- 2018-09-14 07:41:45
- សេដ្ឋកិច្ច
ក្រសួងបរិស្ថាន៖ ក្រុមមន្ត្រីកំពុងចុះពិនិត្យ និងទប់ស្កាត់កុំឲ្យដីបន្តហូរចូលសមុទ្រ បង្កទឹកល្អក់តាមឆ្នេរសមុទ្រ
- 2018-09-14 07:41:45
- ចំនួនមតិ 0 | ចំនួនចែករំលែក 0
ក្រសួងបរិស្ថាន៖ ក្រុមមន្ត្រីកំពុងចុះពិនិត្យ និងទប់ស្កាត់កុំឲ្យដីបន្តហូរចូលសមុទ្រ បង្កទឹកល្អក់តាមឆ្នេរសមុទ្រ
ចន្លោះមិនឃើញ
ក្រុមបុគ្គលិកនៃមន្ទីរបរិស្ថានខេត្តព្រះសីហនុ កំពុងចុះពិនិត្យ និងអប់រំផ្សព្វផ្សាយដល់ម្ចាស់ការដ្ឋានសាងសង់នានា ដោយធ្វើយ៉ាងណាទប់ដី កុំឲ្យហូរចូលអូរ ឬតាមឆ្នេរបង្កឲ្យកើតមានការល្អក់កករ នៅតាមឆ្នេរសមុទ្រ។ វិធានការនេះធ្វើឡើងក្រោយពីប៉ុន្មានថ្ងៃនេះ មានភ្លៀងធ្លាក់ច្រើនហូរនាំយកដីចូលទៅក្នុងសមុទ្រ ដែលធ្វើឲ្យឆ្នេរខ្លះល្អក់កករ បង្កើតការភ្ញាក់ផ្អើលពេញហ្វេសបុក។ នេះបើតាមការប្រាប់ឲ្យដឹងពី លោក នេត្រ ភក្រ្តា រដ្ឋលេខាធិការ និងអ្នកនាំពាក្យក្រសួងបរិស្ថាន ប្រាប់ Sabay នៅមុននេះបន្តិច។
លោក នេត្រ ភ័ក្រ្តា មានប្រសាសន៍ថា គិតត្រឹមពេលនេះម៉ោងនេះ ស្ថានភាពទឹកនៅឆ្នេរខ្លះនៅល្អក់កករនៅឡើយ ព្រោះភ្លៀងនៅតែបន្តធ្លាក់ ជាពិសេសម្សិលមិញភ្លៀងខ្លាំង។ យ៉ាងណាមិញ ក្រុមការងារបុគ្គលិកនៃមន្ទីរបរិស្ថានប្រចាំខេត្តកំពុងចុះត្រួតពិនិត្យ និងអប់រំផ្សព្វផ្សាយដល់ម្ចាស់កសិដ្ឋាននានា ក៏ដូចជារិះរកវិធីទប់ស្កាត់ដីកុំឲ្យហូរចូលទឹកអូរ ឬតាមឆ្នេរបន្ថែមទៀត។ ស្ថានភាពល្អក់កករទឹក កើតមាននៅតាមឆ្នេរសមុទ្រមួយចំនួនរួមទាំងឆ្នេរព្រែកត្រែង ព្រោះតែសកម្មភាពអភិវឌ្ឈន៍នៅតាមខេត្តព្រះសីហនុកំពុងមានច្រើន ហើយនៅរយៈពេល ៣-៤ ថ្ងៃកន្លងមកនេះភ្លៀងធ្លាក់ច្រើនហូរនាំយកដីចូលទៅក្នុងសមុទ្រ ទើបនាំឲ្យមានបញ្ហាទាំងនេះកើតឡើង។ នេះបើតាមលោក នេត្រ ភក្ត្រា បញ្ជាក់បន្ថែម។
ឯកឧត្ដម យន្ត មីន អភិបាល នៃគណៈអភិបាលខេត្តព្រះសីហនុ បានប្រាប់ Sabay ឲ្យដឹងដែរថា នៅប៉ុន្មានឆ្នាំចុងក្រោយនេះ ខេត្តមានការអភិវឌ្ឍន៍ខ្លាំង ការសាងសង់ក៏មានច្រើន ម៉្លោះហើយស្នើឲ្យមានការយោគយល់ពីបងប្អូនប្រជាពលរដ្ឋ ប៉ុន្ដែ ស្ថាប័នជំនាញរួមមាន ក្រសួងបរិស្ថាន ក្រសួងដែនដី ក្រសួងទេសចរណ៍ និងស្ថាប័នពាក់ព័ន្ធមួយចំនួនទៀតកំពុងដុតដៃដុតជើង រិះរកវិធានការដោះស្រាយ។
"យើងចេញជាវិធានការទី១ គឺកំពុងធ្វើទំនប់បង្ហៀរ កុំឲ្យដីហូរចូលអូរ ប្រឡាយ និង ការចុះផ្សព្វផ្សាយអប់រំដល់សេវាកម្ម អាជីវកម្មនានា ដូចជា ផ្ទះសំណាក់ សណ្ឋាគារជាដើម រាល់ពេលបង្ហូរទឹកត្រូវចម្រោះឲ្យស្អាតមុនបង្ហូរចូលក្នុងសមុទ្រ"។
ឯកឧត្ដម យន្ត មីន បានបន្ថែមថា "ឧទាហរណ៍ដូចយើងកំពុងជួសជុលផ្ទះ ហើយពេលមានកម្មវិធីគឺចៀសមិនផុតពីកើតមានសំរាមខ្លះ និយាយរួមផ្ទះមិនទាន់ស្អាត តែពេលធ្វើរួចរាល់អ្វីៗនឹងស្អាតអស់ហើយ"។
ខេត្ត ព្រះសីហនុ ត្រូវបានគេកត់សម្គាល់ឃើញថា នៅប៉ុន្មានឆ្នាំចុងក្រោយជនជាតិចិនបានសម្រុកទៅនៅខេត្តនេះច្រើន ដែលធ្វើឲ្យការសាងសង់ក៏មានការរីកច្រើនដែរ។ ឯកឧត្ដម យន្ត មីន បានបញ្ជាក់ មកទល់នឹងពេលនេះ មានជនជាតិចិនប្រមាណជា ៣-៤ម៉ឺននាក់ហើយ ដែលមករស់នៅនិងបង្កើតអាជីវកម្ម គឺទី១ វិស័យសេវាកម្ម-អាជីវកម្ម មានផ្ទះសំណាក់ សណ្ឋាគារ ភោជនីយដ្ឋាន និងកាស៊ីណូនិងទី ២ គឺវិស័យឧស្សាហកម្ម មានរោងចក្រជាដើម។
ដោយសារតែកំណើនវិនិយោគកំពុងមានសន្ទុះខ្លាំងក្នុងខេត្តព្រះសីហនុ ឯកឧត្ដម យន្ត មីន អភិបាលខេត្តព្រះសីហនុ ស្នើឲ្យមានការយោគយល់ ហើយថា ស្ថាប័នពាក់ព័ន្ធមិនព្រងើយកន្តើយនោះទេ គឺកំពុងព្យាយាមដោះស្រាយដូច ដែលបានលើកឡើងខាងលើ និងអាជ្ញាធរ បាននឹងកំពុងពង្រឹងសន្តិសុខ សណ្ដាប់ធ្នាប់ ផងដែរ។
ស្រដៀងគ្នានេះដែរ លោក នេត្រ ភក្រ្តា រដ្ឋលេខាធិការ និងអ្នកនាំពាក្យក្រសួងបរិស្ថាន បានបញ្ជាក់ថា បុគ្គលិកខាងមន្ទីរបរិស្ថាន កំពុងចុះត្រួតពិនិត្យ និងអប់រំផ្សព្វផ្សាយដល់ម្ចាស់ការដ្ឋានសាងសង់នានា ដែលបង្កឲ្យមានដីហូរចូលទៅក្នុងអូរ និងប្រឡាយ នាំយកទៅក្នុងសមុទ្រហើយ តែយ៉ាងណាមិញ លោកថា បញ្ហានេះមិនមានអ្វីដែលព្រួយបារម្ភ និងប៉ះពាល់ទឹកសមុទ្រទេ៕