អបអរសាទរ! ក្រុមហ៊ុនខ្មែរមួយឈ្នះពានរង្វាន់អចលនទ្រព្យលំដាប់អន្តរជាតិ ប្រចាំតំបន់អាស៊ីប៉ាស៊ីហ្វិក នៅអង់គ្លេស

2018-12-05 08:12:15
សេដ្ឋកិច្ច

2018-12-05 08:12:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនប៉េង ហួត គ្រុប បានឈ្នះ "ពានរង្វាន់អភិវឌ្ឍន៍សេវាកម្មសាធារណៈល្អជាងគេប្រចាំតំបន់អាស៊ីប៉ាស៊ីហ្វិក" សម្រាប់គម្រោង សាលសន្និបាត យូរ៉វីល / Best Public Service Development Asia Pacific for Euroville Convention Hall"។ ការប្រកាសពានរង្វាន់នេះ ធ្វើឡើងនៅក្នុងកម្មវិធីពានរង្វាន់អចលទ្រព្យអន្ដរជាតិ រៀបចំឡើងនៅសណ្ឋាគារ The Savoy Hotel នៅទីក្រុងឡុងដ៍ ប្រទេសអង់គ្លេស កាលពីថ្ងៃទី ៣ ខែធ្នូ ឆ្នាំ ២០១៨។

កម្មវិធីខាងលើនេះ មានការចូលរួមពីម្ចាស់ជយលាភីតំបន់ប្រទេស និង តំបន់ទូទាំងពិភពលោកពី កម្មវិធីពានរង្វាន់អចលនទ្រព្យតំបន់អាស៊ីប៉ាស៊ីហ្វិក តំបន់អ៊ឺរ៉ុប តំបន់អាមេរិក តំបន់អាហ្វ្រិក តំបន់អារ៉ាប និងពីចក្រភពអង់គ្លេស ហើយក្រុមហ៊ុន ប៉េង ហួត គ្រុប តំណាងជយលាភីពីប្រទេសកម្ពុជា និង តំបន់អាស៊ីប៉ាស៊ីហ្វិក ដែលទទួលបានពានរង្វាន់ខាងលើ។

លោកឧកញ៉ា ថៃ ម៉េងលី អគ្គនាយក ក្រុមហ៊ុន ប៉េង ហួត គ្រុប បាន មានប្រសាសន៍ ពីទីក្រុងឡុងដ៍ ប្រទេសអង់គ្លេសថា៖ "នេះជាជោគជ័យថ្មីមួយទៀតរបស់ ក្រុមហ៊ុន ប៉េង ហួត គ្រុប ដែលបានធ្វើឲ្យទង់ជាតិកម្ពុជានិងស្លាកយីហោ ក្រុមហ៊ុន បង្ហាញខ្លួន លើវេទិកាអន្តរជាតិ នៅកណ្ដាលទីក្រុងឡុងដ៍ នៃចក្រភពអង់គ្លេស។ នេះមិនមែនជាការចៃដន្យទេដែល ក្រុមហ៊ុន ប៉េង ហួត គ្រុប យើងទទួលបានពានរង្វាន់អ្នកអភិវឌ្ឍសេវាកម្មសាធារណៈ ដែលល្អជាងគេប្រចាំតំបន់អាស៊ីប៉ាស៊ីហ្វិក ដែលមានការចូលរួមពីបណ្ដាលប្រទេសនានា ពី៥ទ្វីបលើពិភពលោក"។

លោកឧកញ៉ា បានបន្ថែមទៀតថា "នេះជាសមិទ្ធផលនៃការខិតខំរបស់ថ្នាក់ដឹកនាំគ្រប់ជាន់ថ្នាក់នៅក្នុងក្រុមហ៊ុន ប៉េង ហួត គ្រុបយើងដែលបានសាមគ្គីគ្នាសម្រេចចក្ខុវិស័យរបស់ក្រុមហ៊ុន ដើម្បីឈានមុខគេទាំងគុណភាព សោភ័ណភាព សេវាកម្ម ល្អជាងគេ ដូច្នេះខ្ញុំតំណាងឲ្យ ក្រុមហ៊ុន សូមថ្លែងអំណរគុណដល់ថ្នាក់ដឹកនាំទាំងអស់នឹងសូមឲ្យថ្នាក់ដឹកនាំទាំងអស់ខិតខំបន្ថែមទៀតដើម្បីសម្រេចគោលដៅក្រុមហ៊ុនឈានទៅទទួលពានលំដាប់ពិភពលោកបន្តទៀត។ ជាចុងក្រោយ ក្រុមហ៊ុនសូមថ្លែងអំណរគុណផងដែរដល់អតិថិជនដែលបន្តផ្ដល់ទំនុកចិត្ត និងគាំទ្រក្រុមហ៊ុនយើងខ្ញុំកន្លងមក។"

ជារៀងរាល់ឆ្នាំក្រុមហ៊ុន International Property Media ដែលមានមូលដ្ឋាននៅប្រទេសអង់គ្លេស តែងតែរៀបចំការប្រកួតប្រជែងយកពានរង្វាន់អចលនទ្រព្យអន្តរជាតិតាមតំបន់នីមួយៗ ដូចជា អាស៊ីប៉ាស៊ីហ្វិក អាហ្វ្រិក អារ៉ាប់ អាមេរិក អឺរ៉ុប និងចក្រភពអង់គ្លេស ដើម្បីជ្រើសរើសរកក្រុមហ៊ុនដែលល្អជាងគេមកប្រកួតប្រជែងដើម្បីសម្រិតសម្រាំងរកម្ចាស់ជយលាភីចុងក្រោយប្រចាំតំបន់នីមួយៗ និងពិភពលោក។

គួររំលឹកផងដែរថា កាលពីថ្ងៃទី៤ ខែឧសភា ឆ្នាំ២០១៨ កន្លងមកនេះ ក្រុមហ៊ុន ប៉េង ហួត គ្រុប ទទួលបានពានរង្វាន់លំដាប់ផ្កាយប្រាំ ចំនួន ០៣ និងពានរង្វាន់ផ្សេងៗ សរុប១៣ពានរង្វាន់ពីកម្មវិធីពានរង្វាន់អចលនទ្រព្យអាស៊ីប៉ាស៊ីហ្វិក ដែលរៀបចំឡើងនៅសណ្ឋាគារ The Marriott Marquis Queen's Park នៅទីក្រុងបាងកក ប្រទេសថៃ។ លើសពីនេះទៅទៀត ក្រុមហ៊ុន ប៉េង ហួត គ្រុប ក៏បានទទួលជ័យលាភី ជាក្រុមហ៊ុនអភិវឌ្ឍល្អជាងគេប្រចាំប្រទេសកម្ពុជាចំនួន ០៣ឆ្នាំជាប់គ្នាផងដែរ ពីកម្មវិធីពានរង្វាន់អចលនទ្រព្យកម្ពុជា រៀបចំឡើងដោយក្រុមហ៊ុនProperty Guru ដែលមានមូលដ្ឋាននៅប្រទេសសិង្ហបុរី៕