់ការវះកាត់ព្យាបាលជំងឺបេះដូងពីកំណើតដោយឥតគិតថ្លៃ ជូនដល់កុមារក្នុងប្រទេសជិតខាង។
ក្នុងពេលប៉ុន្មានឆ្នាំមកនេះ មូលនិធិមន្ទីរពេទ្យបំរ៉ុងរ៉ាត់ និងមន្ទីរពេទ្យអន្តរជាតិបំរ៉ុងរ៉ាត់ បានពង្រីកគម្រោងសប្បុរសធម៌មួយនេះនៅប្រទេស មីយ៉ាន់ម៉ា និងវៀតណាម រួចហើយ ដោយឆ្នាំនេះ បានធ្វើឡើងនៅកម្ពុជា ខណៈ តាំងពីឆ្នាំ២០០៣ គម្រោងដដែលនេះបានជួយដល់អ្នកជំងឺបានជាង ៧៧៧នាក់ នៅប្រទេសថៃ។
លោកស្រី Napas Paorohitaya តំណាងមូលនិធិមន្ទីរពេទ្យ បំរ៉ុងរ៉ាត់ និងជានាយកផ្នែកទីផ្សារនៃមន្ទីរពេទ្យដដែលនេះ លើកឡើងថា៖ "គម្រោងដែលផ្តល់ការវះកាត់បេះដូងសម្រាប់កុមារដែលមានជំងឺសរសៃឈាមបេះដូងពីកំណើត ត្រូវបានផ្តួចផ្តើមឡើងក្នុងគោលបំណងដើម្បីជួយកុមារ និងត្រូវការការវះកាត់បេះដូងពិតប្រាកដ។ បើមិនដូច្នេះទេពួកគេនឹងប្រឈមនឹងការស្លាប់មុនអាយុ ឬការលូតលាស់មិនប្រក្រតី។ ការវះកាត់បេះដូងគឺជាការងារដ៏ចាំបាច់ និងស្មុគស្មាញដែលតម្រូវឱ្យមានអ្នកជំនាញផ្នែកវេជ្ជសាស្រ្តខ្ពស់ និងអ្នកឯកទេសខាងវេជ្ជសាស្ត្រ មានបទពិសោធន៍។ ម្យ៉ាង ការវះកាត់មានតម្លៃខ្ពស់ ដែលជាមូលហេតុនាំមូលនិធិមន្ទីរពេទ្យបំរ៉ុងរ៉ាត់បានកកើតឡើងដើម្បីធានាបានថា កុមារត្រូវបានព្យាបាលទាន់ពេលដោយកាត់បន្ថយផលវិបាក និងអត្រាមរណភាពស្របពេលដែលសុខភាពរបស់កុមារត្រូវបានលើកកម្ពស់។ ដើម្បីបង្ហាញពីទំនាក់ទំនងដ៏កក់ក្តៅរវាងថៃ និងកម្ពុជាតាមរយៈកម្មវិធីសុខភាពសាធារណៈ យើងមានសេចក្តីសោមនស្សរីករាយក្នុងការផ្តល់ជូនការវះកាត់បេះដូងដល់កុមារកម្ពុជាដែលមានជំងឺបេះដូងពីកំណើតនៅមន្ទីរពេទ្យ បំរ៉ុងរ៉ាត់ ក្នុងប្រទេសថៃ។ ការវះកាត់នេះនឹងត្រូវបានផ្តល់ជូនដោយឥតគិតថ្លៃដែលអាចជួយសម្រួលដល់ស្ថានភាពលំបាករបស់មន្ទីរពេទ្យនៅកម្ពុជា"។
ឯកឧត្តម Panyarak Poolthup ឯកអគ្គរាជទូតព្រះរាជាណាចក្រថៃប្រចាំកម្ពុជា បានមានប្រសាសន៍ថា៖ "គម្រោងនេះ គឺជាបេសកកម្មដ៏ល្អឧត្តុង្គឧត្តមជាទីបំផុត។ គម្រោងនេះ មិនត្រឹមតែជួយសង្គ្រោះអាយុជីវិតក្មេងៗ ដែលមានជីវភាពក្រីក្រ និងអស់សង្ឃឹមប៉ុណ្ណោះទេ ថែមទាំងជាភស្តុតាងបញ្ជាក់យ៉ាងច្បាស់ពីចំណងសាមគ្គីភាព កិច្ចសហប្រតិបត្តិការ និងមិត្តភាពដ៏រឹងមាំរវាងប្រទេសថៃ និងកម្ពុជាទៀតផង។ គម្រោងសប្បុរសធម៌ព្យាបាលជំងឺបេះដូងនេះ គឺស្តែងឲ្យឃើញពីភាពជាក់ច្បាស់រវាង បេះដូង និង បេះដូង ពោលគឺបញ្ជាក់ពីទឹកចិត្តរបស់ប្រទេសថៃ មានចំពោះប្រទេសកម្ពុជា"។
ឯកឧត្តមសាស្រា្តចារ្យ ឈាង រ៉ា អគ្គនាយកមន្ទីរពេទ្យកាល់ម៉ែត បានបញ្ជាក់ថា៖ «ក្នុងនាមជាប្រជាជនកម្ពុជា ខ្ញុំសូមថ្លែងអំណរគុណ និងសម្តែងនូវការដឹងគុណយ៉ាងជ្រាលជ្រៅជាទីបំផុត ចំពោះម្ចាស់ជំនួយ និងដៃគូទាំងអស់នៃមូលនិធិនេះ។ ខ្ញុំក៏សូមចូលរួមត្រេកអរផងដែរ ជាមួយនឹងកុមារដែលមានជំងឺបេះដូងពីកំណើតនេះ ដែលបានទទួលបានការវះកាត់នៅមន្ទីរពេទ្យអន្តរជាតិ បំរ៉ុងរ៉ាត់ នៅប្រទេសថៃ ដោយឥតគិតថ្លៃ ដែលនេះជាជំនួយដ៏ធំសម្រាប់ប្រជាជនកម្ពុជា ក៏ជាការចាប់ផ្តើម ចូលរួមចំណែកដល់កុមារកម្ពុជាជាមួយមជ្ឈមណ្ឌលជំងឺបេះដូងភ្នំពេញ ដែលធ្លាប់បានជួយវះកាត់ និងពិនិត្យព្យាបាលកុមារកម្ពុជាជាច្រើនមក ហើយគម្រោងនេះ នៅតែត្រូវការដៃគូសហការយូរអង្វែងសម្រាប់អនាគត តទៅទៀត"៕