ចេញហើយកម្មវិធីលម្អិត«ទិវាសម្អាតពិភពលោក»ដំបូងនៅកម្ពុជា អ្នកអត់ទាន់សម្រេចចិត្តអាចគិតគូរបាន

2018-09-10 12:24:35
ព័ត៌មាន

2018-09-10 12:24:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្មីៗនេះ កម្មវិធីលម្អិតពីទិវាសម្អាតពិភពលោកលើកទី១ នៅកម្ពុជា ដែលនឹងប្រព្រឹត្តទៅនៅថ្ងៃ សៅរ៍ ទី១៥ កញ្ញានេះ ត្រូវបង្ហោះជាសាធារណៈហើយ នៅលើហ្វេសប៊ុកផេកផ្លូវការរបស់ World Clean Up Day Cambodia។ កម្មវិធីនេះនឹងជូនជាព័ត៌មានបន្ថែម ធ្វើឲ្យបងប្អូនខ្មែរដែលកំពុងស្ទាក់ស្ទើរមិនទាន់ច្បាស់ក្នុងចិត្តថាគួរចូលរួម ឬអត់នោះ អាចសម្រេចចិត្តបានឆាប់រហ័ស។

នៅតែ ៥ថ្ងៃទៀតទេ ដល់ទិវាសម្អាតពិភពលោកហើយ តើអ្នកបានចុះឈ្មោះចូលរួមនៅ?ដើម្បីចូលរួមសូមចុះឈ្មោះ នៅទីនេះ

ក្រសួងបរិស្ថានកម្ពុជាក៏បានបង្ហោះវីដេអូខ្លីមួយពីបុគ្គលសំខាន់ៗអំពាវនាវឲ្យមានការចូលរួមឲ្យបានច្រើនបំផុតក្នុងទិវាសម្អាតពិភពលោកនេះ ដើម្បីលើកស្ទួយស្មារតីស្រលាញ់បរិស្ថាន តាមរយៈការធ្វើសកម្មភាពរួមគ្នាក្នុងរយៈពេល ១ថ្ងៃនេះ ។ ព្រឹត្តិការណ៍បរិស្ថានពិភពលោកនេះត្រូវបានប្រារព្ធឡើងនៅ ១៥០ប្រទេសទូទាំងពិភពលោក ហើយកម្ពុជាក៏ត្រូវបានជាប់នៅក្នុងទំព័រ ប្រវត្តិសាស្រ្ត នៃការសំអាតដែលមានការចូលរួមពីអ្នកស្ម័គ្រចិត្តដ៏ច្រើនរាប់រយលាននាក់ ចំណែកប្រជាជនកម្ពុជាពីគ្រប់វិស័យ ក៏ត្រូវបានគេរំពឹងថានឹងចូលរួមយ៉ាងច្រើនកុះករដែរដើម្បីសំអាតប្រទេសរបស់យើង និងលើស្ទួយស្មារតីស្រលាញ់បរិស្ថានដែរ។

ជាក់ស្ដែងនៅកម្ពុជាក្នុងឆ្នាំ២០១៧ មានការចាក់ចោលសំរាមប្រមាណ ១,៤២លានតោន ហើយ ៦០% គ្រប់គ្រងមិនបានត្រឹមត្រូវ ក្នុងនោះ១៥,៧៤% ជាប្លាស្ទិកដែលអាចកប់ទៅក្នុងដី និងចូលទៅក្នុងទឹក។ នេះបើយោងតាមរបាយការណ៍របស់ក្រសួងបរិស្ថាន ឆ្នាំ២០១៧។

ទោះជាសកម្មភាពជួបជុំគ្នារើសសំរាមសម្អាតទីក្រុងនេះ ធ្លាប់មានរួចហើយនៅកម្ពុជាក្តី តែនេះជាលើកដំបូងកម្ពុជារៀបចំឲ្យមាន ទិវាសម្អាតពិភពលោកជាផ្លូវការ ក្រោមការដឹកនាំដោយក្រសួងបរិស្ថានកម្ពុជា និងសហការរៀបចំដោយ អង្គការ GoGreen Cambodia និង Let's Do It។ ព្រឹត្តិការណ៍នេះនឹងធ្វើដំណាលគ្នា ថ្ងៃតែមួយនៅ ២៥ខេត្តក្រុងទូទាំងប្រទេសកម្ពុជាក្រោយការដឹកនាំរបស់តំណាងមន្ទីរ និងក្រសួងបរិស្ថាន ។ សម្រាប់អ្នកនៅភ្នំពេញ អ្នកចូលរួមទាំងអស់នឹងត្រូវជួបជុំគ្នានៅមុខក្រសួងបរិស្ថាននៅម៉ោង ៦ព្រឹក ហើយបញ្ចប់នៅម៉ោង ១១ថ្ងៃត្រង់។

ចង់ដឹងថាតើបុគ្គលសំខាន់ណាខ្លះ និយាយអ្វីខ្លះពាក់ព័ន្ធនឹងព្រឹត្តិការណ៍ World Clean Up Day ២០១៨នេះសូមមើលវិដេអូ៖

អត្ថបទ៖ ដេត លីដា