- 2018-11-19 03:25:39
- ការអប់រំ
កុំភ័យខ្លាចទាត់ខ្យល់! ចេះ៥ក្បាច់នេះ ចប់បរិញ្ញាបត្រភ្លាម ប្រាក់ខែអាចដល់ខ្ទង់ពាន់ដុល្លារ
- 2018-11-19 03:25:39
- ចំនួនមតិ 0 | ចំនួនចែករំលែក 0
កុំភ័យខ្លាចទាត់ខ្យល់! ចេះ៥ក្បាច់នេះ ចប់បរិញ្ញាបត្រភ្លាម ប្រាក់ខែអាចដល់ខ្ទង់ពាន់ដុល្លារ
ចន្លោះមិនឃើញ
មាននិស្សិតមួយចំនួន ក្រោយបញ្ចប់ការសិក្សាថ្នាក់បរិញ្ញាបត្រ តែងមានផលវិបាកក្នុងការស្វែងរកការងារធ្វើ ជាពិសេសការងារល្អៗទទួលបានប្រាក់ខែខ្ពស់។ ដូច្នេះតើមានគន្លឹះសំខាន់ៗអ្វីខ្លះ ដើម្បីក្រោយបញ្ចប់ការសិក្សានៅសាកលវិទ្យាល័យមានការងារល្អធ្វើភ្លាម? ខាងក្រោមនេះជាការចែករំលែក ពីសាស្ត្រាចារ្យ វង់ សុភ័ក្រ ដែលបង្រៀននៅសាកលវិទ្យាល័យឯកជនមួយ នៅរាជធានីភ្នំពេញ៖
១. កំណត់គោលដៅការងារឲ្យច្បាស់លាស់
មុនជ្រើសរើសមុខជំនាញណាមួយមកសិក្សា ត្រូវកំណត់ពីការងារដែលខ្លួនឯងចង់ធ្វើក្រោយបញ្ចប់ការសិក្សា។ និស្សិតមួយចំនួនជ្រើសរើសមុខជំនាញទាំងស្រពេចស្រពិល មិនច្បាស់ថាតើការងារអ្វីដែលខ្លួនចង់ធ្វើពិតប្រាកដនោះទេ។ បែបនេះហើយ ទើបក្រោយរៀនចប់និស្សិតខ្លះ ជ្រើសរើសការងារដែលខុសនឹងមុខជំនាញ ឬនិយាយបានថាធ្វើឲ្យតែមាន។
លោកសាស្ត្រាចារ្យ សុភ័ក្រ បន្តថា ប្រសិនបើចង់បានការងារមួយ ដែលអាចមានឱកាសរីកលូតលាស់ ឡើងតំណែង ប្រាក់ខែ គួរធ្វើការដែលត្រូវនឹងជំនាញ ទេពកោសល្យដែលជានិស្ស័យរបស់ខ្លួនឯង បូកផ្សំនឹងជំនាញដែលសិក្សាចេះច្បាស់លាស់ពីសាកលវិទ្យាល័យ។
២. ភាសាបរទេស
ដូចដែលដឹងស្រាប់ហើយ ភាសាអង់គ្លេសគឺជាតម្រូវការសំខាន់បំផុតក្នុងវិស័យការងារ មិនថាក្រុមហ៊ុនឯកជន និងស្ថាប័នរដ្ឋឡើយ។ ត្រូវចេះភាសាអង់គ្លេសឲ្យច្បាស់ អាចប្រើការបាន ទើបអាចប្រកួតប្រជែងជាមួយកំណើនធនធានដ៏លើសលុប។ កាន់តែល្អ ប្រសិនចេះភាសាចិនបន្ថែម ដើម្បីឆ្លើយតបទៅនឹងកំណើនវិនិយោគដ៏ច្រើនរបស់ប្រទេសចិន។
៣. ការបង្កើតទំនាក់ទំនងល្អៗ
ក្នុងនាមជានិស្សិតនៅសាកលវិទ្យាល័យមួយរូប គួរបង្កើតទំនាក់ទំនងឲ្យបានច្រើន ជាមួយបុគ្គលជោគជ័យ ឬអ្នកណាដែលមានបទពិសោធន៍ល្អៗច្រើន។ គួរព្យាយាមកាត់បន្ថយទំនាក់ទំនងជាមួយបុគ្គលដែលមិនផ្ដោតលើការខំប្រឹងប្រែង ពោលគឺអ្នកចូលចិត្តការសប្បាយ ហើយងាកមកទំនាក់ទំនងជាមួយបុគ្គល ដែលអាចផ្ដល់ព័ត៌មាន បទពិសោធន៍ ដែលពាក់ព័ន្ធនឹងការងារ ការសិក្សាផ្សេងៗ។
៤. ភាពក្លាហាន
ឱកាសកើតចេញពីភាពក្លាហាន គ្មាននរណាម្នាក់ អាចផ្ដល់ឱកាសច្រើនបំផុត ជាងខ្លួនយើងនោះទេ។ មានតែខ្លួនឯងនេះហើយ ដែលជាអ្នកស្វះស្វែងជួយជ្រោមជ្រែងដល់ខ្លួនឯង តាមរយៈភាពក្លាហាន មិនថាការប្រកួតសមត្ថភាពណាមួយ ការប្រឡងយកអាហារូបករណ៍ វេទិកាវោហារសព្ទជាសាធារណៈជាដើម។ កាលណាមានភាពក្លាហាននាំមុខហើយ នោះនឹងនាំខ្លួនយើងបន្តដំណើរទៅមុខឥតឈប់ឈរ។
៥. មានពេលវេលាអាចសាកល្បងការងារបានគួរតែធ្វើ
នៅក្នុងអំឡុងពេលសិក្សា ប្រសិនបើឃើញឱកាសការងារណាមួយ គិតថាខ្លួនអាចលៃពេលដើម្បីធ្វើ គួរតែសាកល្បងធ្វើ។ ទន្ទឹមនឹងមានជំនាញមួយសាកលវិទ្យាល័យ ការងារក៏ជាបទពិសោធន៍មួយ ជាទុនដ៏សំខាន់ឲ្យខ្លួនឯងយល់កាន់តែច្បាស់ពីខ្លួនឯង យល់ដឹងពីវិស័យការងារ សម្លឹងបានវែងឆ្ងាយ។ ក្រោយរៀនចប់ និស្សិតកាន់តែច្បាស់ទៀតទាំងការងារ និងជំនាញ ហើយអាចឈានចូលក្រុមហ៊ុនលំដាប់ណាមួយដែលខ្លួនពេញចិត្ត៕