ទីបំផុត! រកកន្លែងទុកក្រមាវែងបង្អស់ក្នុងលោកឃើញហើយ តែក្ដីបារម្ភធំបំផុតគឺរឿងមួយ

2018-08-19 05:27:01
ការអប់រំ

2018-08-19 05:27:01
ចំនួនមតិ 0 | ចំនួនចែករំលែក 0

ចន្លោះមិនឃើញ

កម្ពុជាបានបង្កើតកំណត់បំបែកក្រមាវែងបំផុតលើពិភពលោក១ ១៤៩ម៉ែត្រ ត្រឹមពេល ០៦ខែ ខណៈពេលនេះការរក្សាស្នាដៃក្រមាដ៏មានតម្លៃ ត្រូវបានតម្កល់នៅសារមន្ទីរជាតិ ដើម្បីឲ្យប្រជាពលរដ្ឋខ្មែរទូទាំងប្រទេស និងភ្ញៀវអន្តរជាតិចូលទស្សនាបន្ត។ យ៉ាងណាទាក់ទិនបច្ចេកទេសរក្សាទុកវិញ អ្នកជំនាញនៅតែមានក្ដីព្រួយបារម្ភខ្លាចសណ្ឋាននៃក្រមាអាចប្រែប្រួលរូបរាងនាថ្ងៃមុខ។

លោក គង់ វីរៈ ប្រធាននាយកដ្ឋានសារមន្ទីរ លើកឡើងថា យើងបារម្ភ ក្រមាអាចប្រែពណ៌ យើងមិនអាចទប់ស្កាត់បាន១០០ភាគរយទេ។ បញ្ហាបារម្ភនោះគឺក្រមាក៏មិនខុសពីក្រណាត់ដទៃ ដែលងាយរងប៉ះពាល់ពីពន្លឺ និងសំណើម ដោយហេតុថាសារមន្ទីរមិនទាន់មានបន្ទប់រក្សាវាយនភណ្ឌដែលមានលក្ខខណ្ឌគ្រប់គ្រាន់នៅឡើយ។

លោក គង់ វីរៈ ប្រធាននាយកដ្ឋានសារមន្ទីរ

លោក វីវៈ បន្តថា យើងមិនអាចការពារពេញលេញ តែយើងកាត់បន្ថយកុំឲ្យក្រមាស្លកពណ៌ រងផលប៉ះពាល់ពីសំណើមបាន យើងអាចប្រើក្រណាត់ខ្មៅគ្របលើវាពេលបិទទ្វារ និងក្នុងករណីខ្លះទៀត យើងនឹងរៀបចំកាលវិភាគតាំងបង្ហាញក្រមា មិនអាចបើកពេញទល់មួយឆ្នាំបានទេ និងតាមដានសាច់ក្រមារៀងរាល់៣ខែម្ដង ក្រែងលោមានសត្វស៊ី។ យ៉ាងណាក្ដី ទីតាំងសារមន្ទីរ ជាទីតាំងអនុគ្រោះមួយទទួលពន្លឺមិនផ្ទាល់ខ្លាំងដល់ការរក្សាទុកវត្ថុបុរាណនានា ជាពិសេសក្រមាដែលអាចការពារបានខ្លះ។

មកទល់សព្វថ្ងៃ សារមន្ទីរជាតិបានប្រមូលរក្សាទុកនូវប្រភេទក្រណាត់ខ្មែរច្រើនប្រភេទ សូត្រ ហ៊ូល ពិដាន មានអាយុជិត១០០ឆ្នាំ តាំងពីបុរេប្រវត្តិ។ ពាក់ព័ន្ធបញ្ហាបច្ចេកទេសនេះ ប្រធានសារមន្ទីរខាងលើ នឹងយកទៅជជែកបន្ថែមជាមួយថ្នាក់ដឹកនាំ ដើម្បីទ្រទ្រង់កម្រិតថវិកាមួយសមរម្យសាងសង់បន្ទប់សម្រាប់ដាក់តាំងវាយនភណ្ឌនាថ្ងៃអនាគត។

ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា ជាសហស្ថាបនិកបង្កើតក្រមាវែងបង្អស់របស់កម្ពុជា ជាមួយក្រុមការងារGoGo Cambodia បង្ហើបថា ទាក់ទងការរក្សាទុកក្រមាឲ្យយូរអង្វែង ក្រុមការងារទាំងអស់នឹងនៅតែរង់ចាំជួយបន្តទៀតទាំងកម្លាំង និងថវិកា ប្រសិនបើមានការស្នើសុំពីខាងសារមន្ទីរ៕