- 2018-08-20 03:47:30
- ការអប់រំ
រដ្ឋមន្រ្តីអប់រំ៖ ចំនួនសិស្សប្រឡងបាក់ឌុបកើនឡើង ហើយដំណើរការប្រឡងកាន់តែល្អ
- 2018-08-20 03:47:30
- ចំនួនមតិ 0 | ចំនួនចែករំលែក 0
រដ្ឋមន្រ្តីអប់រំ៖ ចំនួនសិស្សប្រឡងបាក់ឌុបកើនឡើង ហើយដំណើរការប្រឡងកាន់តែល្អ
ចន្លោះមិនឃើញ
លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានអញ្ជើញបើកវិញ្ញាសារប្រឡងមធ្យមសិក្សាទុតិយភូមិ (បាក់ឌុប) នៅមណ្ឌលប្រឡងវិទ្យាល័យព្រះស៊ីសុវត្ថិ នៅព្រឹកថ្ងៃទី២០ ខែសីហា ឆ្នាំ២០១៨នេះ។
លោករដ្ឋមន្ត្រីបានថ្លែងថា ឆ្នាំនេះ គឺជាឆ្នាំទី៥ហើយ ដែលក្រសួងអប់រំ យុវជន និងកីឡា រៀបចំឲ្យមានកំណែទម្រង់ការប្រឡងសញ្ញាបត្រមធ្យមសិក្សាទុតិយភូមិ ហើយលទ្ធផលល្អប្រសើរនេះបានដោយការសហការជាមួយអង្គភាពប្រឆាំងអំពើពុករលួយ និងសហភាពសហព័ន្ធយុវជនកម្ពុជា នៅក្នុងការរៀបចំការប្រឡង ក៏ដូចជាការបំប៉នសិស្សដើម្បីឲ្យគាត់ខិតខំប្រឹងប្រែងរៀនសូត្របន្ថែមទៀត។
សូមចុចអាន៖ ទិដ្ឋភាព សង្គ្រោះបន្ទាន់បេក្ខជនប្រលងបាក់ឌុប ព្រឹកមិញ នៅខេត្តក្រចេះ
លោកបានបន្តថា នៅឆ្នាំនេះ ចំនួនសិស្សមានការកើនឡើង គឺជាង ១០ម៉ឺននាក់ និងមណ្ឌលប្រឡងកើនឡើងដល់ ១៩៦មណ្ឌល។ លោកបន្ដថា ក្រសួងបានប្តូរមណ្ឌលប្រឡងមួយមណ្ឌលនៅខេត្តកំពត ដោយសារភ្លៀងធ្លាក់ប៉ុន្មានថ្ងៃជាប់គ្នា បណ្ដាលឲ្យទឹកលិច ហើយបានប្តូរទៅកន្លែងដែលមានសុវត្ថិភាព។
លោកបញ្ជាក់ថា ពីមួយឆ្នាំទៅមួយឆ្នាំ ដំណើការប្រឡងកាន់តែល្អ ហើយមិនឃើញសិស្សណាម្នាក់កាន់សំណៅឯកសារ ឬគ្រឿងអេឡិចត្រូនិកចូលមណ្ឌលប្រឡងទេ។ ហើយទាំងអនុរក្ស មេប្រយោគ បានបំពេញការងារក្នុងការទទួលខុសត្រូវទាំងអស់គ្នា។
ចំណែកលោក ឃាង សេង អនុប្រធានអង្គភាពប្រឆាំងអំពើពុករលួយបានថ្លែងថា សម្រាប់ការប្រឡងឆ្នាំនេះ អង្គភាពប្រឆាំងអំពើពុករលួយបានដាក់អ្នកសង្កេតការណ៍ជាង ៥ ០០០នាក់ និងសម្រាប់នៅភ្នំពេញមានជាង ៩០០នាក់។ ហើយការប្រឡងនេះ អនុវត្តគោលការណ៍ច្បាប់ តម្លាភាព យុត្តិធម៌ និងទទួលយកបាន។ ការប្រឡងនេះ នឹងកាត់បន្ថយឲ្យអស់នៅចំណុចអវិជ្ជមានដែលកើតឡើងកន្លងមក និងទទួលបានលទ្ធផលល្អជាងបណ្តាឆ្នាំមុនៗ។
រីឯលោក ឃួង ស្រេង អភិបាលរាជធានីភ្នំពេញបានថ្លែងថា ការពារសន្តិសុខសម្រាប់ការប្រឡងនៅមណ្ឌលរាជធានីភ្នំពេញ គឺអាចធានាបាន។ លោកថា សាលារាជធានីភ្នំពេញ បានជួយរៀបចំកន្លែងផ្ញើកង់ ម៉ូតូ ដោយមិនឲ្យយកលុយទេ។
លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានបញ្ជាក់ថា សហភាពសហព័ន្ធយុវជនកម្ពុជា បានដាក់អ្នកសង្កេតការណ៍ប្រឡងចំនួន ៦០០នាក់។
ក្រសួងអប់រំ យុវជន និងកីឡា បានបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ ដែលប្រព្រឹត្តធ្វើឡើងនៅថ្ងៃទី២០ ខែសីហា ឆ្នាំ២០១៨នេះ គឺមានបេក្ខជនសរុប ១១៧ ០៦១នាក់ និងមានមណ្ឌលប្រឡងសរុប ១៩៥មណ្ឌល ចែកចេញជា ៤៧១៦បន្ទប់ នៅ ២៥ រាជធានី-ខេត្តទូទាំងប្រទេស។
ការប្រឡងនេះ នឹងត្រូវប្រកាសលទ្ធផលនៅតាមមណ្ឌលប្រឡងនីមួយៗ នារសៀលថ្ងៃទី១១ ខែកញ្ញា ឆ្នាំ២០១៨ សម្រាប់មណ្ឌលប្រឡងនៅរាជធានីភ្នំពេញ និងខេត្តកណ្តាល និងនៅថ្ងៃទី១២ ខែកញ្ញា ឆ្នាំ២០១៨ សម្រាប់មណ្ឌលប្រឡងនៅខេត្តផ្សេងៗ៕
