សប្បាយអាចក្លាយជាទុក្ខ បើមិនដឹងរឿងទាំង១០ គួរប្រយ័ត្នពេលដើរលេងអុំទូក

2018-11-19 03:49:09
ការអប់រំ

2018-11-19 03:49:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ព្រះរាជពិធីបុណ្យ អុំទូក បណ្ដែតប្រទីប និងសំពះព្រះខែ អកអំបុក នឹងចាប់ផ្ដើមនៅថ្ងៃ២១ដល់ ២៣ វិច្ឆិកា ខាងមុខនេះ។ តាមការប៉ាន់ស្មានរបស់អគ្គស្នងការនគរបាលជាតិ មនុស្សប្រមាណ ៣ម៉ឺននាក់ នឹងចូលរួមអបអរសាទរពិធីបុណ្យជាតិដ៏ធំនៅរាជធានីភ្នំពេញ។ ចំនួនមនុស្សដ៏ច្រើននេះ យើងមិនអាចដឹងមុនថា នឹងអាចមានបញ្ហាអសកម្មណាមួយកើតឡើងជាយថាហេតុនោះឡើយ ដូច្នេះ Sabay សូមចែករំលែកប្រការប្រុងប្រយ័ត្ន ១០យ៉ាង នៅពេលដើរកម្សាន្តនាឱកាសនេះ៖

១. របស់របរមានតម្លៃ

ជាការពិត លោកអ្នកត្រូវតែប្រុងប្រយ័ត្នចំពោះរបស់របរមានតម្លៃឲ្យមែនទែន ដូចជាម៉ូតូ ប្រាក់កាស គ្រឿងអលង្ការ ទូរស័ព្ទដៃជាដើម ព្រោះមានជនឆ្លៀតឱកាសជាច្រើន ដែលចាំលួច ឆក់ និង លូកហោប៉ៅនៅក្នុងពិធីបុណ្យមួយនេះផងដែរ។ ប្រការល្អគួរតែ រកកន្លែងដែលមានសុវត្ថិភាពដើម្បីផ្ញើម៉ូតូ និងរក្សាសំបុត្រឲ្យបានល្អ។ កុំដាក់កាបូបលុយនៅហោប៉ៅក្រោយ ហើយគួរពាក់អាវវែងៗដើម្បីបិទបាំងកាបូបលុយ និងទូរស័ព្ទដៃ។ លើសពីនេះមិនគួរពាក់គ្រឿងអលង្ការមានតម្លៃច្រើននោះទេ។

២. វង្វេងគ្នា

ពេលមានមនុស្សជាច្រើនដើរទៅមក គឺវាងាយណាស់ដែលធ្វើអោយអ្នកវង្វេងគ្នា ជាពិសេសកុមារតូចៗ។ ដូចនេះអ្នកគួរធ្វើដំណើរជិតគ្នា និងប្រាប់ទីតាំងដែលអ្នកនឹងទៅអោយបានច្បាស់លាស់។ ក្នុងករណីបាត់គ្នា អ្នកអាចទាក់ទងជាមួយអាជ្ញាធរ ឬមន្ត្រីមានសមត្ថកិច្ចដើម្បីជួយផ្សាយដំណឹងផងដែរ។ ម្យ៉ាងសម្រាប់កុមារតូចៗ ម្ដាយឪពុកគួរសរសេរលេខទូរស័ព្ទដាក់ជាប់ខ្លួនកូន ដើម្បីការពារ គឺជាការល្អបំផុត។

៣. ខ្យល់គ

នៅកន្លែងដែលមានមនុស្សជាច្រើនប្រជ្រៀតគ្នាកកកុញ គឺច្បាស់ជាបណ្ដាលអោយមានអាការៈថប់ដង្ហើមជាមិនខាន។ សម្រាប់មនុស្សដែលមានកម្លាំងខ្សោយគឺពិតជាងាយប្រឈមមុខនឹងការខ្យល់គណាស់ ហេតុនេះយល់ល្អ អ្នកគួរតែត្រៀមប្រេងខ្យល់ ឬប្រេងកូឡាតាមខ្លួន និងសូមកុំព្យាយាមឈរនៅផ្គុំគ្នាយូរពេក។

៤. ចំណីអាហារគ្មានអនាម័យ

រូបតំណាង

ចំណីអាហារ និង ទឹកគឺមានសារៈសំខាន់ណាស់។ បើលោកអ្នកបរិភោគអាហារដែលមិនស្អាតគឺងាយឲ្យលោកអ្នក មានជំងឺរាគរូស ចុកឆ្អល់ជាមិនខាន និងឆ្លងជំងឺផ្សេងៗ។ ក្នុងករណីមានរឿងនេះ សូមប្រញាប់ទៅជួបក្រុមគ្រូពេទ្យស្ម័គ្រចិត្តដែលប្រចាំការក្នុងពិធីបុណ្យ ហើយនៅជិតលោកអ្នកបំផុត។

៥. កុំឲ្យក្មេងតូចៗទៅជិតទឹកទន្លេ

កូនក្មេងតូចៗ និង ទឹកគឺជាសញ្ញាមួយនៃភាពគ្រោះថ្នាក់ផងដែរ។ កុំបណ្ដោយអោយកូនរបស់លោកអ្នក ទៅលេងនៅក្បែរច្រាំងទន្លេឲ្យសោះ ព្រោះអាចរអិលធ្លាក់ដោយចៃដន្យបាន។

៦. ជនឆបោក

មួយវិញទៀត គួរតែប្រយ័ត្នប្រយែង ចំពោះជនមិនស្គាល់មុខ ដែលសួររកខ្ចីទូរស័ព្ទ ដូរលុយដុល្លារក្រដាសធំៗ ឬធ្វើល្បិចជ្រុះមាសអោយយើងរើសជាដើម។ លើសពីនេះទៅទៀតកុំពិសាភេសជ្ជៈ ឬ អាហារពីមនុស្សមិនស្គាល់មុខព្រោះអ្នកអាចរងគ្រោះដោយការដាក់ថ្នាំសណ្ដំក៏ថាបាន។

៧. ការបៀតបៀនផ្លូវភេទ

ចំពោះនារីៗ សូមប្រុងប្រយ័ត្ន ចំពោះជនខិលខូចមួយចំនួនដែលបន្លំបេះថ្ពាល់ ឬបន្លំប៉ះស្ទាបជាដើម។ ជាការល្អ មិនគួរដើរលេងដល់យប់ជ្រៅពេក ឬដើរតែឯងនៅកន្លែងស្ងាត់នោះឡើយ។ គួរដើរជាក្រុម ដើម្បីការពារគ្នាទៅវិញទៅមក។

៨. ប្រយ័ត្ននាំអេដស៍ចូលផ្ទះ

នាឆ្នាំកន្លងមក គេសង្កេតឃើញមាននារីរកស៊ីផ្លូវភេទមួយចំនួនបានយកឱកាសនេះដើម្បីស្វែងរកអតិថិជនផងដែរតាមរូបភាពបិទបាំងនានា។ ដូច្នេះសម្រាប់បុរសៗ ដែលមកលេងពិធីបុណ្យនេះ សូមគិតគូឲ្យបានវែងឆ្ងាយដល់អនាគតរបស់គ្រួសារ។

៩. ប្រយ័ត្នទិញចំទំនិញគ្មានគុណភាព

ដូចរាល់ឆ្នាំ ការតាំងពិព័រណ៍ និងលក់ទំនិញសឹងគ្រប់ភេទនៅពេលបុណ្យអុំទូកសំបូរហូរហែ ដែលដាក់លក់តម្លៃថោកៗ លក់បញ្ចុះតម្លៃ ទិញមួយថែមមួយ និងប្រូម៉ូសិនជាដើម។ ប៉ុន្តែលោកអ្នកក៏គួរតែប្រយ័ត្នទំនិញទាំងនោះ ព្រោះជនខិលមួយចំនួនអាចឆ្លៀតឱកាសកេងចំណេញ ដាក់លក់ផលិតផលក្លែងក្លាយ លក់ទំនិញហួសកាលបរិច្ឆេទ ...ល។

១០. ស្គាល់ទីតាំងពិនិត្យសុខភាព មិនគិតថ្លៃ

ក្នុងករណីមានបញ្ហា សុខភាព សូមបងប្អូនស្វែងរកសេវាពិនិត្យសុខភាព២៤ ម៉ោងរបស់ក្រសួងសុខាភិបាល ដោយឥតគិតថ្លៃ នៅតាមទីតាំងកំណត់ទាំង១២។ សូមចុចអានបន្ថែម៖ ទីតាំងពិនិត្យសុខភាព២៤ម៉ោង មិនគិតថ្លៃទាំង១២កន្លែង គួរដឹងមុន

អត្ថបទ៖ ស៊ិន សាវ៉េត