- 2018-10-22 08:03:47
- សេដ្ឋកិច្ច
សម័យនេះហើយឆ្លាតវៃ រឿងទិញលក់ដីធ្លី មិនសូវភ័យជួបហានិភ័យចាញ់បោកគេ
- 2018-10-22 08:03:47
- ចំនួនមតិ 0 | ចំនួនចែករំលែក 0
សម័យនេះហើយឆ្លាតវៃ រឿងទិញលក់ដីធ្លី មិនសូវភ័យជួបហានិភ័យចាញ់បោកគេ
ចន្លោះមិនឃើញ
យ៉ាងហោចណាស់មានសាធារណៈជនប្រហែល ១៥០ នាក់ចូលរួមសិក្ខាសាលាស្តីពី នីតិវិធីកាត់បន្ថយហានិភ័យក្នុងការទិញលក់អចលនទ្រព្យកាលពីថ្ងៃ ២០ តុលា នៅសណ្ឋាគារ Raffles Hotel Le Royal ក្រោមការរៀបចំពីគ្រឹះស្ថានមីក្រូហិរញ្ញវត្ថុ FIRST FINANCE។
កម្មវិធីខាងលើមានការចូលរួមដោយឥតគិតថ្លៃ ក្នុងនោះមានវាគ្មិនមកពីក្រសួងរៀបចំដែនដី នគរោបនីយកម្មម និងសំណង់ និងវាគ្មិនមកពីអគ្គនាយកដ្ឋានពន្ធដារ មកចែកចាយបទពិសោធន៍ផងដែរ។
ដោយសារការយល់ដឹងលើផ្នែកទិញលក់ ឬគ្រប់គ្រងលើអចលនទ្រព្យ ឬការផ្ទេរកម្មសិទ្ធិអចលនទ្រព្យស្របច្បាប់ នៅមានកម្រិត លោកស្រី ជុន សុថានី អគ្គនាយិកា គ្រឹះស្ថានមីក្រូហិរញ្ញវត្ថុ FIRST FINANCE បានឱ្យដឹងក្នុងសិក្ខាសាលាថា៖ “តាមរយៈបទពិសោធន៍ជាង ១០ឆ្នាំមកនេះ ក្នុងនាមជាគ្រឹះស្ថានមីក្រូហិរញ្ញវត្ថុដែលផ្តល់កម្ចីទាក់ទងនឹងលំនៅដ្ឋានខ្នាតតូច ដល់ប្រជាជនដែលមានចំណូលទាប និងមធ្យម យើងខ្ញុំបាន និងនៅតែឃើញសាធារណៈជនជួបប្រទះនូវបញ្ហាជាច្រើនក្នុងការទិញលក់ដីធ្លី ឬផ្ទះសម្បែង"។
ជាពិសេសទៀតនោះអ្នកស្រីបន្តទៀតថា ដូចជាការទិញដី ឬផ្ទះដែលមិនមានប្រវត្តិច្បាស់លាស់ ឬទិញពីម្ចាស់ដីឡូត៍ ឬបុរីដែលមិនមានច្បាប់ត្រឹមត្រូវ ដី ឬផ្ទះដែលមានប្លង់ជាន់គ្នា ឬយល់ព្រមទទួលយកប្លង់ទន់ នៅពេលដែលប្លង់ដើមជាប្លង់រឹង ឬព្រមទទួលការផ្ទេរសិទ្ធិត្រឹមភូមិ/ឃុំ ដើម្បីបញ្ចៀសការបង់ពន្ធជាដើម។ ទង្វើទាំងនេះអាចធ្វើឲ្យប្រជាពលរដ្ឋជួបនូវហានិភ័យក្នុងការបាត់បង់សិទ្ធិ គ្រប់គ្រងអចលនទ្រព្យរបស់ពួកគេបាន។
លោកស្រី ជឿជាក់យ៉ាងមុតមាំថា តាមរយៈការចូលរួមពីសំណាក់វាគ្មិនមកពីក្រសួងដែលពាក់ព័ន្ធ អ្នកចូលរួមនឹងទទួលបានចំណេះដឹងបន្ថែមក្នុងការកាត់បន្ថយហានិភ័យក្នុងការទិញដី ឬផ្ទះ ជាពិសេសសម្រាប់បរិយាកាសទីផ្សារអចលនទ្រព្យដែលកំពុងហក់ឡើងបែបនេះ៕