- 2018-09-07 04:04:37
- ព័ត៌មាន
តោះ! ជុំគ្នាជួយសម្អាតទីក្រុងយើងក្នុង«ទិវាសំអាតពិភពលោក» ដំបូងបង្អស់នៅកម្ពុជា
- 2018-09-07 04:04:37
- ចំនួនមតិ 0 | ចំនួនចែករំលែក 0
តោះ! ជុំគ្នាជួយសម្អាតទីក្រុងយើងក្នុង«ទិវាសំអាតពិភពលោក» ដំបូងបង្អស់នៅកម្ពុជា
ចន្លោះមិនឃើញ
ទីបំផុត«ទិវាសំអាតពិភពលោក» ត្រូវបានប្រារព្ធជាផ្លូវការហើយនៅកម្ពុជា ដែលនឹងធ្វើស្របគ្នាជាមួយប្រទេសឯទៀតទូទាំងពិភពលោក នៅព្រឹក ថ្ងៃទី ១៥ កញ្ញា ចាប់ពីម៉ោង ៦ ដល់ ម៉ោង១១ព្រឹក ដោយចំណុចជួបជុំគឺនៅមុខក្រសួងបរិស្ថាន។ ព្រឹត្តិការណ៍បរិស្ថានពិភពលោកនេះរៀបចំជាលើកដំបូងនៅកម្ពុជា ដោយក្រសួងបរិស្ថាន សហការជាមួយអង្គការ GoGreen និងLet's Do It។
យោងតាមរបាយការណ៍របស់ក្រសួងបរិស្ថានកម្ពុជា នៅឆ្នាំ២០១៧ បានឲ្យដឹង បានចាក់ចោលសំរាមប្រមាណ ១.៤២លានតោន ហើយ ៦០% គ្រប់គ្រងមិនបានត្រឹមត្រូវ ក្នុងនោះ១៥.៧៤% ជាប្លាស្ទិកដែលអាចកប់ទៅក្នុងដី និងចូលទៅក្នុងទឹក។
ឥលូវនេះ«ទិវាសំអាតពិភពលោកកម្ពុជា» កំពុងស្វះស្វែងអំពាវនាវឲ្យអ្នកចូលរួមឲ្យបានច្រើនបំផុត មកពីវិស័យផ្សេងៗ គ្នានៅក្នុងខេត្តក្រុងទាំង ២៥ទូទាំងប្រទេស ដើម្បីធ្វើសកម្មភាពរួមគ្នាក្នុងរយៈពេល ១ថ្ងៃនេះដើម្បីស្មារតីស្រលាញ់បរិស្ថាន។
«ឱកាសនេះមិនត្រឹមតែដើម្បីសម្អាតទីក្រុងយើងប៉ុណ្ណោះទេ វាក៏ជាសកម្មភាពមួយលើស្ទួយស្មារតីស្រលាញ់ និងយកចិត្តទុកដាក់ចំពោះបរិស្ថានយើង ព្រោះជួនការយើងមានទឹកចិត្ត យើងចង់ឲ្យបរិស្ថានយើងស្អាត តែគ្រាន់តែមិនមានឱកាសចូលរួមសម្អាតទីក្រុងយើងប៉ុណ្ណោះ។ ដូច្នេះឥលូវនេះយើងមានឱកាសហើយ ខ្ញុំសង្ឃឹមថាបងប្អូនគ្រប់វ័យ និងគ្រប់ស្រទាប់វណ្ណៈចូលរួមឲ្យបានច្រើន»។ នេះបើតាមការលើកឡើងរបស់លោក វ៉េង រចនា ប្រធានផ្នែកទំនាក់ទំនង នៃក្រុមហ៊ុន Sabay ដែលជាដៃគូសហការរៀបចំកម្មវិធីនេះ។
«គ្រាន់តែលះបង់ ៥ម៉ោងនៃពេលវេលារបស់អ្នក នៅព្រឹកថ្ងៃសៅរ៍ទី ១៥ កញ្ញា ដើររើសសំរាម ជួយសំអាតទីក្រុងយើង ជុំគ្នាជាមួយបងប្អូនខ្មែរយើងជាច្រើននាក់ទៀតក្នុងបរិយាកាសសប្បាយៗ យើងនឹងបានទីក្រុងស្អាត ហើយប្រជាជនក៏កាន់តែមានសុខភាពល្អដែរ»។ លោកអំពាវនាវបន្ថែម។
World Cleanup Days ជាចលនាសកលមួយដែលផ្សារភ្ជាប់មនុស្ស និងបរិស្ថាននេះ ធ្វើឡើងក្នុងគោលដៅធ្វើឲ្យពិភពលោកស្អាតគ្មានសំរាម។ ទិវានេះធ្វើជារៀងរាល់ឆ្នាំនៅ ១៥០ប្រទេស ជុំវិញពិភពលោក ដែលមានមនុស្សចូលរួមប្រហែល ៣៨០លាននាក់ ស្មើនឹង៥% នៃប្រជាជនសរុបទូទាំងពិភពលោក ដោយពួកគេបានចូលរួមសម្អាត កន្លែងធ្វើការ គ្រឹះស្ថានសិក្សា និង ទីសាធារណៈ។
ទិវានេះត្រូវបានលេចឡើងឆ្លើយតបនឹងការកើនឡើងនូវការបោះចោលសំរាមប្រមាណ ៤ពាន់លានតោននៅលើផែនដី ក្នុងនោះមានប្លាស្ទិក ជាង ៨លានតោន ត្រូវបានចាក់ចូលទៅក្នុងសមុទ្រ ជារៀងរាល់ឆ្នាំ។ ការបោះចោលសំរាមមិនបានត្រឹមត្រូវ មិនគ្រាន់តែធ្វើឲ្យខូចបរិស្ថានប៉ុណ្ណោះទេ វាថែមទាំងបានបំផ្លាញនូវធនធានសម្រាប់ចិញ្ចឹមមនុស្សលើភពផែនដីផងដែរ។
ចាប់អារម្មណ៍ចូលរួមជាមួយយើងទេ? សូមចុះឈ្មោះឥលូវនេះ នៅទីនេះ ព័ត៌មានបន្ថែមសូមចូលទៅផេក World Clean Up Day Cambodia៕