- 2018-10-31 09:30:00
- ការអប់រំ
គិតអាយុជីវិតភ្ញៀវជាធំ អ្នកកំពង់ចាម១គូ មូលមតិគ្នា អត់ដាក់ស្រាថ្ងៃការ ក្រោមហេតុផល ៣នេះ
- 2018-10-31 09:30:00
- ចំនួនមតិ 0 | ចំនួនចែករំលែក 0
គិតអាយុជីវិតភ្ញៀវជាធំ អ្នកកំពង់ចាម១គូ មូលមតិគ្នា អត់ដាក់ស្រាថ្ងៃការ ក្រោមហេតុផល ៣នេះ
ចន្លោះមិនឃើញ
មង្គលការថ្មីថ្មោងរបស់ប្ដីប្រពន្ធមួយគូ បានរៀបចំនៅក្នុងទឹកដីខេត្តកំពង់ចាម កំពុងទទួលការចាប់អារម្មណ៍ ដោយសារតែម្ចាស់ដើមការ សម្រេចចិត្តមិនប្រើប្រាស់គ្រឿងស្រវឹងទទួលភ្ញៀវ ក្រោមហេតុផល ៣នេះ ដែលបញ្ចាំងពីជីវភាពប្រចាំថ្ងៃ។
អ្នកស្រី ធីម សុភួង បានផ្ដល់បទសម្ភាសមកកាន់ Sabay តាមសារអេឡិចត្រូនិកថា អ្នកស្រី បានរៀបការជាមួយស្វាមីឈ្មោះ លោក ភឿក សុខជា កាលពី ថ្ងៃទី២៨ ខែតុលា ឆ្នាំ២០១៨កន្លងទៅថ្មីៗនេះ នៅភូមិជើងព្រៃ ឃុំជើងព្រៃ ស្រុកបាធាយ ខេត្តកំពង់ចាម។
កម្មវិធីនេះបានរៀបចំមានចំនួនប្រមាណជាង៣០តុ តែក្រុមគ្រួសារទាំងសងខាងបានមូលមតិគ្នាថា គឺអត់យកគ្រឿងស្រវឹង មកទទួលភ្ញៀវទេ។ ក្នុងនោះ គឺមានដាក់តែម្ហូបដូចកម្មវិធីអាពាហ៍ពិពាហ៍ទូទៅ រួមនឹងទឹកក្រូច តែប៉ុណ្ណោះ។
អ្នកស្រីថា មូលហេតុសំខាន់ ដែលនាំឲ្យក្រុមគ្រួសារទាំងសងខាង ពិសេសសាមីខ្លួន ធ្វើរឿងនេះគឺៈ
១. ដើម្បីកម្មវិធីជួបជុំគ្នា បែបរីករាយធម្មតា គ្មានគ្រឿងស្រវឹង ឬអ្នកស្រវឹងអួទីនួ
២. ចង់ចាប់ផ្ដើមដើម្បីប្រយោជន៍សម្រាប់គំរូមួយក្នុងសង្គម
៣. កាត់បន្ថយគ្រោះថ្នាក់ចរាចរណ៍ ដែលបង្កដោយអ្នកផឹកគ្រឿងស្រវឹង។
អ្នកស្រីបន្ថែមថា ៣ហេតុផលនេះ ក៏នាំឲ្យភ្ញៀវដែលបានទៅចូលរួមខ្លះ ពិតជាភ្ញាក់ផ្អើល និងខ្លះទៀត បានសួរថា ហេតុអីកម្មវិធីការមួយ ទាំងមូល បែរជាមិនដាក់ស្រាឲ្យផឹក? តើធ្វើបែបនេះ អត់ខ្លាចបាត់ចំណងដៃ ទេឬ? ទោះយ៉ាងនេះក្ដី ក៏មានភ្ញៀវខ្លះគាំទ្រ និងបានលើកសរសើរ ពីគំនិតនេះថាល្អ ហើយប្លែកគេ។
ឆ្លើយតបនឹងចម្ងល់ខាងលើ អ្នកស្រីបន្តថា មិនមានអីចម្លែកទេ ដែលមានអ្នកឆ្ងល់ដូចនេះ។ ទន្ទឹមនឹងសំណួរខាងលើនេះដែរ ក៏មានអ្នកគាំទ្រគំនិតនេះច្រើន ជាហេតុធ្វើឲ្យមិនមានបញ្ហារឿងអ្នកលុយចងដៃ។
ម្យ៉ាងវិញទៀត អ្នកស្រីថា មុនសម្រេចលើកគំនិតនេះ គឺបានត្រៀមជាស្រេចបង្ការបញ្ហា។ វាជារឿងដែលមិនគួរគិតរឿងខាតចំណេញទាល់តែសោះ គិតរឿងចំណេញខាត គឺរឿងជំនួញ តែនេះជាពិធីមង្គល ការចូលរួមការចងដៃវាជារឿងផ្សេង ដែលជាសន្ដានចិត្តរបស់ភ្ញៀវ មិត្តភ័ក្ដិ បងប្អូន នៃការរាប់អានគ្នា។
សូមបញ្ជាក់ថា គំនិតខាងលើគឺជាការចាប់ផ្ដើមមួយ ក្នុងនាមប្រជាពលរដ្ឋធម្មតាម្នាក់ បានសង្កេតឃើញថា បច្ចុប្បន្ននេះ មានគ្រោះថ្នាក់ប្រចាំថ្ងៃដោយគ្រឿងស្រវឹង។
អាចថាមនុស្សខ្លះ ពិតជានិយមផ្ដល់តម្លៃលើការផឹកគ្រឿងស្រវឹងច្រើន ជាងការជួបជុំគ្នា សឹងតែគ្រប់កម្មវិធី។ នេះបើតាម អ្នកស្រី ធីម សុភួង។
