- 2018-11-27 02:53:48
- ការអប់រំ
បើអាយុលើសពី២០ឆ្នាំ គួរធ្វើរឿង៦យ៉ាងនេះ ពេលដាច់ឆ្នាំចាស់ ទើបជីវិតមានក្ដីសុខ
- 2018-11-27 02:53:48
- ចំនួនមតិ 0 | ចំនួនចែករំលែក 0
បើអាយុលើសពី២០ឆ្នាំ គួរធ្វើរឿង៦យ៉ាងនេះ ពេលដាច់ឆ្នាំចាស់ ទើបជីវិតមានក្ដីសុខ
ចន្លោះមិនឃើញ
ជីវិតមនុស្សម្នាក់ៗ ប្រៀបដូចជាដំណើរផ្សងព្រេងដ៏វែងឆ្ងាយ ត្រូវជួបរឿងរ៉ាវសព្វគ្រប់បែបយ៉ាង ជួនកាលរឿងមិនចង់ជួបក៏ត្រូវតែជួប មានផ្អែម ប្រៃ ល្វីង ជូរចត់។ គ្មាននរណាម្នាក់មានជីវិតអមត ហើយរង់ចាំធ្វើអ្វីដែលនាំឲ្យខ្លួនសប្បាយ នៅចុងបញ្ចប់ដូចភាពយន្តឡើយ។ គួរធ្វើអ្វីដែលនាំឲ្យខ្លួនឯងរីករាយចាប់ពីពេលនេះទៅ ដូច៦ចំណុច នៅខាងក្រោមនេះ៖
១. ជ្រើសរើសការងារណាដែលធ្វើឲ្យខ្លួនឯងសប្បាយចិត្ត
ការងារជាចំណែកសំខាន់មួយក្នុងជីវិត ហើយជីវិតស្មុគស្មាញ ឬសប្បាយចិត្តក៏អាស្រ័យលើចំណុចនេះដែរ។ ដូច្នេះហើយ គួរធ្វើអ្វីដែលខ្លួនឯងស្រលាញ់ ពេលខ្លះមិនផ្ដោតលើប្រាក់ចំណូលជាធំ ឬតំណែងអ្វី ប្រភេទអ្វី រដ្ឋ ឯកជនឡើយ ប៉ុន្តែត្រូវសួរខ្លួនឯងថា ពេលក្រោកពីគេងសប្បាយចិត្តទៅធ្វើការដែរឬទេ? ឬឲ្យតែដល់ថ្ងៃធ្វើការបែរជាធុញថប់ទៅវិញ?
ធ្វើអ្វីទៅតាមទេពកោសល្យពីធម្មជាតិ ធ្វើដោយចេញពីក្ដីស្រលាញ់ នោះជីវិតនឹងស្រស់ស្រាយរាល់ថ្ងៃ ផ្ទុយពីមនុស្សដែលធ្វើអ្វីខុសពីចំណូលចិត្តរបស់ខ្លួន ការងារក្លាយជាសម្ពាធមួយក្នុងជីវិតខ្លួនឯង។
២. ចំណាយលុយដែលរកបានធ្វើឲ្យខ្លួនឯងមានក្ដីសុខ
លុយដែលខិតខំរកដោយលំបាកនោះ គួរបែងចែកមួយផ្នែកផ្ដល់សុភមង្គលឲ្យខ្លួនឯងខ្លះ ដូចជាទិញរបស់ដែលខ្លួនឯងប្រាថ្នា ទៅកម្សាន្តនៅតំបន់ទេសចរណ៍ដែលប៉ងជាយូរ ឬបើមានលទ្ធភាពដើរលេងក្រៅប្រទេសទៀតក៏កាន់តែប្រសើរ។
ចំណុចនេះមិនមែនមានន័យថា ឲ្យចាយបង្ហូរមិនទុកសន្សំនោះទេ ប៉ុន្តែត្រូវធ្វើឲ្យខ្លួនឯងរីករាយចាប់ពីលុយតិចតួចតាមលទ្ធភាពរបស់ខ្លួន កុំចាំទាល់តែក្លាយជាអ្នកមាន ព្រោះយើងមិនដឹងថា ទម្រាំដល់ពេលនោះ តើយើងអាចនៅចាយលុយនោះបានឬទេ? កុំចាំរហូតដើរលែងរួច ទើបនឹកឃើញស្ដាយក្រោយ។
៣. ដល់ពេលវេលាដែលគិតថាមានស្នេហាបានគួរតែចាប់ផ្ដើម
ជីវិតយុវវ័យគ្រប់រូបមិនថា អ្នកណាក៏មិនអាចជៀសផុត ពីច្បាប់ធម្មជាតិមួយនេះដែរ។ ដូច្នេះកុំគិតថាមានស្នេហាជាការខុសឆ្គង ឬរង់ចាំដល់មានអ្វីៗគ្រប់យ៉ាងទើបហ៊ានបង្កើតស្នេហា។ ការណ៍គិតបែបនេះដូចជាដាក់អម្រែកដ៏ធ្ងន់មួយសម្រាប់ខ្លួនឯងពេកហើយ មានស្នេហាមិនមែនជាកំហុសឡើយ តែខុសត្រង់ថា យកស្នេហាមកញាំញីជីវិតរហូតក្លាយជាទុក្ខទៅវិញទេ។
ស្នេហាជាគ្រឿងលម្អមួយធ្វើឲ្យជីវិតរីករាយ និងកាន់តែស្រស់បំព្រងឡើង។ ស្នេហាគ្រាន់តែជាពាក្យតំណាងឲ្យបុគ្គល២នាក់ ជាអ្នកបង្កើតវាឡើង ស្នេហាមិនបានធ្វើឲ្យអ្នកណាឈឺចាប់ឡើយ តែការឈឺចាប់ ឬរីករាយដោយសារស្នេហា គឺផ្ដើមចេញពីរបុគ្គលដែលបង្កើតវាឡើង ជាមនុស្សពូកែប៉ុនណាក្នុងរឿងនេះ។
ដូច្នេះគួរហ៊ានចាប់ផ្ដើមវាឡើងជាមួយមនុស្សដែលយើងមិនអាចខ្វះបានក្នុងជីវិត កុំរង់ចាំពេលវេលា ព្រោះគ្មាននរណាម្នាក់ដឹងថា ថ្ងៃស្អែកមានរឿងអ្វីកើតឡើងនោះទេ គួរធ្វើអ្វីដែលបេះដូងកំពុងទាមទារ។
៤. ព្រលែងខ្លួនឯងឲ្យធ្វើខុសកុំបិទផ្លូវខ្លួនឯង
ចំណុចនេះ មានន័យថា ត្រូវហ៊ានប្រថុយ ហ៊ានធ្វើ ហ៊ានទទួលថាខុស កុំគិតថាខ្លួនឯងធ្វើអ្វីក៏ល្អ ធ្វើអ្វីក៏ត្រូវគ្រប់បែបយ៉ាងនោះ។ នៅលើលោកនេះគ្មានអ្នកណាមួយល្អឥតខ្ចោះឡើយ កុំគិតថាការធ្វើខុសជារឿងអាម៉ាស់ ជារឿងដែលធ្វើឲ្យខ្លួនឯងធ្លាក់តម្លៃឲ្យសោះ។ ប៉ុន្តែការព្រលែងខ្លួនឯងឲ្យធ្វើខុស នោះនឹងធ្វើឲ្យខ្លួនឯងកាន់តែរីកចម្រើន សម្លឹងឃើញពិភពលោកកាន់តែធំទូលាយ មិនមែនមើលឃើញតែខ្លួនឯងនោះទេ។
ការមិនទទួលស្គាល់ខ្លួនឯង ប្រៀបដូចជាការបិទឱកាសមួយ មិនអាចបោះជំហានទៅមុខទៀត គឺនៅតែដដែល គ្មានអ្វីផ្លាស់ប្ដូរឡើយ។
៥. ត្រូវគិតថាបញ្ហាជារសជាតិជីវិត កុំគិតថាជាកម្មពៀរ
នៅលើលោកនេះ សួរថាតើនរណាមួយដែលថា មិនមានបញ្ហា មានរូបគឺតែងមានទុក្ខ ជាច្បាប់នៃជីវិត។ ជីវិត គឺប្រៀបដូចជាការរង់ចាំដោះស្រាយបញ្ហាពីមួយរឿងទៅមួយរឿង ហេតុនេះហើយកុំគិតថា ជីវិតខ្លួនឯងពោរពេញដោយទុក្ខនោះ។ មនុស្សគ្រប់រូបមានទុក្ខដូចគ្នា គ្រាន់តែថា អ្នកខ្លះធ្ងន់ អ្នកខ្លះស្រាលប៉ុណ្ណោះ ត្រូវរីករាយនឹងដោះស្រាយវាជានិច្ច។ ការណ៍ដោះស្រាយបញ្ហាទុក្ខលំបាក មិនមែនជាកម្មពៀរឡើយ តែនេះហើយជារសជាតិជីវិតរបស់មនុស្ស។
៦. រស់នៅជាខ្លួនឯងពេញចិត្តអ្វីដែលខ្លួនមាន
សេចក្ដីសុខរបស់មនុស្ស អាចកើតមានបានលុះត្រាតែចិត្តស្ងប់ ពេញចិត្តអ្វីដែលជារបស់ខ្លួនឯងឬទេ? កុំយកជីវិតខ្លួនឯង ទៅប្រៀបធៀបជាមួយអ្នកដទៃ ព្រោះជួនកាលអ្នកដែលកំពុងផ្អែមល្ហែម ឬមានសុភមង្គលនៅនឹងមុខអ្នកដទៃ មិនដឹងថានៅក្រោយខ្នងមានរឿងអ្វីខ្លះនោះទេ។ ការណ៍យកជីវិតរបស់ខ្លួនទៅប្រៀបជាមួយអ្នកដទៃ គឺជារឿងដ៏ខុសឆ្គង ត្រូវបង្កើតក្ដីសុខឲ្យខ្លួនឯងទៅតាមលទ្ធភាពដែលខ្លួនឯងមាន។ សុភមង្គល ឬក្ដីសុខរបស់មនុស្សម្នាក់ៗ មានលក្ខណៈផ្សេងពីគ្នា ទៅតាមស្ថានភាពជាក់ស្ដែង សំខាន់តើយើងចេះធ្វើឲ្យខ្លួនឯងមានក្ដីសុខបានប៉ុណ្ណាតែប៉ុណ្ណោះ៕