- 2018-08-20 08:16:47
- ការអប់រំ
ករណីបេក្ខជនម្នាក់ប្រលងបន្ទប់១ម្នាក់ឯង នៅកំពង់ស្ពឺត្រូវបានបកស្រាយ
- 2018-08-20 08:16:47
- ចំនួនមតិ 0 | ចំនួនចែករំលែក 0
ករណីបេក្ខជនម្នាក់ប្រលងបន្ទប់១ម្នាក់ឯង នៅកំពង់ស្ពឺត្រូវបានបកស្រាយ
ចន្លោះមិនឃើញ
រូបថតមួយសន្លឹក ដែលបានបង្ហាញឱ្យឃើញបេក្ខជនម្នាក់អង្គុយប្រលងនៅបន្ទប់មួយតែម្នាក់ឯង ត្រូវបានអ្នកប្រើប្រាស់បណ្តាញសង្គម Faebook ជាច្រើនមានការងឿងឆ្ងល់ជាខ្លាំង ។ រូបភាពនេះត្រូវបានបង្ហោះដោយមន្រ្តីអ្នកសង្កេតការ ខណៈឯកឧត្ដម ឱម យិនទៀង ប្រធានអង្គភាពប្រឆាំងអំពើពុករលួយ ចុះពិនិត្យផ្ទាល់ នៅមណ្ឌលប្រលងមួយក្នុងខេត្តកំពង់ស្ពឺ។
ទាក់ទងនឹងបញ្ហានេះ លោក ថន ថារិន ប្រធានមន្ទីរអប់រំយុវជន និងកីឡាបានថ្លែងថា បេក្ខជនរូបនេះប្រលងនៅមណ្ឌលបឋមសិក្សាវល្លិ៍ បន្ទប់លេខ១៣ ដែលស្ថិតក្នុងខេត្តកំពង់ស្ពឺ ហើយមូលហេតុ ដែលត្រូវប្រលងម្នាក់ឯងគ្រប់មុខវិជ្ជានេះ ដោយសារក្នុងមួយបន្ទប់ក្រសួងអប់រំតម្រូវឱ្យមានបេក្ខជនប្រលងតែ ២៥ នាក់ប៉ុណ្ណោះ ប៉ុន្តែដោយសារលើសម្នាក់ទើបត្រូវបំបែកឱ្យប្រលងបន្ទប់មួយម្នាក់ឯងបែបនេះ។ លោកថា យុវជននេះមានឈ្មោះ សេម វិចិត្រ មកពីវិទ្យាល័យទ័ពមានជ័យ ស្ថិតនៅក្នុងស្រុកគងពិសីខេត្តកំពង់ស្ពឺ។ “អញ្ចឹងការប្រលងគឺ ត្រូវធ្វើដូចគេដូចឯងដែរ បើទោះជាត្រូវប្រលងបន្ទប់មួយម្នាក់ឯងមែនពិត ដោយបន្ទប់នេះមានអនុរក្សពីរនាក់ចាំត្រូតពិនិត្យមើលការប្រលង”។
លោកបានឱ្យដឹងថា ការប្រលងសញ្ញាបត្រមធ្យមសិក្សាទុតិយភូមិ(បាក់ឌុប)នៅខេត្តកំពង់ស្ពឺឆ្នាំនេះមានបេក្ខជនជាង ៤ពាន់នាក់ប្រលង ខណៈទិដ្ឋភាពទូទៅនៃការប្រលងមួយព្រឹកមកនេះ គឺដំណើរការទៅដោយរលូនទាំងបញ្ហាសន្តិសុខសណ្ដាប់ និងអាកាសធាតុគឺអំណោយផលល្អ។ “មែនទែនទៅមានម្នាក់ដែរ ដែលគាត់វិលមុខ ប៉ុន្តែអាចដំណើរការបានដោយសារយើងបានសម្រួលឱ្យគាត់អង្គុយខាងក្រៅបន្ទប់ … អញ្ចឹងទាំង អាកាសធាតុ ទាំងបេក្ខជន ទាំងការបំពេញការងាររបស់គណៈមេប្រយោគម៉ោងពេលគឺត្រឹមត្រូវល្អ”។
ឯកឧត្ដម វ៉ី សំណាង អភិបាលខេត្តកំពង់ស្ពឺ ក្នុងពិធីកាត់ក្រដាសវិញ្ញាសាប្រលងកាលពីព្រឹកមិញបានអំពាវនាវដល់បេក្ខជនទាំងអស់គោរពតាមការណែនាំរបស់ក្រសួងអប់រំយុវជន និងកីឡា ឲ្យបានម៉ត់ចត់បំផុត។ បន្ថែមលើនេះដើម្បីជាការលើកទឹកចិត្ត ខ្ញុំនិងផ្ដល់ម៉ូតូ ចំនួនមួយគ្រឿង ចំពោះប្អូនៗណាដែលទទួលបាននិទ្ទេស A៕
រូបថត៖ ACU
