- 2018-09-21 07:59:55
- ការអប់រំ
យល់ខ្លឹមសារ១សន្លឹកនេះទើបដឹងថា បើមិនបោះឆ្នោតគាំទ្រ ម្ល៉េះលោកនាយកស៊ីសុវត្ថិរួចខ្លួនបាត់
- 2018-09-21 07:59:55
- ចំនួនមតិ 0 | ចំនួនចែករំលែក 0
យល់ខ្លឹមសារ១សន្លឹកនេះទើបដឹងថា បើមិនបោះឆ្នោតគាំទ្រ ម្ល៉េះលោកនាយកស៊ីសុវត្ថិរួចខ្លួនបាត់
ចន្លោះមិនឃើញ
ក្រោយទទួលបានជោគជ័យលើការតវ៉ារបស់លោកគ្រូ អ្នកគ្រូ នៃវិទ្យាល័យព្រះស៊ីសុវត្ថិ លោក មូល ស៊ុយហេង នៅតែបន្តធ្វើជានាយកដដែល ប៉ុន្តែត្រូវសងថវិការដ្ឋដែលយកទៅប្រើប្រាស់ ពុំមានតម្លាភាព។
បន្ទាប់ពីផ្ទុះការតវ៉ា សុំកុំឲ្យមានការផ្ទេរតំណែងលោកនាយកវិទ្យាល័យព្រះស៊ីសុវត្ថិ ក្រសួងអប់រំ បានចុះទៅដោះស្រាយ ដើម្បីបញ្ចប់បញ្ហានេះ ក្រោមអធិបតីភាពរបស់រដ្ឋមន្ត្រីក្រសួងអប់រំ ឯកឧត្ដម ហង់ជួន ណារ៉ុន។ ក្នុងការដោះស្រាយគណៈកម្មការប្រជុំបានរៀបចំការបោះឆ្នោត យកសំឡេងភាគតិច និងភាគច្រើន ដោយមាន២ជម្រើស។
ជម្រើសទី១៖ ឯកភាពចំណាត់ការរបស់ក្រសួងអប់រំយុវជន និងកីឡា ដោយផ្លាស់ប្ដូរលោក មូល ស៊ុយហេង នាយកវិទ្យាល័យព្រះស៊ីសុវត្ថិ ទៅបម្រើការងារទៅនាយកដ្ឋានមធ្យមសិក្សាចំណេះទូទៅ។ ក្រសួងនឹងរៀបចំជ្រើសរើសនាយកថ្មី ក្នុងចំណោមនាយករង នាយិការង និងលោកគ្រូ អ្នកគ្រូ។ ក្រសួងអប់រំ នឹងបង្កើតក្រុមប្រឹក្សាភិបាល និងកែលម្អបរិស្ថានសាលារៀន។
ជម្រើសទី២៖ លោកមូល ស៊ុយហេង ជានាយកវិទ្យាល័យព្រះស៊ីសុវត្ថិដដែល តែលោកមូល ស៊ុយហេង ត្រូវសងថវិការដ្ឋដែលបានបាត់បង់ និងទទួលខុសត្រូវចំពោះមុខច្បាប់។
ដូច្នេះ លោកមូល ស៊ុយហេង ត្រូវមកធ្វើនាយកដដែល តែត្រូវសងថវិការដ្ឋព្រោះមានការបោះឆ្នោតគាំទ្រពីលោកគ្រូ អ្នកគ្រូ។ ប្រសិនបើតាមចំណាត់ការរបស់ក្រសួង លោកនឹងត្រូវបំពេញការងារនៅនាយកដ្ឋានមធ្យមសិក្សាចំណេះទូទៅ ដោយមិនត្រូវប្រឈមចំពោះមុខច្បាប់ឡើយ។
តាមលិខិតរបស់ក្រសួងអប់រំបញ្ជាក់ថា មូលហេតុឈានដល់ការផ្ទេរតំណែងលោកនាយកវិទ្យាល័យព្រះស៊ីសុវត្ថិ ទៅកាន់ផ្នែកនាយកដ្ឋាន មធ្យមសិក្សាចំណេះទូទៅ គឺក្រោយពេលដែលក្រុមអធិការកិច្ច និងសវនកម្មផ្ទៃក្នុង បានរកឃើញនូវបញ្ហាអសកម្មមួយចំនួនពាក់ព័ន្ធនឹងការងារគ្រប់គ្រង ការងាររដ្ឋបាល ការរៀន និងការបង្រៀន និងការប្រើប្រាស់ថវិកាសាលារៀន ព្រមទាំងថវិកាដៃគូអភិវឌ្ឍ។ បន្ទាប់មកក្រសួងក៏បានចេញប្រកាសផ្ទេរភារកិច្ច លោក មូល ស៊ុយហេង ឲ្យមកបំពេញកិច្ចការនៅនាយកដ្ឋានមធ្យមសិក្សាចំណេះទូទៅ ជាហេតុនាំឲ្យលោកគ្រូ អ្នកគ្រូមួយចំនួនបានចេញមកតវ៉ា។
ក្នុងសេចក្ដីប្រកាសរបស់ក្រសួងដដែលឲ្យដឹងទៀតថា ថ្វីត្បិតក្រសួងបានចំណាយថវិកាដ៏ច្រើនសន្ធឹកសន្ធាប់ក៏ដោយ ក៏ការគ្រប់គ្រងរបស់លោកនាយកនៅមានភាពធូររលុង ស្ថានភាពអនាម័យមិនមានភាពល្អប្រសើរឡើយ ជាពិសេសក្នុងថ្នាក់រៀននៃកម្មវិធីសិក្សាធម្មតា។
ដោយមានភាពអសកម្មជាច្រើនកើតឡើងក្នុងវិទ្យាល័យព្រះស៊ីសុវត្ថិកើតឡើង ក្រោមការគ្រប់គ្រងរបស់លោក មូល ស៊ុយហេង បែបនេះហើយ ទើបក្រសួងសម្រេចផ្ទេរភារកិច្ចរបស់លោក តែមិនទទួលបានជោគជ័យព្រោះមានការផ្ទុះបាតុកម្មតវ៉ាពីលោកគ្រូ អ្នកគ្រូ ដែលធ្លាប់ជ្រោកកោន ក្រោមម្លប់ដឹកនាំ នៃនាយកសាលារូបនេះ៕