- 2018-11-19 02:20:43
- សេដ្ឋកិច្ច
ឈ្មួញ៖ ខ្ញុំចេះដើរទិញអំពៅជាង២០ឆ្នាំហើយមិនដែលឃើញឆ្នាំណាថ្លៃខ្ពស់ដូចឆ្នាំនេះទេ
- 2018-11-19 02:20:43
- ចំនួនមតិ 0 | ចំនួនចែករំលែក 0
ឈ្មួញ៖ ខ្ញុំចេះដើរទិញអំពៅជាង២០ឆ្នាំហើយមិនដែលឃើញឆ្នាំណាថ្លៃខ្ពស់ដូចឆ្នាំនេះទេ
ចន្លោះមិនឃើញ
អ្នកទិញអំពៅលក់បន្ត ឬហៅថាឈ្មួញកណ្តាលបានអះអាងថាអំពៅឆ្នាំនេះពិបាករកទិញ និងមានតម្លៃកើនទ្វេដងលើសឆ្នាំកន្លងទៅ។
លោក ពូ ឈន ជាឈ្មួញកណ្ដាលម្នាក់ដែលមានស្តង់លក់អំពៅនៅផ្សារទីរួមខេត្តតាកែវប្រាប់Sabay ថាឆ្នាំនេះតម្លៃអំពៅថ្លៃដោយកន្លែងខ្លះទឹកលិច ជាហេតុធ្វើឲ្យអំពៅមិនសូវសម្បូរដូចឆ្នាំកន្លងទៅ។
លោកថា៖«ខ្ញុំចេះដើរទិញអំពៅជាង២០ឆ្នាំហើយមិនដែលឃើញឆ្នាំណាអំពៅមានតម្លៃខ្ពស់ដូចឆ្នាំនេះទេគឺពិបាកទិញណាស់...ឆ្នាំមិញចម្ការមួយដែលខ្ញុំធ្លាប់ទិញម៉ៅត្រឹមតែ៧លានរៀលទេតែឆ្នាំនេះឡើងដល់១៥ទៅ១៦លានរៀល...ធ្វើម៉េចបើយើងមិនទិញអត់មានអំពៅលក់នឹងគេ»។
បុរសវ័យកណ្ដាលរូបនេះបន្តថាលោកមានរថយន្ត១គ្រឿងដើរទិញអំពៅតាមខេត្តមួយចំនួនដូចជាស្រុកកោះធំ ខេត្តកណ្ដាល កំពង់ស្ពឺ អ្នកលឿង ព្រៃវែង និងស្រុកគីរីវង់ ខេត្តតាកែវ ហើយថាឆ្នាំនេះទឹកធំជន់លិចចម្ការអំពៅធំៗនៅខេត្តកំពង់ស្ពឺនិងខេត្តកណ្ដាលជាហេតុធ្វើឲ្យតម្លៃអំពៅហក់ឡើងខ្ពស់ជាងរាល់ឆ្នាំ។
លោក អែន ម៉ាក់លី កសិករដាំអំពៅម្នាក់ក្នុងចំណោមអ្នកដាំរាប់រយនាក់ក្នុងស្រុកគីរីវង់បានរៀបរាប់ថាអំពៅឆ្នាំនេះមានតម្លៃល្អជាងឆ្នាំមុននិងមានទីផ្សារល្អ។
កសិកររូបនេះបន្តទៀតថា៖«ខ្ញុំសប្បាយចិត្តណាស់ព្រោះកាលពីឆ្នាំទៅអំពៅដែលខ្ញុំដាំលើទំហំដីប្រមាណជា៥០អា ទទួលផលមិនបាន១លានរៀលផងតែឆ្នាំនេះឈ្មួញកណ្ដាលអោយថ្លៃជិត៣លានរៀលទៅហើយតែខ្ញុំមិនទាន់ទទួលលុយកក់ពីឈ្មួញទេព្រោះចង់ទុកអោយបានថ្លៃជាងនេះបន្តិច»។
ជាមួយទឹកមុខញញឹមញញែមអ្នកស្រី ឡាយ គឹមលីន អ្នកស្រុកគិរីវង់ដែរឲ្យដឹងថាអ្នកស្រីមានចម្ការអំពៅ២កន្លែងដោយអ្នកស្រីថាបានទទួលលុយកក់ពីឈ្មួញអស់ហើយក្នុងតម្លៃ៣លានរៀលខណៈពេលដែលឆ្នាំមុនៗបានថ្លៃត្រឹមតែ១លានរៀលប៉ុណ្ណោះក្នុង១រដូវ។
អ្នកស្រីបន្តថា៖ «មិនថាតែខ្ញុំទេអ្នកផ្សេងទៀតមានអារម្មណ៍ត្រេកអរដូចៗគ្នាព្រោះមិនដែលមានឆ្នាំណាអំពៅបានថ្លៃអញ្ចឹងទេ....ខ្ញុំចង់ឲ្យវាបានថ្លៃបែបនេះរាល់ឆ្នាំ»។
កសិករទាំងខាងលើមិនបានដឹងច្បាស់ទេថាមូលហេតុអ្វីបានជាអំពៅឆ្នាំនេះឡើងថ្ងៃ គ្រាន់តែឮតៗគ្នាថាតំបន់ដែលធ្លាប់ដាំអំពៅមួយចំនួនត្រូវទឹកជន់លិចកាលពីពេលកន្លងទៅ ទើបធ្វើឲ្យចំនួនអំពៅមានកម្រិត៕