ល្អបំផុត! ត្រៀមកាន់CV ទៅកោះពេជ្រ ការងារជាង២ម៉ឺនតំណែង កំពុងរង់ចាំនិស្សិតគ្រប់ជំនាញ

2018-10-22 06:14:07
ការអប់រំ

2018-10-22 06:14:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ឱកាសការងារគ្រប់ប្រភេទប្រមាណជាង២ម៉ឺនមុខតំណែង ដែលផ្ដល់ដោយក្រុមហ៊ុន សហគ្រាសធំៗ ជាង១៣០មកពីវិស័យសំខាន់ៗដូចជា៖ ធនាគារ គ្រឹះស្ថានមីក្រូហិរញ្ញវត្ថុ សំណង់ សណ្ឋាគារនិងបដិសណ្ឋារកិច្ច ទូរគមនាគមន៍ ការអប់រំ និងបណ្ដុះបណ្ដាលវិជ្ជាជីវៈជាដើម។ ឱកាសការងារពិសេសទាំងនេះ នឹងត្រូវបានតាំងបង្ហាញក្នុងបញ្ជរសរុបចំនួន៣០០ ក្នុងរយៈពេល២ថ្ងៃគឺ ថ្ងៃសៅរ៍-អាទិត្យទី២៧ និង២៨ ខែតុលា ឆ្នាំ២០១៨ ខាងមុខនេះនៅអគារពិព័រណ៍កោះពេជ្រ។

ដូច្នេះសិស្សនិស្សិត សាធារណៈជនទាំងកុំភ្លេចត្រៀម CV ដើម្បីស្វែងរកការងារល្អៗស័ក្ដិសមនឹងសមត្ថភាពរបស់ខ្លួនឯង ទាំងអ្នកមិនទាន់មាន និងអ្នកដែលចង់ផ្លាស់ប្ដូរការងារ។ អ្នកដែលចូលរួមទាំងអស់អាចដាក់ពាក្យភ្លាម សម្ភាសភ្លាមនៅនឹងកន្លែងតែម្ដង។ ជាពិសេសនោះក្រៅពីទទួលបានឱកាសការងាររាប់ម៉ឺនកន្លែងហើយនោះ សិស្សនិស្សិតទាំងអស់នឹងទទួលបានព័ត៌មានល្អៗជុំវិញ តម្រូវការលើធនធានមនុស្សក្នុងប្រទេសកម្ពុជាបច្ចុប្បន្ន ការចែករំលែកបទពិសោធន៍ តាមរយៈការធ្វើសិក្ខាសាលាដ៏ធំសម្បើម ដោយមានការចូលរួមពីអ្នកជំនាញទាំងជាតិ និងអន្តរជាតិទៀតផង។

លោក ហៃ ប៊ុនឡេង (អាវខៀវដៃខ្លី)

ថ្លែងនៅក្នុងសន្និសីទសារព័ត៌មានកាលពីព្រឹកថ្ងៃ ទី២២ ខែតុលា ព្រឹកមិញនេះ លោក ហៃ ប៊ុនឡេង អនុប្រធានទីភ្នាក់ងារជាតិមុខរបរ និងការងារ បានឲ្យដឹងដែរថា ពិព័រណ៍ការងារដ៏ធំបំផុតប្រចាំឆ្នាំនេះ រំពឹងថានឹងមានការចូលរួមទស្សនាប្រមាណជាង៣ម៉ឺននាក់ ដែលភាគច្រើនជាសិស្ស-និស្សិត យុវជន ស្វែងរកការងារធ្វើ និងកម្មករនិយោជិកមកពីគ្រប់វិស័យ។

សូមជម្រាបជូនថា មហាព្រឹត្តិការណ៍ថ្នាក់ជាតិដ៏ធំប្រចាំឆ្នាំមួយនេះ រៀបចំឡើងដោយ ក្រសួងការងារ និងបណ្ដុះបណ្ដាលវិជ្ជាជីវៈ សហការជាមួយ សហភាពសហព័ន្ធយុវជនកម្ពុជារាជធានីភ្នំពេញ និងសមាគមរោងចក្រកាត់ដេរកម្ពុជា(GMAC)៕