- 2018-12-04 09:45:18
- ការអប់រំ
សូមប្រយ័ត្ន! មកដឹងទម្លាប់អាក្រក់ទាំង៥យ៉ាង ធ្វើឲ្យមនុស្សកាន់តែក្រ
- 2018-12-04 09:45:18
- ចំនួនមតិ 0 | ចំនួនចែករំលែក 0
សូមប្រយ័ត្ន! មកដឹងទម្លាប់អាក្រក់ទាំង៥យ៉ាង ធ្វើឲ្យមនុស្សកាន់តែក្រ
ចន្លោះមិនឃើញ
ពាក្យថាក្រគ្មាននរណាម្នាក់ចង់ជួប ចង់ឮ នោះទេ ប៉ុន្តែប្រសិនបើមនុស្សដែលអាចជម្នះភាពក្របានគឺជាមនុស្សជោគជ័យបំផុត។ ពាក្យក្រមិនមែនសំដៅទៅលើតែជនក្រីក្រខ្វះទីពឹងនោះទេ ប៉ុន្តែពាក្យក្រនេះគឺសំដៅទៅលើភាពខ្វះខាត មិនអាចបំពេញតម្រូវការ ឱ្យបានគ្រប់គ្រាន់ ដែលមនុស្សចង់បាន។
១. មិនហ៊ានប្រឈមជាមួយហានិភ័យ
ភាពខ្លាច ភាពរុញរាសុទ្ធតែជាកត្តារាំងស្ទះនូវអ្វីដែលបានគិត ដែលចង់ធ្វើ។ ហើយមូលហេតុដែលបង្កឱ្យមនុស្សមួយចំនួនតែងមានភាពភ័យខ្លាចក្នុងការចាប់ផ្ដើមធ្វើអ្វីមួយ មិនថាការរៀន ធ្វើការ រកស៊ី នោះទេ គឺបណ្ដាលមកពីធ្វើខ្លួនឱ្យឆ្ងាយពីសង្គម។ មួយវិញទៀតអាចបណ្ដាលមកពីកត្តាគ្រួសារ ខ្វះអ្នកជំរុញលើកទឹកចិត្ត និងកត្តាខ្លួនឯងដែលគ្មានបំណងបណ្ដុះខ្លួនឱ្យក្លាយជាមនុស្សជោគជ័យ គឺបណ្ដែតបណ្ដោយតាមយថាកម្ម។
២. សុំត្រឹមតែមួយរស់ៗ
មនុស្សគ្មានមហិច្ឆតាពេក ក៏មិនកើតដែរ ត្រូវចេះចង់មានចង់បាន ប៉ុន្តែមនុស្សមួយចំនួន តែងនិយាយថា សុំតែម៉ារស់បានហើយ ដូច្នេះទើបគ្មានការខិតខំប្រឹងប្រែងបានប៉ុណ្ណាយកប៉ុណ្ណឹង។ ដូចនេះប្រសិនបើចង់ក្លាយជាអ្នកមាន ដំបូងត្រូវមាន ក្ដីប្រាថ្នា ក្ដីស្រមៃសិន ថាចង់បានអ្វី ចង់ក្លាយជាអ្វី? ទើបអាចធ្វើឱ្យមានការតស៊ូព្យាយាមសម្រេចនូវអ្វីដែលយើងចង់បាន។ ប៉ុន្តែប្រសិនបើ គ្មានមហិច្ឆតានោះក៏គ្មានការរីកចម្រើន មិនងាយងើបផុតពីភាពក្របានដែរ។
៣. គោលដៅមិនទៀងទាត់
នៅត្រង់ចំណុចនេះមានន័យថា គោលដៅក្នុងជីវិតដែលកំណត់មិនប្រាកដប្រជា ម្ដងចង់ធ្វើនេះម្ដងចង់នោះ។ នៅពេលដែលសាកល្បងធ្វើរឿងអ្វីមួយបរាជ័យក៏បោះបង់ការព្យាយាម ហើយស្រវា ទៅចាប់មួយទៀត ដោយមិនបានដាក់ចិត្តដាក់កាយធ្វើឱ្យដល់ទីបំផុត។ ដូច្នេះគោលដៅមុននឹងកំណត់ត្រូវវិភាគមើលលើស្ថានភាពខ្លួនឯង និងកត្តាជុំវិញខ្លួន តើអាចទៅមុខរួចទេ? ហើយត្រូវបំពេញនូវចំណុចខ្វះខាតអ្វីខ្លះទើបអាចទៅដល់គោលដៅនោះ។
៤. ខ្វះទំនាក់ទំនង
ទំនាក់ទំនងជាមួយមនុស្សជុំវិញខ្លួន ជាពិសេសជាមួយបុគ្គលជោគជ័យ ដើម្បីរៀនសូត្រពីគេ។ ប៉ុន្តែមនុស្សមួយចំនួនហាក់ខ្វះទំនាក់ទំនង ជាកត្តាធ្វើឱ្យខ្វះព័ត៌មាន មិនសូវមានឱកាស។ ការបង្កើនទំនាក់ទំនងឱ្យច្រើនគឺជារឿងដ៏ល្អបំផុត ប៉ុន្តែទំនាក់ទំនងនោះត្រូវតែជាទំនាក់ទំនងដែលមានផលប្រយោជន៍សម្រាប់ខ្លួនឯង។
៥. តាំងខ្លួនធ្វើជាអ្នកមានទាំងមិនមានលទ្ធភាពគ្រប់គ្រាន់
មានលទ្ធភាពចូលហាងទំនើបរាល់ថ្ងៃ មានសមត្ថភាពទិញរបស់ថ្លៃប្រើតាមចិត្តចង់ តាមកម្រិតប្រាក់ខែ តែបានត្រឹមមួយគ្រប់ៗ ហើយចុងខែគ្មានលុយសល់ គេមិនហៅអ្នកធូរធារឡើយ គឺហៅថាមនុស្សចាយមិនចេះប្រមាណខ្លួនទៅវិញទេ។ អ្វីដែលគួរធ្វើ គួរតែទុកលុយសម្រាប់ការចំណាយលើអាហារថ្លៃៗ និងរបស់ថ្លៃៗទាំងនោះ មកជាប្រាក់សម្រាប់សន្សំ ហើយគួរងាកមកប្រើរបស់ណា អាហារណាដែលសមរម្យវិញទើបជាការប្រសើរ។ ប្រសិនបើចំណាយទៅតាមទឹកលុយដែលមាននៅក្នុងដៃ ទោះអ្នកធ្វើការរាប់ឆ្នាំទៀតក៏មិនសល់លុយផង។
សូមបញ្ជាក់ថា ៥ចំណុចខាងលើនេះ គឺជាការចែករំលែកបទពិសោធន៍ពី លោក ហេង តារារ័ត្ន សាស្ត្រាចារ្យសេដ្ឋកិច្ចនៃសាកលវិទ្យាល័យឯកជនមួយ បានប្រាប់ពីទម្លាប់អាក្រក់ៗ មួយចំនួនដែលធ្វើអោយក្រហើយកាន់តែក្រថែមទៀត៕