- 2018-12-03 01:45:43
- សេដ្ឋកិច្ច
ត្បាញដោយដៃបានតិចពេក ច្នៃដាក់ម៉ូទ័រត្បាញបានរាប់សិបក្នុងមួយថ្ងៃៗ
- 2018-12-03 01:45:43
- ចំនួនមតិ 0 | ចំនួនចែករំលែក 0
ត្បាញដោយដៃបានតិចពេក ច្នៃដាក់ម៉ូទ័រត្បាញបានរាប់សិបក្នុងមួយថ្ងៃៗ
ចន្លោះមិនឃើញ
ស្នូរសំឡេងតុកតាក់ៗចេញពីផ្ទះសិប្បករបីគ្រួសារនៅភូមិក្រាំងស្ដៅឃុំសឹងស្រុកសំរោងខេត្តតាកែវបានទាក់ទាញអ្នកដំណើរឲ្យឈប់ចូលមើលមិនដាច់ឡើយ។ នោះគឺជាសំឡេងកីត្បាញកន្សែងដែលដើរដោយដុំម៉ូទ័រនិងខ្សែពានតូចៗដាក់ទាញកង់យោងនៅតាមសងខាងនៃកីតម្បាញ។
អ្នកស្រី ប៉ែន ភាព ជាអ្នកគ្រប់គ្រងសិប្បកម្មមួយដែលមានកីតម្បាញចំនួន១២គ្រឿងបានប្រាប់ Sabay ថាត្បិតអីបច្ចុប្បន្នតម្រូវការទីផ្សារកាន់តែរីកធំ ដូច្នោះការផលិតកន្សែងពេលនេះលែងធ្វើដោយដៃដូចមុនទៀតហើយ។ អ្នកស្រីបន្តថាកីតម្បាញនីមួយៗអូសដោយម៉ូទ័រហើយមនុស្សចាំតែមើលអំបោះកុំឲ្យដាច់ជាការស្រេច។
អ្នកស្រីឲ្យដឹងទៀតថាកីតម្បាញដែលដើរដោយម៉ូទ័រទាំងនេះកើតឡើងដោយការច្នៃប្រឌិតរបស់កូនប្រសារអ្នកស្រីដែលធ្លាប់បានរៀនតៗគ្នាពីអ្នករស់នៅខេត្តកណ្តាល។
អ្នកស្រីបញ្ជាក់ទៀតថាថាសិប្បកម្មរបស់អ្នកស្រីផលិតតែកន្សែងសម្រាប់កូនកំលោះកូនក្រមុំហុចទទួលភ្ញៀវក្នុងពិធីរៀបការតែប៉ុណ្ណោះព្រោះថាបច្ចុប្បន្ននេះមានការពេញនិយមទិញកន្សែងតូចៗបែបនេះយកទៅជូនភ្ញៀវឬប្រើជាកាដូរអនុស្សាវរីយ៍។
ស្ត្រីវ័យ៥៦ឆ្នាំរូបនេះបន្តថា៖ «បច្ចុប្បន្ននេះគេលែងប្រើកម្លាំងមនុស្សដូចមុនហើយព្រោះវាព្រោះវាយូរណាស់...កាលជំនាន់ខ្ញុំនៅតូចៗម្ដាយខ្ញុំត្បាញដោយដៃទម្រាំបានកន្សែងមួយៗចំណាយពេល១ទៅ២ថ្ងៃឯណោះ»។
ម្ចាស់សិប្បកម្មដដែលប្រាប់ទៀតថាក្នុងក្ដារកីនីមួយៗអាចផលិតបានពី៦៥ទៅ៧០ កន្សែងក្នុងមួយថ្ងៃហើយថារៀងរាល់ពីរថ្ងៃទើបលាក្ដារកីមកកាត់ច្រៀកជាកន្សែងតូចៗប្រវែងប្រហែលជិត១ម៉ែត្រនិងទទឹង២តឹក។
ចំពោះទីផ្សាវិញអ្នកស្រីថាអតិថិជនភាគច្រើនមកពីភ្នំពេញនិងខេត្តសៀមរាប។ ស្ត្រីដដែលបន្តថា សិប្បកម្មអ្នកស្រីផលិតស្ទើរតែមិនទាន់តាមការបញ្ជាទិញពីអតិថិជនផងដោយរៀងរាល់២ឬ៣ថ្ងៃមានការបញ្ជាទិញមិនតិចជាង២ ០០០កន្សែង ទេ ហើយចំពោះតម្លៃវិញអ្នកស្រីថាកន្សែងមួយថ្លៃ១៥០០រៀល៕