- 2018-11-19 10:52:22
- សុខភាព
ទោះបីមិនឆ្លងតែជំងឺទឹកនោមផ្អែមនេះបានក្លាយមូលហេតុទី៧ នៃមរណភាពនៅលើភពផែនដី
- 2018-11-19 10:52:22
- ចំនួនមតិ 0 | ចំនួនចែករំលែក 0
ទោះបីមិនឆ្លងតែជំងឺទឹកនោមផ្អែមនេះបានក្លាយមូលហេតុទី៧ នៃមរណភាពនៅលើភពផែនដី
ចន្លោះមិនឃើញ
សៀមរាប ១៨ វិច្ឆិកា ២០១៨ - ក្រុមហ៊ុនផលិតឱសថសាណូហ្វីកម្ពុជា សហការជាមួយ សមាគមជំងឺទឹកនោមផ្អែមកម្ពុជា (CDA) រៀបចំទិវាជំងឺទឹកនោមផ្អែមពិភពលោកក្រោមប្រធានបទ “គ្រួសារ និងជំងឺទឹកនោមផ្អែម” នៅភោជនីយដ្ឋានប្រាសាទបន្ទាយស្រី ខេត្តសៀមរាម នៅថ្ងៃទី ១៨ ខែវិច្ឆិកា ឆ្នាំ២០១៨ ដោយមានអ្នកជំនាញផ្នែកសុខភាព និងអ្នកចូលរួមប្រមាណ៦០០នាក់។
ទិវាជំងឺទឹកនោមផ្អែមពិភពលោក ត្រូវបានធ្វើឡើងជារៀងរាល់ឆ្នាំ នៅថ្ងៃទី ១៤ ខែវិច្ឆិកា។ ដោយឡែកក្នុងឆ្នាំ២០១៨ ក្រោមប្រធានបទ “គ្រួសារ និងជំងឺទឹកនោមផ្អែម” ទិវានេះរៀបចំឡើងក្នុងគោលបំណងលើកកម្ពស់ការយល់ដឹងពីផលប៉ះពាល់នៃជំងឺទឹកនោមផ្អែមទៅលើគ្រួសារ និងការគាំទ្រដល់បណ្តាញអ្នកដែលរងផលប៉ះពាល់ ជាពិសេស លើកកម្ពស់តួនាទីរបស់គ្រួសារនៅក្នុងការគ្រប់គ្រង ការថែទាំ ការការពារ និងការអប់រំទាក់ទងជំងឺទឹកនោមផ្អែម។
ក្នុងទិវានេះក៏មានការដង្ហែក្បួន និងកាន់បដាដែលរំលេចសារអប់រំខ្លី ពីសំណាក់សិស្សានុសិស្ស និងប្រជាពលរដ្ឋ ដើម្បីអបអរសាទរទិវាជំងឺនោមផ្អែមពិភពលោក និងការចែករំលែកចំណេះដឹងពីសំណាក់គ្រូពេទ្យជំនាញពីជំងឺនេះផងដែរ។
អ្នកស្រី ដាវ ធូង៉ា (Dao Thu Nga) នាយិកាគ្រប់គ្រងក្រុមហ៊ុនសាណូហ្វីកម្ពុជា បានមានប្រសាសន៍ថា៖ "គ្រួសារដើរតួនាទីយ៉ាងសំខាន់ក្នុងការដោះស្រាយហានិភ័យនៃជំងឺទឹកនោមផ្អែមប្រភេទទី២តាមរយៈការផ្តល់នូវការអប់រំ ធនធាន និងបរិស្ថាន ដើម្បីទ្រទ្រង់ការរស់នៅក្នុងជីវភាពរស់នៅដ៏មានផាសុកភាពមួយ”។
អ្នកស្រីបានបន្ថែមទៀតថា បើយោងតាមសហព័ន្ធជំងឺទឹកនោមផ្អែមអន្តរជាតិ ការគាំទ្រពីសំណាក់គ្រួសារចំពោះការថែទាំជំងឺទឹកនោមផ្អែមត្រូវបានបង្ហាញថាមានឥទ្ធពលយ៉ាងសំខាន់ ដែលធ្វើឲ្យលទ្ធផលសុខភាពអ្នកជំងឺប្រសើរឡើង។ ដូច្នេះវាពិតជាសំខាន់ក្នុងការទទួលបានការអអប់រំ និងគាំទ្រចំពោះការគ្រប់គ្រងព្យាបាលជំងឺទឹកនោមផ្អែមដល់អ្នកជំងឺ និងគ្រួសាររបស់ពួកគេ ដើម្បីកាត់បន្ថយផលប៉ះពាល់ផ្លូវចិត្តដោយសារជំងឺ ដែលអាចនាំឲ្យប៉ះពាល់ជាអវិជ្ជមានចំពោះគុណភាពជីវិត។
ជំងឺទឹកនោមផ្អែម ជាជំងឺមួយប្រភេទ ដែលស្ថិតនៅក្នុងប្រភេទជំងឺមិនឆ្លង។ អង្គការសុខភាពពិភពលោក បានព្យាករថា នៅឆ្នាំ២០៣០ ជំងឺទឹកនោមផ្អែមនឹងក្លាយជាមូលហេតុទី៧នៃមរណភាពនៅលើភពផែនដី ខណៈបច្ចុប្បន្ន មនុស្សជាង ៤២៥ លាននាក់ កំពុងរស់នៅជាមួយជំងឺទឹកនោមផ្អែម។
ដោយឡែក អត្រានៃជំងឺទឹកនោមផ្អែមនៅប្រទេសកម្ពុជា ជាទូទៅនៅទាបជាងបណ្តាប្រទេសអាស៊ីអាគ្នេយ៍នៅឡើយ។ ប៉ុន្តែកម្ពុជា មានប្រេវ៉ាឡង់នៃអ្នកជំងឺទឹកនោមផ្អែម ស្ថិតក្នុងវ័យចន្លោះពី ២០ ទៅ ៣០ឆ្នាំ ខ្ពស់ជាងបណ្តាលប្រទេសក្នុងតំបន់ប៉ាស៊ីហ្វិកខាងលិច និងខ្ពស់ជាងបណ្តាប្រទេសផ្សេងៗទៀតនៅលើពិភពលោក។ នេះបើតាមរបាយការណ៍ សហព័ន្ធជំងឺទឹកនោមផ្អែមអន្តរជាតិប៉ាស៊ីហ្វិកខាងលិច។
ប្រមាណ ២៣០,៨០០ ករណី នៃជំងឺទឹកនោមផ្អែម ត្រូវបានរកឃើញនៅកម្ពុជាក្នុងឆ្នាំ ២០១៥។ នេះបើតាមទិន្នន័យរបស់សហព័ន្ធជំងឺទឹកនោមផ្អែមអន្តរជាតិ។ ចំនួនប្រេវ៉ាឡង់នៃជំងឺទឹកនោមផ្អែមនៅកម្ពុជាក្នុងឆ្នាំ២០១០ គឺមាន ២,៣ ភាគរយ ក្នុងតំបន់ជនបទ ចំណែកនៅតាមទីក្រុងមានច្រើនជាង ៣ដង ខ្ពស់ជាងនៅតាមជនបទ។ រីឯប្រជាជនចំនួន ៥,៦ ភាគរយ ត្រូវបានរកឃើញថា មានជំងឺនេះ ផ្អែកតាមការស្ទង់មតិធ្វើឡើងដោយក្រសួងសុខាភិបាល។
លោកសាស្ត្រាចារ្យ លឹម កើកគី ប្រធានសមាគមជំងឺទឹកនោមផ្អែមកម្ពុជាជាជា សាខាខេត្តសៀមរាប (CDAsrb) បានមានប្រសាសន៍ថា “បច្ចុប្បន្នមានអ្នកជំងឺទឹកនោមផ្អែមជាមធ្យមប្រហែល ៤០០០នាក់ ដែលមកពិនិត្យព្យាបាលនៅសមាគមជំងឺទឹកនោមផ្អែមកម្ពុជាជាជាសាខាខេត្តសៀមរាប និងតាមបណ្តាលគ្លីនិកចល័តជារៀងរាល់ខែ។
ក្នុងនោះអ្នកជំងឺប្រមាណជាង ១០០០នាក់ មកទទួលសេវាព្យាបាលជាប្រចាំ ខណៈជាងពាក់កណ្តាលទៀតមកទទួលយកសេវាព្យាបាលម្តងម្កាលប៉ុណ្ណោះ។”
លោកសាស្ត្រាចារ្យបានបន្ថែមថា “ភាគច្រើននៃករណីទាំងនេះ គឺជាជំងឺទឹកនោមផ្អែមប្រភេទទី២ ដែលករណីនេះអាចការពារបានយ៉ាងច្រើនតាមរយៈសកម្មភាពមួយចំនួនដូចជា ការធ្វើលំហាត់ប្រាណឲ្យបានទៀងទាត់ ការបរិភោគអាហារដែលមានតុល្យភាព និងការលើកកម្ពស់ជីវភាពរស់ប្រកបដោយផាសុកភាព។” លោកសាស្ត្រាចារ្យក៏បានផ្តល់ជាសារសំខាន់ផងដែរថា ជំងឺទឹកនោមផ្អែមមិនអាចព្យាបាលបានទេ ប៉ុន្តែអ្នកជំងឺមិនស្លាប់ដោយសារជំងឺទឹកនោមផ្អែមនោះឡើយ បើពួកគេគោរពតាមបទបញ្ជាពេទ្យ។
តាមរយៈការរៀបចំទិវាជំងឺទឹកនោមផ្អែមពិភពលោកឆ្នាំ២០១៨ លោកសាស្ត្រាចារ្យរំពឹងថា ការយល់ដឹងទាក់ទងនឹងជំងឺទឹកនោមផ្អែមរបស់ប្រជាពលរដ្ឋកម្ពុជា នឹងកាន់តែល្អប្រសើរឡើង។
សូមជម្រាបជូនដែរថា កាលពីថ្ងៃទី ១១ ខែសីហា ឆ្នាំ២០១៨ ក្រុមហ៊ុនសាណូហ្វីកម្ពុជា បានសម្ពោធ ”កម្មវិធីអប់រំជំងឺទឹកនោមផ្អែមនៅកម្ពុជា” សម្រាប់រយៈពេលបីឆ្នាំរបស់ខ្លួន ដែលហៅកាត់ថា CEP-D។ គម្រោង CEP-D រយៈពេលបីឆ្នាំនៅទូទាំងប្រទេសនេះ ទទួលថវិកាជិតកន្លះលានដុល្លារសហរដ្ឋអាមេរិក ដែលជាសហហិរញ្ញប្បទានរវាងក្រុមហ៊ុនសាណូហ្វី និង KFW DEG ដោយមានការសហការប្រតិបត្តិប្រតិបត្តិការជាមួយសមាគមទឹកនោមផ្អែមនិងក្រពេញកម្ពុជា សាកលវិទ្យាល័យវិទ្យាសាស្ត្រសុខាភិបាល សមាគមជំងឺទឹកនោមផ្អែមកម្ពុជាជាជា និងដៃគូពាក់ព័ន្ធដទៃទៀត។
ថវិកាទាំងនោះនឹងត្រូវបានបញ្ចូលទៅក្នុងវគ្គបណ្តុះបណ្តាលសម្រាប់ក្រុមវេជ្ជបណ្ឌិតប្រមាណ១១៨០នាក់ ក៏ដូចជានិស្សិតចំនួន៥០០នាក់មកពីសាកលវិទ្យាល័យវេជ្ជសាស្ត្រសុខាភិបាល។ ថវិកានេះក៏ដើម្បីលើកកម្ពស់ការយល់ដឹងដល់ដល់អ្នកជំងឺទឹកនោមផ្អែម និងប្រជាជនកម្ពុជាអំពីសារៈសំខាន់ក្នុងការគ្រប់គ្រងជំងឺនេះផងដែរ៕
