- 2018-10-16 02:53:30
- ស្នេហា
រឿងក្នុងចិត្ត៦យ៉ាងប្រុសៗចង់ឲ្យស្រីៗដឹងបំផុត តែអត់ហ៊ានប្រាប់ ទ្រាំបៀមទុកខ្លួនឯង
- 2018-10-16 02:53:30
- ចំនួនមតិ 0 | ចំនួនចែករំលែក 0
រឿងក្នុងចិត្ត៦យ៉ាងប្រុសៗចង់ឲ្យស្រីៗដឹងបំផុត តែអត់ហ៊ានប្រាប់ ទ្រាំបៀមទុកខ្លួនឯង
ចន្លោះមិនឃើញ
គេថាមនុស្សស្រីជាអ្នកពូកែលាក់អារម្មណ៍ តែបើសម្គាល់ឲ្យមែនទែនទៅមិនប្រាកដបែបនេះឡើយ ព្រោះនាងតែងបង្ហាញអារម្មណ៍ភ្លាមៗ ដើម្បីឲ្យដៃគូយល់ពីចិត្តនាង។ ផ្ទុយមកវិញបុរសឯណេះវិញទេ ជាមនុស្សពូកែលាក់អារម្មណ៍ មិនងាយនឹងបង្ហាញ តែពេលខ្លះគេក៏ហត់នឿយ ធុញទ្រាន់ និងចង់ឲ្យខាងនារីយល់ពីចិត្តគេវិញដូចគ្នា។ ខាងក្រោមនេះជារឿងក្នុងចិត្តដែលបុរសៗចង់ឲ្យនារីដឹង៖
១. បើខឹងត្រូវឆាប់បាត់
មិនថានាងខឹងព្រោះកំហុសដែលគេបានធ្វើ ឬនាងខឹង អន់ចិត្ត ព្រោះតែការយល់ច្រឡំយ៉ាងណានោះ រឿងតែម្យ៉ាងដែលគេចង់បានខ្លាំង គឺកុំនៅងរង៉ក់យូរពេក បើគេសុំទោសហើយ ដឹងខ្លួនខុសហើយ នាងគួរប្រែមកធម្មតាវិញមក។
២. សូមមេត្តានិយាយត្រង់ទៅត្រង់មក ព្រោះគេមិនងាយគ្រូទាយដឹងពីចិត្តនាងគ្រប់ពេលទេ
រឿងមួយទៀតដែលគេចង់សុំពីនាង គឺបើថាចង់បានអ្វីប្រាប់ឲ្យត្រង់កុំបាច់បញ្ឆិតបញ្ឆៀង បើថាខឹងរឿងអីប្រាប់ឲ្យចំមក កុំផ្លែផ្កាឌឺដងពេក។ ទទួលស្គាល់នារីៗ មួយចំនួនធ្វើខ្លួនដូចព្រះនាងម្ចាស់ ចង់ឲ្យខាងប្រុសយល់ពីនាងគ្រប់បែបយ៉ាង តែត្រូវដឹងថា មនុស្សមិនអាចមានអារម្មណ៍ល្អគ្រប់ពេលឡើយ។ មនុស្សប្រុសក៏ជាមនុស្ស ចេះធុញ ចេះហត់ដូចគ្នា។
៣. ជឿជាក់លើស្នេហាដែលគេមានផង
ស្នេហាសំខាន់បំផុត គឺការជឿជាក់លើគ្នា ជឿលើទង្វើ កាយវិការ ដែលផ្ដល់ឲ្យគ្នា។ ទទួលស្គាល់ថា មនុស្សស្រីអាចមានក្ដីស្រលាញ់ខ្លាំងលើសលប់ ជាងភាគីខាងបុរស ជាហេតុធ្វើឲ្យនាងក្លាយជាមនុស្សដែលចិត្តច្រើន សង្ស័យច្រើន ជួនកាលក្លាយជាមនុស្សលែងមានហេតុផល។ រីឯបុរសក្លាយទៅជាមនុស្សម្នាក់ដែលរង់ចាំតែបកស្រាយ ព្រោះតែការសង្ស័យរាប់រយជំពូករបស់មនុស្សស្រីទៅវិញ។
ទង្វើដដែលៗ ការចោទប្រកាន់ សង្ស័យគ្មានហេតុផល ដែលផ្ទុយខុសពីការពិតនេះហើយ ដែលធ្វើគេហត់ចិត្ត។ គេនឹងមានអារម្មណ៍ស្នេហាដែលគេផ្ដល់ឲ្យនារីម្នាក់ហាក់គ្មានតម្លៃ ការខិតខំរបស់គេដើម្បីនារីម្នាក់ ទទួលបានមកវិញតែការសង្ស័យ។
៤. ស្រលាញ់គេជាគេបានទេ? ព្រោះគេក៏ហត់នឹងផ្លាស់ប្ដូរដើម្បីនាង
ប្រសិនបើស្រលាញ់គ្នា គឺត្រូវទទួលទាំងចំណុចល្អ និងចំណុចមិនល្អរបស់គូស្នេហ៍ ហើយព្យាយាមផ្លាស់ប្ដូរខ្លួនឯងម្នាក់បន្តិច ដើម្បីក្ដីស្នេហាមួយ។ នារីខ្លះ ចង់ឲ្យបុរសដែលខ្លួនឯងស្រលាញ់ ធ្វើគ្រប់បែបយ៉ាងដើម្បីនាង ដើម្បីក្ដីសុខខ្លួនឯង រហូតក្លាយជាមនុស្សអាត្មានិយមទៅវិញ។ ពេលខ្លះគេចង់រស់នៅជាជីវិតរបស់គេ ហើយគេចង់មានស្នេហាមួយ ដែលយល់ពីគ្នាទៅវិញទៅមក។ គេក៏មានអារម្មណ៍ចេះហត់ ហើយគេក៏ចង់ឲ្យនារីដែលខ្លួនស្រលាញ់ព្យាយាមយល់ពីគេវិញដូចគ្នា មិនមែនឲ្យតែមិនធ្វើអ្វីតាមចិត្តនាងចង់បាន ហើយមកចោទប្រកាន់ថា គេមិនស្រលាញ់នាងនោះទេ។
៥. អូនកុំយកបងទៅប្រៀបនឹងសង្សារមិត្តភក្ដិអូនបានទេ?
«អូនឃើញសង្សារមិត្តភក្ដិអូនឡើងកាលីបជាងបងឯងទៀត» ពាក្យមួយឃ្លានេះនារីៗមិនគួរនិយាយ ទៅកាន់សង្សារឡើយ ព្រោះនេះជាការប្រៀបធៀបសង្សារខ្លួន ជាមួយអ្នកដទៃ។ ភាគីបុរសពេលឭមួយប្រយោគនេះហើយ គឺចុកឈាមបំផុត ហើយគិតថាខ្លួនឯងមិនមានអ្វីដូចគេ។
៦. សុំពេលវេលាផ្ទាល់ខ្លួនខ្លះផង
មិនថាគេនៅកន្លែងធ្វើការ ទៅជួបមិត្តភក្ដិ ឬនៅជាមួយគ្រួសារ នាងតែងតែងចង់ឲ្យគេខល ផ្ញើសារ ហើយពេលខ្លះ នាងទាមទារឲ្យបុរសដែលខ្លួនឯងស្រលាញ់ នៅក្បែរនាងគ្រប់ពេល ទើបនាងសុខចិត្ត។ បែបនេះគេមិនមែនហៅថា ស្នេហានោះទេ តែជាលក្ខណៈចង់ក្លាយជាកម្មសិទ្ធិផ្ដាច់មុខហើយ។ ការស្រលាញ់គ្នា មិនចាំបាច់ទាល់តែនៅក្បែរគ្នា២៤ម៉ោង និយាយទូរសព្ទ ផ្ញើសាររកគ្នា គ្រប់ទីកន្លែងទេ សំខាន់ក្ដីស្រលាញ់ដែលមាននៅក្នុងចិត្តគឺមានតម្លៃបំផុត មិនអាចកាត់ថ្លៃបាន។
គេកើតមកជាបុរស មិនមែនកំណត់មកថា សម្រាប់តែធ្វើគ្រប់យ៉ាង ដើម្បីតែនារីទេ គេមានកាតព្វកិច្ច មានការងារ មានឪពុកម្ដាយ បងប្អូនមិត្តភក្ដិ ដូចតែនាងអ៊ីចឹង។ នាងជាចំណែកមួយក្នុងជីវិតរបស់គេមែន តែមិនមែនជាម្ចាស់ជីវិតគេ មានសិទ្ធគ្រប់គ្រងគេទាំងស្រុងបានឡើយ។
សូមបញ្ជាក់ថា ៦ចំណុចខាងលើនេះ គឺជាការចែករំលែកបទពិសោធន៍របស់បុរសមួយចំនួន តាមសារអេឡេចត្រនិកជាមួយក្រមការងារ Sabay ចំនួន៥រូប ហើយបានលើកឡើងស្រដៀងៗគ្នា ដូចខាងលើនេះ៕