- 2018-09-04 09:00:36
- ចរាចរណ៍
ការស្ថាបនារង្វង់មូលនៅម្ដុំដីក្រហម (ស្រ្តីបីកួរស្រូវ) នឹងបញ្ចប់រួចរាល់នៅចុងខែនេះ
- 2018-09-04 09:00:36
- ចំនួនមតិ 0 | ចំនួនចែករំលែក 0
ការស្ថាបនារង្វង់មូលនៅម្ដុំដីក្រហម (ស្រ្តីបីកួរស្រូវ) នឹងបញ្ចប់រួចរាល់នៅចុងខែនេះ
ចន្លោះមិនឃើញ
ការស្ថាបនារង្វង់មូលដីក្រហមអមដោយសួនច្បារដ៏ស្រស់ស្អាត និងរូបស្ត្រី បីកួរស្រូវនឹងត្រូវបញ្ចប់ការសាងសង់ជាស្ថាពរនៅចុងខែកញ្ញានេះ។ នេះបើតាមប្រសាសន៍ លោក ម៉េត មាសភក្តី អ្នកនាំពាក្យសាលារាជធានីភ្នំពេញ បានថ្លែងប្រាប់។
លោកបានបន្ថែមថា ការសាងសង់រង្វង់មូលនេះ ត្រូវបានធ្វើឡើងដូចគ្នាទៅនឹងរង្វង់មូលនៅទីតាំងផ្សេងទៀត ដោយមានការរៀបចំសួនច្បារ និងភ្លើងបំភ្លឺដ៏ស្រស់ស្អាត ខណៈរង្វង់មូលនេះនឹងអាចជាទីតាំងប្រាប់ពីភូមិសាស្ត្រ មកកាន់រាជធានីភ្នំពេញ ការបញ្ចៀសការកកស្ទះ ព្រមទាំងលើកសោភ័ណភាពតំបន់នោះឱ្យកាន់តែស្រស់ស្អាត។
“អញ្ចឹងការស្ថាបនារង្វង់មូលនេះមានការរៀបជាខឿន និងចម្លាក់បីកួស្រូវ ធ្វើពីថ្មភក់ ដែលមានទំហំធំជាងមុនមួយគុណនឹងពីរ ហើយរូបស្រ្តីបីកួរស្រូវនេះ គឺយើងស្ថាបនាតាមរូបសំណាកដើម ដែលធ្លាប់សាងសង់នៅទីតាំងដដែលនេះ”។
រង្វង់មូលអតីតដីក្រហម ឬស្រ្តីកាន់កួរស្រូវ កាលពីមុនស្ថិតនៅក្រោមការគ្រប់គ្រងរដ្ឋបាលរបស់ខេត្តកណ្ដាល តែពេលនេះស្ថិតក្រោមការគ្រប់គ្រងរដ្ឋបាលរបស់រាជធានីភ្នំពេញវិញ ដែលមានទីតាំងនៅចំណុចផ្លូវបំបែកជា៤ គឺផ្លូវជាតិលេខ ២ មានពីរកំណាត់ (ទៅពីតាខ្មៅចូលរង្វង់មូល និងចេញទៅខេត្តតាកែវ)ផ្លូវលេខ២០A និងផ្លូវព្រៃកជ្រៃ ស្ថិតនៅសង្កាត់រលួស ខណ្ឌដង្កោ រាជធានីភ្នំពេញ។
លោកសាំ ពិសិដ្ឋ នាយកមន្ទីរ សាធារណការ និងដឹកជញ្ជូនរាជធានីភ្នំពេញធ្លាប់បានឱ្យដឹងថា មន្ទីរបានដំណើរការស្ថាបនា កែលម្អរង្វង់មូលខាងលើនេះឱ្យមានសោភ័ណភាព សម្រួលដល់ការធ្វើដំណើររបស់ប្រជាពលរដ្ឋ និងជំរុញឱ្យបានរួចរាល់ទាន់ថ្ងៃភ្ជុំបិណ្ឌ នាពេលឆាប់ៗខាងមុខនេះ ។
ការងារស្ថាបនារង្វង់មូលអតីត ដីក្រហមនេះ មានការចាក់ដី និងខ្សាច់លើកកម្ពស់រង្វង់មូល ស្ថាបនាសួនដាំស្មៅ ផ្កា ដាំដើមឈើ បង្គោលភ្លើង និងការស្ថាបនាផ្លូវបេតុងជុំវិញ។ រង្វង់មូលនេះមានការដាក់តាំងរូបសំណាកដែលធ្វើអំពីថ្មភក់ ប៉ុន្តែរូបសំណាកស្ត្រីកាន់កួស្រូវត្រូវបានជំនួសរូប សំណាកស្ត្រីទូលក្អម ដែលត្រូវយកចេញ៕
រូបភាព៖ សាលារាជធានីភ្នំពេញ