មន្រ្តីជាន់ខ្ពស់ លើកចំណុចសំខាន់ចំៗ គួរឲ្យសរសើរ ពីសាលាជំនាន់ថ្មី នៃខេត្ត ១នេះ

2018-09-19 10:00:00
ការអប់រំ

2018-09-19 10:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយផ្ទុះព័ត៌មាននានា នៃសាលាជំនាន់ថ្មី នៃវិទ្យាល័យព្រះស៊ីសុវត្ថិ រាជធានីភ្នំពេញ ឯកឧត្ដម ស សុខា រដ្ឋលេខាធិការ ក្រសួងអប់រំ យុវជន និងកីឡា បានលើកចំណុចសំខាន់នានា នៃ ដំណើរការយ៉ាងរលូន នៃសាលាជំនាន់ថ្មី នៅលើទឹកដីខេត្តស្វាយរៀង។

តាមទំព័រហ្វេសប៊ុកផ្លូវការរបស់ឯកឧត្ដម ស សុខា រដ្ឋលេខាធិការ ក្រសួងអប់រំ យុវជន និងកីឡា បានបញ្ជាក់ថា ស្របពេលដែលកំពុងមានមតិនានា ជុំវិញសាលាជំនាន់ថ្មី បាននឹងកំពុងដំណើរការយ៉ាងរលូន នៅលើទឹកដីខេត្តស្វាយរៀង ក្នុងអនុវិទ្យាល័យគោកព្រីង។ ឯកឧត្ដម ស សុខា ថា សាលានេះទទួលបានការពេញចិត្តរៀន និងបង្រៀនពីសិស្សានុសិស្ស និងលោកគ្រូ អ្នកគ្រូ ដោយសាលាជំនាន់ថ្មី មានគាំទ្រពីអង្គការជាតិ និងអន្តរជាតិមួយចំនួន។

តាមទំព័រហ្វេសប៊ុក ឯកឧត្ដម ស សុខា បន្តថា ក្រៅពីនេះគម្រោងសាលាជំនាន់ថ្មីនេះ ក៏កំពុងដាក់អោយដំណើរការជាបន្តបន្ទាប់ តាមសាលាមួយចំនួន ក្នុងប្រទេសផងដែរ ដែលជាគោលនយោបាយ របស់រាជរដ្ឋាភិបាល អភិវឌ្ឍវិស័យអប់រំសាលាជំនាន់ថ្មី មានការរៀបចំបង្ហាញភាពពិតជាក់ស្ដែងដល់សិស្ស មានន័យថា រៀនទ្រឹស្ដីហើយនឹងអនុវត្តផ្ទាល់តែម្ដង ។

រដ្ឋលេខាធិការ ក្រសួងអប់រំ យុវជន និងកីឡា ក៏បានបញ្ជាក់ទៀតថា ជាងនេះទៅទៀត គេមានតាំងបង្ហាញពីរបៀបអនុវត្តផ្សេងៗ ដើម្បីឲ្យបានដល់គោលដៅ ឧទាហរណ៍ ដើម្បីបូមទឹកឡើងលើភ្នំ តើគេត្រូវប្រើមធ្យោបាយយ៉ាងណា?

អ្វីដែលកាន់តែពិសេសទៀតគឺ ការរៀបចំ ការតាំង ការអនុវត្តជាក់ស្ដែង ពិតជាបានធ្វើឲ្យសិស្សានុសិស្ស មានអារម្មណ៍រៀនសូត្រជាងធម្មតា ។ ឯលោកគ្រូ អ្នកគ្រូ ក៏មានទឹកចិត្តបង្រៀនដល់សិស្សយ៉ាងខ្លាំងក្លា ដោយសារ តែមានការលើកទឹកចិត្ត ផ្ដល់ប្រាក់ឧបត្ថម្ភសមរម្យ ផងដែរ។

សូមបញ្ជាក់ថា សាលារៀនជំនាន់ថ្មី គឺជាកម្មវិធីកំណែទម្រង់ប្រព័ន្ធអប់រំខ្នាតធំ របស់ក្រសួងអប់រំ។ គម្រោងនេះ រដ្ឋាភិបាលត្រូវចំណាយប្រាក់ជិតមួយលានដុល្លារ ដើម្បីចាប់ផ្ដើមនេះ ផ្ដោតសំខាន់ទៅលើទំនើបកម្មនៃការរៀន បង្រៀន និងគ្រឿងបរិក្ខារ។

គំនិតសម្រាប់ការធ្វើកំណែទម្រង់ប្រព័ន្ធអប់រំត្រូវផ្ដួចផ្ដើមឡើងដំបូង ដោយអង្គការ KAPE ដែលជាអង្គការក្នុងស្រុកធំបំផុតដែលផ្ដោតសំខាន់ទៅលើវិស័យអប់រំ នៅកម្ពុជា។

កម្មវិធីសាកល្បងរបស់ពួកគេដែលជាគំនិតផ្ដួចផ្ដើមសាលា Beacon ត្រូវបានស្ថាបនាឡើងនៅឆ្នាំ ២០១៤ នៅខេត្តកំពង់ចាមហើយនៅពេលដែលកម្មវិធីមានការពង្រីកធំទៅៗ សាលានេះក៏ក្លាយជាសាលាជំនាន់ថ្មី New Generation School (NGS) នេះឯង។