- 2018-10-12 04:50:56
- ការអប់រំ
តាមការស្រាវជ្រាវមួយបង្ហាញថា យុវវ័យនៅកម្ពុជាកំពុងឆ្លងជំងឺម្យ៉ាងពីបណ្ដាញសង្គម
- 2018-10-12 04:50:56
- ចំនួនមតិ 0 | ចំនួនចែករំលែក 0
តាមការស្រាវជ្រាវមួយបង្ហាញថា យុវវ័យនៅកម្ពុជាកំពុងឆ្លងជំងឺម្យ៉ាងពីបណ្ដាញសង្គម
ចន្លោះមិនឃើញ
តាមរយៈស្មាតហ្វូននៅក្នុងដៃ យុវវ័យកំពុងរវល់នឹងការបង្ហាញរូបខ្លួនឯងនៅលើបណ្ដាញសង្គម។ មួយថ្ងៃៗពួកគេថតរូបខ្លួនឯង បង្ហោះនៅលើអ៊ីនធឺណិត អមដោយការបកស្រាយពីអារម្មណ៍របស់ខ្លួន។ សកម្មភាពបែបនេះកាន់តែមានច្រើនឡើងៗនៅក្នុងសង្គម ធ្វើឲ្យអ្នកជំនាញព្រួយបារម្ភខ្លាចយុវវ័យខ្មែរធ្លាក់ចូលក្នុងបញ្ហាចិត្តសាស្ត្រមួយហៅថា អត្តស្នេហនិយម ឬ Narcissism។
នៅក្នុងគណនេយ្យ Instagram របស់យុវតីម្នាក់ គឺរាល់ពេលនាងតែងផុសរូបខ្លួនឯង ជាមួយនឹងការបង្ហាញអាការផ្សេងៗ បញ្ជាក់ពីអារម្មណ៍របស់នាង។ ស្ទើររាល់កន្លះម៉ោងម្ដង នាងតែងឆែកមើលរូបរបស់នាង ដើម្បីតាមដានចំនួនអ្នកចូលចិត្តបានប៉ុន្មាន មានអ្នកដាក់វិចារអ្វីខ្លះ ហើយចាប់ផ្ដើមវាយតម្លៃខ្លួនឯងតាមប្រការទាំងអស់នោះ។ នាងចង់ឲ្យមនុស្សទាំងឡាយងាកមកចាប់អារម្មណ៍ជាមួយនាង ហើយចាត់ទុកនាងជាមនុស្សសំខាន់ម្នាក់ដែលគ្រប់គ្នាចាំបាច់ត្រូវតែយកចិត្តទុកដាក់លើនាងច្រើនជាងនរណាទាំងអស់។ អាការទាំងនេះ ត្បិតមិនបានសម្ដែងចេញដោយត្រង់ តែនៅក្នុងចិត្តគឺពិតជាបានគិតមែន។
មួយវិញទៀត នាងតែងបញ្ចេញមតិអវិជ្ជមាន មិនទទួលយកនូវអ្វីដែលប៉ះពាល់អារម្មណ៍របស់នាង មិនថាធ្ងន់ ឬស្រាល ហើយចាត់ទុកអ្វីគ្រប់យ៉ាង ដែលមនុស្សគ្រប់គ្នាធ្វើ ហាក់មិនព្រមយល់ពីអារម្មណ៍នាង។
នេះជាសញ្ញាណនៃបញ្ហាផ្លូវចិត្តមួយហៅថា អត្តស្នេហនិយម ឬ Narcissism។ បើតាមលោកស្រី សាស្ត្រាចារ្យ ជីន វេង (Jean Twenge) អ្នកឯកទេសចិត្តវិទ្យាអាមេរិកាំង ដែលជាអ្នកស្រាវជ្រាវ និងសរសេរសៀវភៅ ពាក់ព័ន្ធនឹង Narcissism។ អ្នកចិត្តវិទ្យាបានឲ្យនិយមន័យថា ជាការលង់ស្រលាញ់ខ្លួនឯងខ្លាំង ដោយគិតថាមានតែខ្លួនដែលសំខាន់លើសអ្វីៗទាំងអស់ គំនិតរបស់ខ្លួនគឺត្រឹមត្រូវ ហើយមនុស្សគ្រប់គ្នាត្រូវតែទទួលយក។
សាស្ត្រាចារ្យចិត្តវិទ្យានៃសកលវិទ្យាល័យភូមិន្ទភ្នំពេញ លោកសំ ច័ន្ទសុវណ្ណដារ៉ា លើកឡើងថា «ការស្រលាញ់ខ្លួនឯង គឺជារឿងល្អមួយដែលយុវវ័យត្រូវមាន ក៏ប៉ុន្តែការឲ្យតម្លៃខ្លួនជ្រុលពេក អាចធ្វើឲ្យមានការវាយតម្លៃទាបចំពោះគំនិតអ្នកដទៃ ឬរហូតលែងទទួលស្គាល់ថា អ្នកដទៃមានការគិតពិចារណាស្មើខ្លួន។ មួយថ្ងៃៗ គិតតែពីឆ្លុះកញ្ចក់ ថតរូប និងឈ្លក់វង្វេងនឹងរូបរាង និងគំនិតរបស់ខ្លួន»។
មនុស្សគ្រប់គ្នាសុទ្ធតែមានអត្តស្នេហនិយមរៀងៗខ្លួន គ្រាន់តែតិច ឬច្រើន។ ហើយវ័យដែលប្រឈមខ្លាំងជាងគេ គឺវ័យជំទង់ និងយុវជនវ័យក្មេង ដោយខួរក្បាលពួកគេចាប់ផ្ដើមលួតលាស់ខ្លាំង ហើយមើលឃើញពីចំណុចវិជ្ជមានរបស់ខ្លួនកាន់តែច្រើន។ ជារឿយៗគេតែងចង់បញ្ចេញគំនិតយោបល់ ឲ្យអ្នកនៅជុំវិញខ្លួនយកចិត្តទុកដាក់ និងឲ្យតម្លៃលើរូបគេខ្ពស់បំផុត។ នេះជាការលើកឡើងរបស់លោកស្រីដុកទ័រ ឌួរវ៉ាស៊ូឡា (Ramani Durvasula) សាស្ត្រាចារ្យចិត្តវិទ្យា នៃសកលវិទ្យាល័យរដ្ឋកាលីហ្វញ៉ា ទៅកាន់កាសែត The Washington Post។
លោកសាស្ត្រាចារ្យសំ ចន្ទ័សុវណ្ណដារ៉ាថា សព្វថ្ងៃ Narcissism កំពុងរីករាលដាលយ៉ាងខ្លាំងនៅអឺរ៉ុប និងសហរដ្ឋអាមេរិក ដែលជាប្រទេសជឿនលឿន។ ចំណែកនៅកម្ពុជា បញ្ហានេះក៏កំពុងរីករាលដាលជាបណ្ដើរៗ ដោយសារកត្តារីកចម្រើននៃបណ្ដាញទំនាក់ទំនងសង្គម និងកត្តាចិត្តសាស្ត្រសង្គមតូចៗជាច្រើនទៀត។ គេមិនអាចទប់ស្កាត់ចលនានេះមិនឲ្យរីករាលដាលបានទេ ព្រោះវាជាបម្រែបម្រួលនៃសង្គមមនុស្សទូទាំងពិភពលោក។
លោកស្រី សាស្ត្រាចារ្យ ជីន វេង (Jean Twenge) អ្នកឯកទេសចិត្តវិទ្យាអាមេរិកាំង បានលើកឡើងក្នុងសារព័ត៌មាន ញូវ យ៉កថាម (New York Time) ថា បណ្ដាញទំនាក់ទំនងសង្គម ជាចលករធ្វើឲ្យអត្តស្នេហ៍និយមរីកសាយភាយ។ ក៏ប៉ុន្តែមានភស្តុតាងតិចណាស់ដែលបញ្ជាក់ថា ការផុសរូបខ្លួនឯង នៅលើបណ្ដាញសង្គមញឹកញាប់ គឺទំនងជាមានបញ្ហា Narcissist។ ជាការពិត វាអាចមកពីមូលហេតុដែលថា ការផុសរូបខ្លួនឯង និងការបញ្ចេញទស្សនៈលើបណ្ដាញសង្គម ដោយសារមានទំនុកចិត្តខ្ពស់ ទទួលបានភាពកក់ក្ដៅ និងក្ដីស្រលាញ់ តាមរយៈអ្នកចូលចិត្តច្រើន និងធ្វើឲ្យគណនេយ្យបណ្ដាញសង្គមរបស់ខ្លួនមានភាពសកម្ម។
សញ្ញាណនៃ Narcissism ត្រូវបានអ្នកចិត្តវិទ្យាកំណត់ តាមចរិតលក្ខណៈមួយចំនួនដូចជា គិតថាខ្លួនឯងសំខាន់លើសអ្វីៗទាំងអស់ កន្ទក់កន្ទេញតែនឹងភាពជោគជ័យរបស់ខ្លួន ប្រកាន់ខ្លួនថា ជាមនុស្សពិសេស និងរើសអើងចំពោះអ្នកមានសមត្ថភាពតិចជាង ឬអន់ជាងខ្លួន ត្រូវការការសរសើរច្រើន និងរាល់ពេល យល់ថាខ្លួនឯងមានសិទ្ធិគ្រប់កាលៈទេសៈ អត់ខ្វល់ពីអ្នកដទៃ តែងគិតថាខ្លួនមានប្រៀបជានិច្ចនៅក្នុងទំនាក់ទំនងបុគ្គល មិនចេះយល់ចិត្ត ឬខ្វល់ខ្វាយពីអ្នកដទៃ មិនយល់ពីតម្រូវការអ្នកដទៃ មានចិត្តច្រណែនឈ្នានីសច្រើន និងបង្ហាញអាកប្បកិរិយាក្រអឺតក្រទម។
តាមលោកសាស្ត្រាចារ្យសុវណ្ណដារ៉ា បើកាលណាបញ្ហានេះកាន់តែកើនឡើងខ្លាំង វាអាចនាំឲ្យសង្គមជួបវិបត្តិផ្សេងៗ ដូចជាក្លាយទៅជារោគចិត្តធ្ងន់ធ្ងររហូតដល់សម្លាប់ខ្លួន បង្កើតជាបក្សពួកជ្រុលនិយមបង្កហានិភ័យដល់ មនុស្សជាតិជាដើម៕