- 2018-11-02 08:38:33
- ព័ត៌មាន
ក្រោយ SCG ប្រកាសថែមអាហារូបករណ៍មកស្តាប់ម្ចាស់ជយលាភីចែករំលែកបទពិសោធន៍
- 2018-11-02 08:38:33
- ចំនួនមតិ 0 | ចំនួនចែករំលែក 0
ក្រោយ SCG ប្រកាសថែមអាហារូបករណ៍មកស្តាប់ម្ចាស់ជយលាភីចែករំលែកបទពិសោធន៍
ចន្លោះមិនឃើញ
អេសស៊ីជី (SCG) បានផ្ដល់អាហារូបរណ៍ដល់សិស្សឆ្នើមនៅវិទ្យាល័យចំនួន ២៥០ នាក់បន្ថែមទៀត និងអាហារូបករណ៍ចំនួន ១០ សម្រាប់និស្សិតសកលវិទ្យាល័យ ដែលធ្លាប់ទទួលបានអាហារូបករណ៍នេះកន្លងមកពីមុនដែរ។
កម្មវិធីអាហារូបករណ៍ “អេសស៊ីជី ចែករំលែកក្ដីសុបិន” ដែលជាកម្មវិធីទំនួលខុសត្រូវសង្គមរបស់អេសស៊ីជីនេះ គឺតំណាងឲ្យសេចក្តីប្ដេជ្ញាចិត្តរបស់ក្រុមហ៊ុនក្នុងការផ្ដល់ឱកាសអប់រំរំកាន់តែប្រសើរដល់សិស្ស-និស្សិត ដែលមានបំណងប្រាថ្នាមោះមុតក្នុងការបន្តការសិក្សានៅថ្នាក់ឧត្តមសិក្សា ហើយចេះយកចិត្តទុកដាក់ចំពោះសហគមន៍របស់ខ្លួន បង្ហាញការដឹងគុណចំពោះឪពុកម្ដាយ និងត្រូវការទំនុកបម្រុងផ្នែកហិរញ្ញវត្ថុសម្រាប់ការសិក្សារបស់ខ្លួន។
លោក ប៉ារ៉ាម៉េត និសាកនសិន (Paramate Nisagornsen) អនុប្រធានក្រុមហ៊ុនអេសស៊ីជី ទទួលបន្ទុកអាជីវកម្មក្នុងតំបន់ សម្រាប់អាជីវកម្មស៊ីម៉ង់ត៍-សម្ភារសំណង់របស់អេសស៊ីជី បានឱ្យដឹងថា៖ “កម្មវិធីអាហារូបករណ៍នេះ បានផ្ដល់ទៅឲ្យសិស្សកម្ពុជាអស់រយៈពេលប្រាំឆ្នាំមកហើយចាប់តាំងពីឆ្នាំ ២០១៤ មក។ ក្នុងរយៈពេលជាច្រើនឆ្នាំមក យើងបានផ្ដល់អាហារូបករណ៍ជាង ១០០០ ទៅហើយសម្រាប់សិស្សវិទ្យាល័យនៅរាជធានីភ្នំពេញ ខេត្តកណ្ដាល និងខេត្តកំពត។ ការផ្ដល់អាហារូបករណ៍ដល់និស្សិតសកលវិទ្យាល័យចំនួន ១០ រូប ដែលធ្លាប់ជាសិស្សទទួលអាហារូបករណ៍កម្មវិធី អេសស៊ីជី ចែករំលែកក្ដីសុបិន នេះដែរ ហើយដែលបច្ចុប្បន្នកំពុងសិក្សាតាមមុខវិជ្ជាជំនាញផ្សេងៗ។ អាហារូបករណ៍នឹងត្រូវផ្ដល់ទៅឲ្យនិស្សិតទាំងនោះរហូតដល់ពួកគេបញ្ចប់ការសិក្សា”។
ពិធីប្រគល់អាហារូបករណ៍បានប្រព្រឹត្តទៅក្រោមអធិបតីភាពឯកឧត្តម សុះ ហ្វាស៊ី អនុរដ្ឋលេខាធិការក្រសួងអប់រំ យុវជន និងកីឡា និងឯកឧត្តម ផាន់យ៉ារ៉ាក់ ភូនសាប់ (Panyarak Poolthup) ឯកអគ្គរាជទូតថៃ ប្រចាំប្រទេសកម្ពុជា។
យុវសិស្ស ឆឹម ឌីណា ដែលជាជយលាភីអាហារូបករណ៍ អេសស៊ីជី ឆ្នាំ ២០១៨ ដែលមានបំណងចង់ក្លាយជាកសិករបែបទំនើប ដែលមានចំណេះដឹង និងប្រើប្រាស់វិធីសាស្ត្រមានប្រសិទ្ធភាពនៅពេលធ្វើកសិកម្ម ហើយក្លាយជាអ្នកនាំផ្លូវក្នុងការជំរុញកសិករផ្សេងទៀតឲ្យប្រកបរបរកសិកម្មផ្អែកលើចំណេះដឹងដែលទទួលបាន។
យុវសិស្ស ឆឹម ឌីណា បានថ្លែងថា៖ “ថ្ងៃនេះ ខ្ញុំពិតជាមានសំណាងខ្លាំងណាស់ ដែលបានទទួលអាហារូបករណ៍ អេសស៊ីជីចែករំលែកក្ដីសុបិន ហើយខ្ញុំជឿជាក់ថា អាហារូបករណ៍នេះ អាចជួយឲ្យខ្ញុំបន្តការសិក្សារបស់ខ្ញុំ និងឈោងចាប់ក្ដីសុបិនរបស់ខ្ញុំទៅថ្ងៃអនាគតបាន”។
ចំណែកឯកញ្ញា ឈាវ ខេង ជាជយលាភី អាហារូបករណ៍ អេសស៊ីជី ឆ្នាំ ២០១៨ ហើយជាក្មេងកំព្រាម្ដាយ ដែលបានស្លាប់ដោយជំងឺមហារីក ហើយបច្ចុប្បន្នស្នាក់នៅក្នុងមណ្ឌលរបស់អង្គការ។ កញ្ញាបានថ្លែងថា៖ “ជាមួយនឹងអាហារូបករណ៍នេះ បានធ្វើឲ្យខ្ញុំប្ដេជ្ញាចិត្តចំពោះខ្លួនឯង និងម៉ាក់របស់ខ្ញុំថា ទោះជាមានរឿងអ្វី ឬក៏ទុក្ខលំបាកយ៉ាងណាក៏ខ្ញុំត្រូវតែសម្រេចនូវក្ដីសុបិនមួយនេះឲ្យទាន់តែបានក្នុងការក្លាយជាវេជ្ជបណ្ឌិតមួយរូប”។
ក្រៅពីកម្មវិធីអាហារូបករណ៍អេសស៊ីជី ចែករំលែកក្ដីសុបិន ក្រុមហ៊ុនអេសស៊ីជី ក៏អនុវត្តសកម្មភាពទំនួលខុសត្រូវសង្គមជាច្រើនផ្សេងទៀតផងដែរ ដូចជា កម្មវិធីបណ្ដុះបណ្ដាលជាងសំណង់ និងកម្មវិធីហ្វឹកហាត់បាល់ទាត់ ដែលទាំងអស់នេះសុទ្ធតែជាការឆ្លុះបញ្ចាំងឲ្យឃើញពីការប្ដេជ្ញាចិត្តរបស់ក្រុមហ៊ុនអេសស៊ីជី ដែលមានបំណងចង់ផ្ដល់នូវអត្ថប្រយោជន៍ផ្សេងៗ និងលើកកម្ពស់គុណភាពជីវិតរស់នៅក្នុងប្រទេសកម្ពុជា៕