- 2018-08-20 03:31:24
- ការអប់រំ
ខេត្តណាខ្លះ ប្រកាសបន្តផ្ដល់រង្វាន់ធំដល់អ្នកបាននិទ្ទេសA?
- 2018-08-20 03:31:24
- ចំនួនមតិ 0 | ចំនួនចែករំលែក 0
ខេត្តណាខ្លះ ប្រកាសបន្តផ្ដល់រង្វាន់ធំដល់អ្នកបាននិទ្ទេសA?
ចន្លោះមិនឃើញ
ខណៈការប្រលងសញ្ញាបត្រមធ្យមទុតិយភូមិ(បាក់ឌុប)បានចាប់ផ្តើមនៅថ្ងៃនេះ ថ្នាក់ដឹក និងអ្នកតំណាងរាស្ត្រនៅខេត្តចំនួន ៥ បានប្រកាសបន្តផ្ដល់រង្វាន់លើកទឹកចិត្តដល់បេក្ខជនប្រលងសញ្ញាបត្របាក់ឌុបបាននិទ្ទេស A។
តួយ៉ាងបេក្ខជនរស់នៅក្នុងខេត្តកណ្ដាលបើប្រលងជាប់និទ្ទេស A ឯកឧត្ដម ម៉ៅ ភិរុណ អភិបាលខេត្តនឹងផ្ដល់រង្វាន់ម៉ូតូ ១ គ្រឿង។ ការប្រកាសនេះត្រូវបានធ្វើឡើងក្នុងពិធីសំណេះសំណាលជាមួយនឹងគ្រូបង្រៀន និងសិស្សថ្នាក់ទី១២ កាលពីថ្ងៃទី១៦ កន្លងមកនេះ។ បន្ថែមលើនេះឯកឧត្ដម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានក្រុមការងារថ្នាក់ជាតិចុះជួយស្រុកកោះធំ ខេត្តកណ្ដាលក៏បានប្រកាសផ្ដល់រង្វាន់ម៉ូតូម្នាក់១ គ្រឿងដល់បេក្ខជនប្រលងជាប់និទ្ទេស A នៅស្រុកកោះធំផងដែរ។
ឯកឧត្ដម ស ថាវី អភិបាលខេត្តឧត្តរមានជ័យក៏បានសន្យាផ្ដល់រង្វាន់ scopy ស៊េរីឆ្នាំ២០១៨ ដើម្បីជាការលើកទឹកចិត្តដល់សិស្សទទួលបាននិទ្ទេស A ដែរ ខណៈការប្រកាសនេះត្រូវបានធ្វើឡើងកាលពីថ្ងៃទី ១៩ ខែសីហា នេះក្នុងពិធីសំណេះសំណាល ជាមួយនឹងបេក្ខជនប្រលង ៩៩១នាក់ ។
ចំណែកខេត្តកោះកុងវិញ លោកជំទាវអភិបាលខេត្ត មិថុនា ភូថង បានប្រកាសផ្តល់រង្វាន់លើកទឹកចិត្តដល់បេក្ខជនប្រលងបាក់ឌុបជាប់នូវទឹកប្រាក់ចំនួន១ ០០០ដុល្លារ។ ខេត្តកោះកុងមានបេក្ខជនប្រលងបាក់ឌុបជិត១ ពាន់នាក់ មណ្ឌលប្រលងចំនួន ៣ និងអ្នកសង្កេតការណ៍ ៤៧នាក់។
ក៏មានដែរ ចំពោះបេក្ខជនឆ្នើមនិទ្ទេស A មកពីខេត្តព្រះសីហនុ ដោយទទួលបានម៉ូតូម្នាក់១គ្រឿង។ នេះបើតាមឯកឧត្ដម យន្ត មីន អភិបាលខេត្តព្រះសីហនុ ដែលបានសរសេរនៅលើបណ្ដាញសង្គមកាលពីពេលថ្មីៗនេះ។ ឯកឧត្ដមថា តាមការពីគ្រោះយោបល់ និងការសម្រេចរបស់ឯកឧត្ដម ប៉ុល សារឿន ប្រធានគណៈពង្រឹងកូនសិស្សប្រលងទុតិយភូមិ(បាក់ឌុប)ឆ្នាំនេះ និងបានការផ្ដល់ជារង្វាន់នូវម៉ូតូម្នាក់១គ្រឿងចំពោះជ័យលាភីនិទ្ទេសA និងបានអំពាវនាវឱ្យបេក្ខជនប្រឹងប្រែងឱ្យអស់សមត្ថភាព។
វិលមកខេត្តព្រៃវែងឯណេះវិញចំពោះសិស្សនិទ្ទេស A នឹងទទួលបានម៉ូតូ១គ្រឿងដដែល សម្រាប់ លោកគ្រូ ឬអ្នកគ្រូ ក៏នឹងទទួលបានម៉ូតូផងដែរ ប្រសិនបើមុខវិជ្ជា របស់សិស្សនិទ្ទេស A ណាមួយ ដែលលោក គ្រូ អ្នកគ្រូបង្រៀនបំប៉ន ទទួលបានពិន្ទុខ្ពស់ជាងគេ។ នេះបើយោងតាមការលើកឡើងរបស់ឯកឧត្ដម ស សុខា បានសរសេរនៅលើបណ្តាញសង្គម Facebook កាលពីពេលថ្មីៗ។
ការប្រលងសញ្ញាប័ត្រមធ្យមសិក្សាទុតិយភូមិ(បាក់ឌុប) ឆ្នាំ២០១៨ នេះមាន មានមណ្ឌលប្រលងចំនួន១៩៦មណ្ឌល និងមានបេក្ខជនទាំងអស់ចំនួន ១១៧ ០៦១នាក់ ខណៈឆ្នាំមុនមានបេក្ខជនប្រលង សរុបចំនួនជាង១០១ ៤១០ នាក់ ស្រី ៥០ ០៤៩ នាក់ និងមានមណ្ឌលប្រលងចំនួន ១៧៨ មណ្ឌល ក្នុងនោះថ្នាក់វិទ្យាសាស្ត្រ មាន ១០៨ មណ្ឌល និងថ្នាក់វិទ្យាសាស្ត្រសង្គម មាន ៧០ មណ្ឌល ត្រូវជា ៤០៩៣បន្ទប់ ទូទាំងប្រទេស៕
